وفاقی وزیر قومی ورثہ و ثقافت اورنگزیب خان کھچی نال قازقستان دے سفیر یرژان کستافین دی الوداعی ملاقات

اسلام آباد۔ 7 اگست (اے پی پی) وفاقی وزیرقومی ورثہ و ثقافت اورنگزیب خان کھچی نال پاکستان اچ جمہوریہ قازقستان دے سفیر یرژان کستافین انہاں دے دفتر اچ الوداعی ملاقات کیتی۔ملاقات اچ پاکستان تے قازقستان وچال ثقافت، ورثہ، تعلیم تے عوامی رابطیں دے ودھارے سودھے ݙوطرفہ تعاون کوں مزید وسعت ݙیوݨ تے تفصیلی ڳالھ مہاڑ کیتی ڳئی۔ وفاقی وزیر اورنگزیب خان کھچی سفیر دا خیرمقدم کریندیں پاکستان تے قازقستان وچال ثقافتی تعلقات دے ودھارے اچ انھاں دی خدمات دی تعریف کیتی۔ انھاں ایں امید دا اظہار کیتا جو ݙوہیں ملکاں وچال قائم تھیووݨ آلا نیڑے تعاون سفیر دے جانشین دے دور اچ وی ایں جذبے دے نال جاری رہسی۔سفیر یرژان کستافین پاکستان، قازقستان تے وسطی ایشیا دے ملکاں وچال تاریخی، ثقافتی تے برادرانہ تعلقات کوں اجاگر کریندیں آکھیا جو انھاں تکڑے رابطیں کوں مزید فعال تے مستحکم بݨاوݨ دی لوڑھ اے۔ انھاں امید ظاہر کیتی جو آندے سال پاکستان تے قازقستان وچال براہِ راست پروازاں دا آغاز تھیسی جیں نال سیاحت، تجارت تے ثقافتی تبادلیں کوں وھارا ملسی۔ انھاں پاکستانی طلبہ کیتے قازقستان دی طرفوں ݙتے ونڄݨ آلے تعلیمی وظائف (سکالرشپس) دا وی ذکر کیتا۔وفاقی وزیر آکھیا جو ݙوہیں ملکاں وچال تھیوݨ آلے اتفاقِ رائے موجب آندے سال وزیراعظم پاکستان دے متوقع دورہِ قازقستان نال ݙوطرفہ تعلقات کوں مزید تقویت ملسی تے تعاون دے نویں موقع پیدا تھیسن۔سفیر وفاقی وزیر کوں ݙسایا جو قازقستان دے دارالحکومت آستانہ اچ اوپیرا تھیٹر، بیلے تھیٹر تے نیشنل تھیٹر سودھے ٻہوں سارے عالمی شہرت یافتہ ثقافتی ادارے موجود ہن۔ انھاں تجویز ݙتی جو وزیراعظم پاکستان دے متوقع دورے دے موقع تے ݙوہیں ملکاں دے فنکاراں دیاں مشترکہ ثقافتی پرفارمنسز دا اہتمام کیتا ونڄے جیڑھا پاکستان تے قازقستان دی مضبوط ثقافتی شراکت داری دی علامت ہوسن۔ انھاں وفاقی وزیر تے انھاں دے وفد کوں قازقستان دے دورے دی دعوت وی ݙتی تاں جو ثقافتی تعاون دے نویں امکانات دا جائزہ ڳھدا ونڄ سڳے۔وفاقی وزیر اورنگزیب خان کھچی عوامی رابطیں تے ثقافتی سفارت کاری دے ودھارے کیتے پاکستان دے عزم دا اعادہ کریندیں آکھیا جو قومی ورثہ و ثقافت ڈویژن تے ایں دے ذیلی ادارے، خصوصاً لوک ورثہ، قازقستان دے سفارت خانے دے نال نیڑے تعاون جاری رکھیسن تاں جو وزیراعظم پاکستان دی رہنمائی اچ ݙوہیں ملکاں دے ثقافتی تعلقات مزید مستحکم تھیون۔ وفاقی وزیر سفیر کوں ݙسایا پاکستانی ثقافتی وفد متعلق سفارشات دی منظوری ݙتی ونڄ چکی اے۔ وفد اچ ہک موسیقی دا استاد، ہک محقق تے ݙو سازندے شامل ہوسن جیڑھے تدریسی خدمات وی انجام ݙیندے پئن۔ انھاں آکھیا جو پاکستان قازقستان دی طرفوں باضابطہ دعوت نامے دا منتظر اے تاں جو ضروری انتظامات مکمل کیتے ونڄ سڳن۔سفیر یرژان کستافین ݙسایا جو قازقستان ثقافتی سرگرمیاں تے مشتمل ہک جامع مشترکہ ایکشن پلان تیار کیتے جو قازقستان دے کہیں وی شراکت دار ملک دے نال تیار کیتے ڳئے جامع ترین منصوبیں وچوں ہک اے تے ݙوہیں ملکاں دے ثقافتی تعاون دے ودھارے دے عزم دی عکاسی کریندے۔ وفاقی وزیر ایں تجویز دا خیرمقدم کریندیں متعلقہ اداریں دے نال فوری رابطے تے عملی اقدامات شروع کرݨ دی ہدایت کیتی تان جو وزیراعظم پاکستان دے متوقع دورہِ قازقستان دے دوران انھاں منصوبیں تے موثر عملدرآمد ممکن بݨایا ونڄ سڳے۔