اساں کنے قائدِ حزبِ اختلاف دے اثاثہ جات دا کوئی کیس زیرِ سماعت کائنی ، الیکشن کمیشن

اسلام آباد۔ 6 اگست (اے پی پی) الیکشن کمیشن روزنامہ ’’ڈان‘‘ سودھے چند اخباراں اچ شائع تھیوݨ آلی خبر دے حوالے نال حقائق دی درستگی کیتے وضاحت کیتی اے جو الیکشن کمیشن کنے قائدِ حزبِ اختلاف دے اثاثہ جات دا کوئی کیس زیرِ سماعت کائنی، ایں خبر اچ رول 137 آف الیکشن رولز 2017 اچ مجوزہ ترمیم کوں کمیشن دے روبرو زیرِ سماعت انھاں دی سیاسی جماعت متعلق کارروائی نال جوڑیا ڳئے جو حقائق تے قانون ݙوہیں اعتبار نال غلط تے بے بنیاد اے۔ الیکشن کمیشن جاری وضاحتی بیان اچ آکھیا جو زیرِسماعت کیس پختونخوا ملی عوامی پارٹی دے نویں آئین، انٹرا پارٹی الیکشن دا انعقاد تے پارٹی اکاؤنٹ اچ کنٹریبیوٹر دی شناخت متعلق اے۔ الیکشن کمیشن پہلے ہی الیکشن ایکٹ دی سیکشن 137 دے تحت سارے ممبراں دے اثاثہ جات دی پڑتال کریندے تے ایں قانون اچ نہ ہی کوئی ترمیم دی سفارش کیتی ویندی پئی اے تے نہ ہی کمیشن دے اختیارات اچ ودھارا کیتا ویندا پئے۔ الیکشن رولز 2017 دے رول 137 اچ مجوزہ ترمیم عمومی نوعیت دی اے تے صرف تے صرف ابہام دور کرݨ کیتے ہے تے حالی منظور وی نی تھئی۔