ارکان پارلیمنٹ و صوبائی اسمبلی دے اثاثیں تے واجبات دے گوشوارے مالی سال 26-2025ء جمع کراوݨ دی حتمی تاریخ 31 دسمبراے، الیکشن کمیشن

اسلام آباد۔ 7 اگست (اے پی پی) الیکشن کمیشن اراکینِ پارلیمنٹ و صوبائی اسمبلی دی توجہ ایں پاسے ݙیوائی اے جو اثاثیں تے واجبات دے گوشوارے مالی سال 26-2025ء جمع کراوݨ دی حتمی تاریخ 31 دسمبر اے۔الیکشن کمیشن دے بیان موجب الیکشن ایکٹ 2017ء دی دفعہ 137 دے تحت سارے اراکینِ پارلیمنٹ و صوبائی اسمبلی دے ممبران کیتے لازم اے جو او اپݨے بشمول شریکِ حیات و زیرِ کفالت ٻالاں دے اثاثیں تے واجبات دے گوشوارے مالی سال 26-2025ء مجوزہ فارم-بی دی صورت اچ مقررہ تاریخ توں پہلے یا 31 دسمبر تئیں الیکشن کمیشن کنے جمع کروا ݙیون۔الیکشن کمیشن آکھیا جو سیکشن 137 دے تحت ہررکنِ اسمبلی و سینیٹ سابقہ 30 جون تئیں دے اپݨے بشمول شریکِ حیات و زیرِ کفالت ٻالاں دے اثاثیں تے واجبات دے گوشوارے ہر سال 31 دسمبر توں پہلے یا 31 دسمبر تئیں الیکشن کمیشن کوں جمع کرویسن۔سیکشن 137 دی ذیلی شق (2) دے تحت کمیشن ہک پریس ریلیز دے ذریعے ہر سال یکم جنوری کوں مقررہ تاریخ تئیں مطلوبہ گوشوارے جمع نہ کراوݨ آلیں دے ناں شائع کریسی۔ کمیشن 15 جنوری تئیں مذکورہ گوشوارے جمع نہ کراوݨ آلے اراکینِ پارلیمنٹ و صوبائی اسمبلیاں دے ممبران دی رکنیت معطل کر ݙیسے تے مذکورہ گوشوارے جمع نہ کراوݨ تئیں او پارلیمنٹ و اسمبلی دی کہیں وی کارروائی اچ حصہ نہ گھن سڳسن۔جے کوئی ممبر اپݨے پیش کیتے ڳئے گوشواریں اچ کہیں قسم دی غلط معلومات ݙیوݨ دا مرتکب پاتا ڳیا تاں الیکشن کمیشن سیکشن 137 دے تحت گوشوارے جمع کراوݨ دی تاریخ توں 120 ݙینھ دے اندر ایں بد عنوانی دے جرم دے ارتکاب دی پاداش اچ کارروائی کریسی۔ایں حوالے نال تیار کیتی ڳئی ہدایات / رہنمائی دے نال مقررہ فارم-بی الیکشن کمیشن سیکرٹریٹ اسلام آباد، متعلقہ صوبائی الیکشن کمشنر دے دفتر، سینیٹ سیکرٹریٹ، قومی و صوبائی اسمبلیاں دے سیکرٹریٹ توں مفت حاصل کیتا ونڄ سڳدے۔ ایں توں انڄ ، فارم-بی الیکشن کمیشن آف پاکستان دی ویب سائٹ www.ecp.gov.pk توں وی ڈائون لوڈ کیتا ونڄ سڳدے۔