چیئرمین سینیٹ سید یوسف رضا گیلانی جدید تقاضیں نال ہم آہنگ سینیٹ سیکرٹریٹ آفس کمپلیکس دا افتتاح کرݙتا

اسلام آباد۔ 7 اگست (اے پی پی) چیئرمین سینیٹ پاکستان سید یوسف رضا گیلانی پارلیمنٹ ہاؤس اچ سینیٹ سیکرٹریٹ دے جدید تقاضیں نال ہم آہنگ کیتے ڳئے آفس کمپلیکس دا افتتاح کرݙتے، اے اقدام ادارہ جاتی جدید کاری، انتظامی اصلاحات تے پارلیمنٹ دی استعدادِ کار کوں مزید تکڑا بݨاوݨ دے انھاں دے وژن دی تکمیل دی پاسے ہک ٻیا اہم سنگِ میل اے۔ افتتاحی تقریب اچ سیکرٹری سینیٹ سید حسنین حیدر، سینیٹ سیکرٹریٹ دے اعلیٰ افسران تے منصوبے تے عملدرآمد نال وابستہ حکام شرکت کیتی۔سینیٹ سیکرٹریٹ موجب تقریب توں خطاب کریندیں چیئرمین سینیٹ آکھیا جو مضبوط جمہوری اداریں کیتے جدید نظام، مؤثر بنیادی ڈھانچہ تے پیشہ وارانہ ماحول ناگزیر ہن۔ انھاں آکھیا جو سینیٹ سیکرٹریٹ دی جدید کاری وسیع تر اصلاحاتی ایجنڈے دا حصہ اے جیں دا مقصد ادارہ جاتی کارکردگی اچ ودھارا، خدمات ݙیوݨ کوں بہتر بݨاوݨ تے سیکرٹریٹ کوں پارلیمنٹ دی آئینی ذمہ واریاں دی ادائیگی اچ مؤثر معاونت کیتے ضروری سہولتاں تے صلاحیت نال لیس کرݨ اے۔چیئرمین سینیٹ ایں ڳالھ تے زور ݙتا جو اے منصوبہ جدت، پائیداری تے عوامی وسائل دے محتاط و دانشمندانہ استعمال کیتے سینیٹ سیکرٹریٹ دے عزم دی عکاسی کریندے۔ انھاں آکھیا جو نوین تعمیرات کرݨ دے بجائے ایں اقدام اچ مؤثر منصوبہ بندی دے ذریعے موجودہ بنیادی ڈھانچے کوں جدید بݨاوݨ تے ایں دے بہترین استعمال تے توجہ مرکوز کیتی ڳئی جیں دے نتیجے اچ دفتر دی فعالیت اچ ودھارا ، کم دی جاہ دے انتظام اچ بہتری تے ادارہ جاتی استعدادِ کار اچ ودھارا تھئے۔ایں اقدام دے تحت سینیٹ سیکرٹریٹ پہلی واری تزئین و آرائش کیتے ڳئے آفس کمپلیکس اچ جدید ترین ویری ایبل ریفریجرنٹ فلو (وی آر ایف) ایئر کنڈیشننگ سسٹم نصب کیتے۔ جدید فریش ایئر آکسیجینیشن فیچر نال لیس اے نظام مسلسل تازہ تے آکسیجن نال بھرپور ہوا ݙیوݨ کوں یقینی بݨیندے جݙاں جو بہترین توانائی دی بچت، درجہ حرارت تے درست کنٹرول تے اندرلی ہوا دے معیار اچ بہتری ݙیندے۔ ایں دے نتیجے اچ افسران تے عملے کیتے زیادہ صحت مند، آرام دہ ماحول میسر آندے۔ منصوبے دے تحت موجودہ دفتری لے آؤٹ کوں وی بہتر بݨایا ڳئے جیں نال عمارت دے مجموعی رقبے اچ ودھارے کیتے بغیر سمارٹ تے اضافی دفتری جاہ پیدا کیتی ڳئی اے۔چیئرمین سینیٹ منصوبہ مینجمنٹ ٹیم، انجینئرز، آرکیٹیکٹس، کنسلٹنٹس تے سی ڈی اے دے عملے سودھے انھاں سارے لوکاں دی خدمات دی تعریف کیتی جنھاں دی پیشہ وارانہ مہارت، لگن تے باریک بینی نال کیتی ڳئی منصوبہ بندی ایں منصوبے دی کامیاب تکمیل کوں یقینی بݨایا۔اے اقدام چیئرمین سینیٹ سید یوسف رضا گیلانی دی ادارہ جاتی ترقی، جدید کاری تے پائیدار اصلاحات تے مسلسل توجہ دا عکاس اے جیڑھا پارلیمانی طرزِ حکمرانی کوں تکڑا بݨاوݨ دے نال نال عوامی وسائل دے مؤثر استعمال کوں یقینی بݨاوݨ کیتے اختراعی تے جدید حل اپناوݨ دے سینیٹ سیکرٹریٹ دے عزم کوں مزید تقویت ݙیندے۔