وفاقی وزیراحسن اقبال دی صدارت اچ گلگت بلتستان متعلق وزیراعظم دی جائزہ کمیٹی دا اجلاس

اسلام آباد۔ 5 اگست (اے پی پی) وفاقی وزیرمنصوبہ بندی، ترقی و خصوصی اقدامات پروفیسر احسن اقبال دی صدارت اچ وزیراعظم محمد شہباز شریف دی ہدایت تے قائم گلگت بلتستان جائزہ کمیٹی دا اعلیٰ سطحی اجلاس اسلام آباد اچ تھیا۔ اجلاس اچ گلگت بلتستان دے مالیاتی، انتظامی تے ترقیاتی امور دا تفصیلی جائزہ ڳھدا ڳیا تے مختلف شعبیں اچ اصلاحات متعلق اہم فیصلے کیتے ڳئے۔اجلاس اچ گلگت بلتستان دی طویل المدتی مالیاتی پائیداری، پن بجلی دی ترقی، توانائی دے شعبے اچ اصلاحات، موسمیاتی تبدیلیاں نال نبڑݨ دی حکمتِ عملی، ڈیجیٹل رابطہ کاری، عوامی خدمات ݙیوݨ تے ترقیاتی ترجیحات تے تفصیلی غور کیتا ڳیا۔ کمیٹی اپݨی سفارشات مرتب کرتے وزیراعظم کوں پیش کریسی۔اجلاس اچ گلگت بلتستان کیتے قومی مالیاتی کمیشن (این ایف سی) دے اصولاں دی روشنی اچ شفاف، منصفانہ تے پائیدار مالی وسائل دی ونڈ دے نظام دی تشکیل تے خصوصی توجہ ݙتی ڳئی۔وفاقی وزیراحسن اقبال گلگت بلتستان تے آزاد جموں و کشمیر کیتے این ایف سی طرز دے مالیاتی فریم ورک دی تیاری دی حمایت کریندیں ایں مقصد کیتے ہک اعلیٰ سطحی کمیٹی تشکیل ݙیوݨ دی ہدایت کیتی۔ کمیٹی اچ وزیراعلیٰ گلگت بلتستان، قائد حزبِ اختلاف گلگت بلتستان اسمبلی، وفاقی وزیرامورِ کشمیر و گلگت بلتستان، اٹارنی جنرل پاکستان، وزارتِ خارجہ، وزارتِ قانون و انصاف تے وزارتِ بین الصوبائی رابطہ دے نمائندے شامل ہوسن۔ کمیٹی ہک مہینے دے اندر اپݨی سفارشات وزیراعظم کوں پیش کریسی۔اجلاس کوں ݙسایا ڳیا جو گلگت بلتستان کیتے کݨک تے سبسڈی دا پراݨا مسئلہ حل کرڳھدا ڳئے تے وفاقی حکومت بدستور ایں مد اچ مالی معاونت ݙیندی پئی اے۔اجلاس اچ گلگت بلتستان دے استحکام پیکیج دا وی جائزہ ڳھدا ڳیا جݙاں جو ݙسایا ڳیا جو سال 2022ء دے بعد وفاقی مالی معاونت اچ 87 فیصد ودھارا کیتا ونڄ چکیے۔ گلگت بلتستان حکومت دے نمائندیں وفاقی حکومت دی مسلسل معاونت دی تعریف کیتی۔اجلاس کوں ݙسایا ڳیا جو وفاقی حکومت پبلک سیکٹر ڈویلپمنٹ پروگرام دے تحت گلگت بلتستان دے ترقیاتی منصوبیں کیتے مختص فنڈز اچ مسلسل ودھارا کیتے۔ مالی سال 2024-25ء اچ 132.851 ارب روپے توں ودھا تے مالی سال 2025-26ء اچ 150.4 ارب روپے تے اڄوکے مالی سال 2026-27ء اچ مزید ودھارا تے 157.5 ارب روپے مختص کیتے ڳئن جیڑھا خطے دی ترقی کیتے حکومت دے غیر متزلزل عزم دا مظہر اے۔اجلاس اچ گلگت بلتستان دے توانائی دے شعبے کوں پیش مسئلے، بجلی دی قلت، طلب و رسد دے فرق، ترسیلی نظام دی کمزوری تے علاقائی گرڈ دے قیام متعلق امور تے وی غور کیتا ڳئے۔وفاقی وزیر ݙسایا جو ریجنل گرڈ گلگت بلتستان فیز اول منصوبے تے تکھے کم جاری اے۔ 9.1 ارب روپے لاگت نال منظور تھیوݨ آلا اے منصوبہ بجلی دی ترسیل دے نظام کوں نمایاں طور تے بہتر بݨاوݨ اچ اہم کردار ادا کریسی۔ انھاں مزید ݙسایا جو گلگت بلتستان دے مختلف جہیں تے مجموعی طور تے 100 میگاواٹ صلاحیت دے تقسیم شدہ شمسی توانائی منصوبیں دا آغاز وی کیتا ونڄ چکیے جنھاں تے 24.9 ارب روپے لاگت آسی۔ انھاں منصوبیں دا مقصد خطے اچ بجلی دے بحران دا موثر حل ݙیوݨ اے۔احسن اقبال سیکرٹری وزارتِ منصوبہ بندی دی سربراہی اچ ہک کمیٹی تشکیل ݙیوݨ دی وی ہدایت کیتی جو گلگت بلتستان اچ جاری ترقیاتی منصوبیں دا جائزہ گھنسی۔ وفاقی حکومت ایں عزم دا اعادہ کیتا۔ جو گلگت بلتستان اچ ادارہ جاتی اصلاحات، مالیاتی استحکام، بنیادی ڈھانچے دی ترقی، بہتر رابطہ کاری تے خطے دے قدرتی و معاشی وسائل دے موثر استعمال دے ذریعے پائیدار تے ہمہ گیر ترقی کوں یقینی بݨایا ویسے۔