پاکستان تے ایران دا ݙوپاسے اقتصادی تعاون کوں مزید وسعت ݙیوݨ تے سالانہ سانجھی تجارت 10 ارب امریکی ڈالر تئیں ودھاوݨ دے عزم دا اعادہ

اسلام آباد۔ 5 اگست (اے پی پی) پاکستان تے ایران ݙوطرفہ اقتصادی تعاون کوں مزید وسعت ݙیوݨ تے سالانہ سانجھی تجارت دے حجم کوں 10 ارب امریکی ڈالر تئیں ودھاوݨ دے عزم دا اعادہ کریندیں پاکستان-ایران سانجھی تجارتی کمیٹی دے ݙاہویں اجلاس دا اختتام کیتا۔سانجھی تجارتی کمیٹی دے اختتامی اجلاس دی سانجھی صدارت وفاقی وزیرِ تجارت جام کمال خان تے ایران دے وزیرِ صنعت، کان کنی و تجارت ڈاکٹر محمد اتابک کیتی۔ اجلاس دے اختتام تے ݙوہیں وزراء ݙو ݙینھ وار مذاکرات دے دوران طے پاوݨ آلے فیصلیں تے مفاہمتاں تے مشتمل متفقہ ایگریڈ منٹس تے دستخط کیتے۔اجلاس اچ ݙوہیں ملکاں مجوزہ پاکستان-ایران آزاد تجارتی معاہدے (فری ٹریڈ ایگریمنٹ) تے تھیوݨ آلی پیش رفت دا خیرمقدم کیتا۔ ایں سلسلے اچ قواعد، محصولات اچ کمی دے طریقہِ کار تے مختلف مصنوعات دیاں فہرستاں متعلق امور تے پیش رفت دا جائزہ ڳھدا ڳئے۔اجلاس دے دوران بارڈر تجارت دے ودھارے، کاروباری اداریں وچال رابطے مستحکم بݨاوݨ، صنعتی تعاون تے سرمایہ کاری دے ودھارے، نجی شعبے دی شمولیت ودھاوݨ تے مشترکہ سرحدی منڈیاں کوں فعال بݨاوݨ تے وی اتفاق کیتا ڳیا۔ݙوہیں ملکاں تجارت اچ سہولت، کسٹمز دے سانجھے رابطیں، نقل و حمل، لاجسٹکس تے سرحدی بنیادی ڈھانچے کوں مزید بہتر بݨاوݨ تے زور ݙتا تاں جو بالخصوص وقتی خراب تھیوݨ آلیاں چیزاں سودھے تجارتی سامان دی بلا رکاوٹ نقل و حرکت یقینی بݨاوݨ تے ڳالھ مہاڑکیتی ڳئی۔ایں موقع تے وفاقی وزیرِ تجارت جام کمال خان آکھیا جو اجلاس اچ طے پاوݨ آلے اقدامات پاکستان تے ایران دے تاریخی تے برادرانہ تعلقات کوں مزید تکڑی اقتصادی شراکت داری اچ بدالݨ اچ اہم کردار ادا کریسن۔ایران دے وزیرصنعت، کان کنی و تجارت ڈاکٹر محمد اتابک تجارتی رکاوٹاں مکاوݨ تے ݙوطرفہ اقتصادی و تجارتی تعلقات کوں مزید وسعت ݙیوݨ کیتے ایران دے عزم دا اعادہ کیتا۔ݙوہیں وزراء ایں ڳالھ تےوی زور ݙتا جو سانجھی تجارتی کمیٹی دے آندے اجلاس توں پہلے متفقہ فیصلیں تے وقتی عملدرآمد یقینی بݨایا ونڄے تے ݙوہیں ملکاں وچال مسلسل رابطہ کاری برقرار رکھی ونڄے۔اجلاس دے اختتام تے ݙوہیں ملکاں دے وفد یادگاری تحفیں دا تبادلہ کیتا۔ تے پاکستان و ایران دے پراݨے دوستانہ تعلقات کوں مزید تکڑا بݨاوݨ دے عزم دا اظہار کیتا۔