پاکستان سودھا اٹھ مسلم ملکاں دے وزرائے خارجہ دی غزہ دی پٹی اچ اسرائیل دیاں مسلسل خلاف ورزیاں دی شدید مذمت

اسلام آباد۔ 6 اگست(اے پی پی)پاکستان، مصر، ترکیہ، انڈونیشیا، اردن، قطر، سعودی عرب اتے متحدہ عرب امارات دے وزرائے خارجہ غزہ دی پٹی اچ اسرائیل دیاں مسلسل خلاف ورزیاں بالخصوص صحت دے مراکز اتے طبی بنیادی ڈھانچے کوں نشانہ بݨاوݨ، شہری تنصیبات تے حملیاں اتے تریمتیں اتے ٻالاں سودھا بے گناہ شہریاں دی مسلسل ہلاکتاں دی شدید مذمت کیتی اے۔ 8 اسلامی ملکاں دے وزرائے خارجہ اپݨے مشترکہ بیان اچ آکھیے جو اے اقدامات بین الاقوامی قانون، خصوصاً بین الاقوامی انسانی قانون، دی سنگین خلاف ورزیاں ہین۔ وزرائے خارجہ زور ݙتے جو انھاں خلاف ورزیاں دا تسلسل بین الاقوامی قانون دے تحت اسرائیل دی ذمہ داریاں اتے غزہ تنازعے دے خاتمے دے جامع منصوبے دی کھلی خلاف ورزی اے۔ انھاں دا آکھݨ ہئی جو اے اقدامات منصوبے دے ݙوجھے مرحلے تے عملدرآمد کیتے جاری بین الاقوامی اتے علاقائی کوششاں کوں نقصان پچیندے پئن خاص طور تے امریکی صدر ڈونلڈ ٹرمپ دے ایں اعلان دے بعد جو فلسطینی دھڑیاں روڈ میپ، بشمول ہتھیاراں دی تجدید بارے شقاں کوں قبول کر ڳھدے۔ انھاں خبردار کیتے جو اے صورتحال سیاسی عمل کوں سبوتاژ کرݨ، کشیدگی دے نویں دور کوں ودھاوݨ اتے غزہ اچ انسانی بحران کوں ٻیا سنگین ٻݨاوݨ دا سبب ٻݨ سڳدی اے۔ وزرائے خارجہ آکھیے جو شہریاں دا تحفظ، طبی مراکزی اتے صحت و انسانی ہمدردی دے شعبیاں اچ خدمات ݙیوݨ والے عملے دی سلامتی اتے غزہ دی پوری پٹی اچ انسانی امداد، طبی سامان اتے امدادی شیواں دی فوری، محفوظ اتے بلا رکاوٹ فراہمی یقینی ٻݨاوݨ قانونی ذمہ داری اے جیںدے تے کہیں وی صورت سمجھوتہ نئیں کیتا ونڄ سڳدا۔ انھاں آکھیا جو غزہ اچ جاری اسرائیلی خلاف ورزیاں کوں مقبوضہ مغربی کنارے اچ آباد کاراں دے حملیاں، غیر قانونی وستیاں دی توسیع اتے مقبوضہ یروشلم اچ تاریخی و قانونی اسٹیٹس کو، کوں تبدیل کرݨ دے یکطرفہ اقدامات توں انڄھ کر تے نئیں ݙٹھا ونڄ سڳدا۔ انھاں دے مطابق اے اقدامات مل تے طاقت دے زور تے زمینی حقائق مسلط کرݨ دی منظم پالیسی دا حصہ ہین جیڑھے ݙو ریاستی حل دیاں بنیاداں کوں کمزور کریندن اتے فلسطینی عوام دے جائز حقوق کوں نظرانداز کریندن ڄݙاں جو اے بین الاقوامی قانون اتے اقوامِ متحدہ دیاں متعلقہ قرارداداں دی صریح خلاف ورزی ہین۔ وزرائے خارجہ بین الاقوامی برادری خصوصاً اقوامِ متحدہ دی سلامتی کونسل توں مطالبہ کیتے جو او اپݨیاں قانونی اتے اخلاقی ذمہ داریاں پوریاں کرے اتے اینڄھے عملی و مؤثر اقدامات چاوے جیندے نال اسرائیل کوں بین الاقوامی قانون بالخصوص بین الاقوامی انسانی قانون اتے اقوامِ متحدہ دی سلامتی کونسل دی قرارداد 2803 دے تحت اپݨیاں ذمہ داریاں پوریاں کرݨ تے مجبور کیتا ونڄ سڳے۔ انھاں سنگین خلاف ورزیاں دے ذمہ داران دا احتساب یقینی بݨاوݨ تے وی زور ݙتا تاں جو شہریاں دا تحفظ ممکن ہووے، معاہدے تے عملدرآمد دی تکمیل دے امکانات برقرار راہون اتے مستقل جنگ بندی دی راہ ہموار تھیوے۔ وزرائے خارجہ مقبوضہ فلسطینی علاقیاں کوں اسرائیل اچ ضم کرݨ، انھاں تے اسرائیلی خودمختاری مسلط کرݨ، یا برادر فلسطینی عوام کوں جبراً بے دخل کرݨ دی کہیں وی کوشش کوں ݙو ٹوک الفاظ اچ مسترد کر ݙتا۔ انھاں زور ݙتا جو منصفانہ اتے جامع امن دا ہکو رستہ ہک سنجیدہ سیاسی عمل دا آغاز اے، جیڑھا ݙو ریاستی حل تے عملدرآمد دو ڳھن ونڄے جیںدے تحت 1967ء دیاں سرحداں دی بنیاد تے ہک آزاد اتے خودمختار فلسطینی ریاست قائم ہووے، جیںدا دارالحکومت مشرقی یروشلم ہووے۔