پاکستان تے چین وچال اقتصادی تعاون دے وسیع موقع موجود ہن، حکومت سرمایہ کاری تے جدت دے ودھارے کیتے پرعزم اے، قیصر احمد شیخ

اسلام آباد۔ 7 اگست (اے پی پی) وفاقی وزیربورڈ آف انویسٹمنٹ قیصر احمد شیخ آکھیا جو پاکستان تے چین وچال اقتصادی تعاون کوں مزید وسعت ݙیوݨ دے بے شمار موقع موجود ہن جنھاں نال ݙوہیں ملکاں دی سانجھی ترقی، سرمایہ کاری تے صنعتی تعاون کوں نویں جہت مل سڳدی اے۔او گلوبل ساؤتھ انوویشن اینڈ انویسٹمنٹ سمٹ 2026ء اچ بطورِ مہمانِ خصوصی خطاب کریندے پئے ہن۔ انھاں آکھیا جو چین دی غیر معمولی معاشی ترقی مستقل تے تسلسل دے نال اپنائیاں ڳئیاں پالیسیاں، موثر منصوبہ بندی تے اجتماعی فیصلیں دا نتیجہ اے جیں توں پاکستان وی رہنمائی حاصل کرسڳدے، حکومت سرمایہ کاری دے ودھارے، صنعتی ترقی تے کاروبار دوست ماحول ݙیوݨ کیتے عملی اقدامات کریندی پئی اے۔قیصر احمد شیخ آکھیا جو نوجوان پاکستان دا ساریں توں قیمتی اثاثہ ہن تے ملک دی تقریباً 60 فیصد آبادی نوجواناں تے مشتمل اے۔ انھاں زور ݙتا جو نوجواناں کوں جدید ٹیکنالوجی، اختراعی سوچ تے عصرِ حاضر دیاں مہارتاں نال آراستہ کرݨ ویلھے دی اہم لوڑھ اے تاں جو او قومی معیشت اچ موثر کردار ادا کرسڳن۔انھاں دا آکھݨ ہئی جو برآمدات اچ پائیدار ودھارے کیتے ویلیو ایڈیشن ناگزیر اے، خام مال دی برآمد دے بجائے ویلیو ایڈڈ مصنوعات دی تیاری نال نہ صرف ملکی آمدݨ اچ ودھارا تھیسی بلکہ عالمی منڈیاں اچ پاکستان دی مسابقت وی بہتر تھیسی۔وفاقی وزیر آکھیا جو بورڈ آف انویسٹمنٹ ملک اچ سرمایہ کاراں کیتے سازگار تے کاروبار دوست ماحول ݙیوݨ کیتے متحرک کردار ادا کریندا پئے، حکومت غیر ضروری قواعد و ضوابط مکاوݨ ، کاروباری سوکھ دے ودھارے تے سرمایہ کاری دے عمل کوں مزید شفاف تے موثر بݨاوݨ تے خصوصی توجہ ݙیندی پئی اے۔انھاں ایں عزم دا اعادہ کیتا جو حکومت سرمایہ کاری، جدت، ٹیکنالوجی دے ودھارے تے اقتصادی اصلاحات دے ذریعے پاکستان کوں علاقائی تے عالمی سطح تے پرکشش سرمایہ کاری دی منزل بݨاوݨ کیتے بھرپور اقدامات جاری رکھیسی۔