جسٹس مسرت ہلالی دیاں عدالتی خدمات جرات، استقامت تے انصاف نال جُڑت دا مظہر ہن، چیف جسٹس پاکستان

اسلام آباد۔ 7 اگست (اے پی پی) چیف جسٹس پاکستان جسٹس یحییٰ آفریدی آکھیا جو جسٹس مسرت ہلالی دا عدالتی سفرجرات، استقامت تے انصاف دے نال غیر متزلزل وابستگی نال عبارت اے، انھاں دا کیریئر نہ صرف اہم عہدیں تے فائز رہݨ بلکہ کئی رکاوٹاں عبور کرݨ تے ٻنہاں کیتے مثال قائم کرݨ دے حوالے نال وی قابلِ ذکر اے۔سپریم کورٹ اچ جسٹس مسرت ہلالی دی ریٹائرمنٹ (سبکدوشی) دے موقع تے منعقدہ فل کورٹ ریفرنس توں خطاب کریندیں چیف جسٹس یحییٰ آفریدی آکھیا جو جسٹس مسرت ہلالی عدلیہ اچ آوݨ توں پہلے وکالت دے شعبے اچ وی غیر معمولی پیشہ ورانہ صلاحیت تے اصولی قیادت دا مظاہرہ کیتا۔چیف جسٹس آکھیا جو ایجھے ویلھے اچ جݙاں قانونی شعبے اچ عورتاں دی قیادت دے عہدیں تے نمائندگی نہایت گھٹ ہئی، جسٹس مسرت ہلالی پشاور ہائی کورٹ بار ایسوسی ایشن دی پہلی تریمت سیکریٹری منتخب تھئیاں، او ݙو واری ایں بار ایسوسی ایشن دی نائب صدر تے ݙو واری سپریم کورٹ بار ایسوسی ایشن دی ایگزیکٹو رکن وی رہیاں۔ انھاں آکھیا جو اے اعزازات محض ذاتی کامیابیاں نی بلکہ قانونی برادری اچ جسٹس مسرت ہلالی کوں حاصل اعتماد تے احترام دا مظہرہن۔چیف جسٹس پاکستان آکھیا جو جسٹس مسرت ہلالی دا قائدانہ تے اختراعی جذبہ سرکاری خدمات دے دوران وی جاری ریہا۔ او خیبر پختونخوا دی ایڈیشنل ایڈووکیٹ جنرل دے منصب تے فائز تھیوݨ آلی پاکستان دی پہلی تریمت وکیل بݨیاں۔ بعد اچ انھاں خیبر پختونخوا ماحولیاتی تحفظ ٹربیونل دی چیئرپرسن تے وفاقی محتسب انسدادِ ہراسیت خواتین بمقامِ کار دے طور تے وی خدمات انجام ݙتیاں۔ انھاں آکھیا جو انھاں سارے عہدیں تے جسٹس مسرت ہلالی اوں ہی لگن، دیانت داری تے احساسِ ذمہ واری دا مظاہرہ کیتا جیڑھا انھاں دے پورے پیشہ ورانہ کیریئر دی سنڄاݨ رہی اے۔چیف جسٹس یحییٰ آفریدی آکھیا جو عدلیہ اچ تقرری دے بعد جسٹس مسرت ہلالی دے کیریئر اچ ہک ٻیا شاندار باب شامل تھیا، او پشاور ہائی کورٹ دی پہلی تریمت چیف جسٹس بݨیاں تے پاکستان دی عدالتی تاریخ اچ ہک اہم سنگِ میل رقم کیتا۔ چیف جسٹس آکھیا جو جسٹس مسرت ہلالی دا کیریئر بالخصوص نینگر وکلاء تے تریمتاں کیتے مشعلِ راہ اے، انھاں ثابت کیتا جو محنت، دیانت داری تے لگن دے نال پیشہ ورانہ سفر جاری رکھیا ونڄے تاں کوئی وی عہدہ ناقابلِ رسائی کائنی۔چیف جسٹس پاکستان جسٹس مسرت ہلالی کوں مخاطب کریندیں آکھیا جو میݙی برادر تے ہمشیرہ ججز، سپریم کورٹ آف پاکستان دے افسران و عملے تے پوری عدالتی برادری دی طرفوں آپ دی ملک و قوم کیتے خدمات کوں خراجِ تحسین پیش کرینداں۔ انھاں آکھیا جو زندگی دے نویں باب اچ داخل تھیندیں اللہ تعالیٰ جسٹس مسرت ہلالی کوں صحت، دائمی خوشی، سکون تے اطمینان عطا فرماوے تے انصاف تے ملک کیتے انھاں دی زندگی دیاں خدمات دا اجرعطا فرماوے۔