جدید معاشی ماڈلز دے ودھارے، ایس ایم ایز تے صنعتی شعبے کیتے لاگت تے مبنی مراعات دے دائرہ کار اچ توسیع کرݨ کیتے صنعت تے پیداوار دے روڈ میپ تے اہم اجلاس

اسلام آباد۔ 7 اگست (اے پی پی) وفاقی وزیرِ اقتصادی امور احد چیمہ وزارتِ صنعت تے پیداوار دے روڈ میپ دا جائزہ گھنݨ کیتے ہک اعلیٰ سطحی اجلاس دی صدارت کیتی جیں اچ صنعتی ترقی کوں تکھا کرݨ تے پاکستان دی برآمدی استعداد اچ ودھارے کیتے بالخصوص چھوٹے تے درمیانے درجے دے کاروباری اداریں (ایس ایم ایز) دے شعبے کوں تکڑا بݨاوݨ تے خصوصی توجہ ݙتی ڳئی۔ اجلاس اچ وزیراعظم دے معاونِ خصوصی صنعت تے پیداوار ہارون اختر خان، سیکرٹری صنعت سیف انجم، چیف ایگزیکٹو افسر سمیڈا تے ٻئے اعلیٰ حکام شرکت کیتی۔حکام وفاقی وزیر کوں وزارت دے سٹریٹجک روڈ میپ، جاری اقدامات تے صنعتی شعبے دی مسابقتی صلاحیت ودھاوݨ کیتے مجوزہ پالیسی اقدامات تے تفصیلی بریفنگ ݙتی۔ اجلاس اچ بنیادی توجہ ایس ایم ایز کوں سہولت ݙیوݨ تے مرکوز رہی تاں جو او برآمدی منڈیاں تئیں زیادہ موثر انداز اچ رسائی حاصل کر سڳن تے قومی معیشت اچ اپݨا کردار مزید موثر طریقے نال ادا کرسڳن۔اجلاس دے دوران وفاقی وزیر احد چیمہ ایں ڳالھ تے زور ݙتا جو فرسودہ تحفظاتی معاشی پالیسیاں تے انحصار کرݨ دے بجائے جدید معاشی ماڈلز تے پالیسیاں کوں اپناوݨ ویلھے دی اہم لوڑھ اے۔انھاں آکھیا جو حکومت ملکی ضرورتاں تے قومی ترجیحات نال ہم آہنگ ہوم گرون معاشی ایجنڈے تے عمل پیرا اے جیں دا مقصد معاشی استحکام دے نال پائیدار ترقی کوں یقینی بݨانوݨ اے۔ انھاں آکھیا جو معاشی منصوبہ بندی اچ نظم و ضبط، پالیسیاں دا تسلسل، وسائل دا موثر استعمال تے طویل المدتی ترقی کیتے ناگزیر اے۔انھاں آکھیا جو ایس ایم ایز تے ٻئے وݙے صنعتی ادارے بتدریج جدید معاشی ماڈلز اختیار کریندے پئن تاںجو اپمی استعداد تے مسابقتی صلاحیت اچ ودھارا کرسڳن تے حکومت ایں عمل اچ موثر ریگولیٹری فریم ورک، مالیاتی سہولیات تک بہتر رسائی تے ٻئی ادارہ جاتی معاونت ݙے تے انھاں دی بھرپور سرپرستی کریسی۔ وفاقی وزیر آکھیا جو حکومت صنعتی شعبے کیتے منافع تے مبنی مراعات دے بجائے لاڳت تے مبنی مراعات کوں ترجیح ݙیسے۔ انھاں ایں عزم دا اعادہ کیتا جو حکومت سٹیٹ بینک آف پاکستان تے ٻئے متعلقہ اداریں دے نال رل تے ایس ایم ایز دی پیداواری تے برآمدی صلاحیت ودھاوݨ کیتے مربوط اقدامات جاری رکھیسی۔اجلاس اچ صنعتی شعبے دی کارکردگی تے غیر ملکی سرمایہ کاری دے اثرات دا جائزہ گھنݨ کیتے کلیدی کارکردگی اشاریں (کے پی آئیز) دی تیاری دا وی جائزہ ڳھدا ڳیا۔ ۔وفاقی وزیر احد چیمہ آکھیا جو حکومت وقتی ایس ایم ایز کیتے مزید ریگولیٹری اصلاحات تے اضافی لاڳت تے مبنی مراعات متعارف کرویسی۔ انھاں آکھیا جو اے سہولتاں رسمی رجسٹریشن نال مشروط ہوسن تاں جوکاروباری ادارے حکومتی معاونت توں فیدہ چیندیں ہک مضبوط، زیادہ مسابقتی تے برآمدات تے مبنی صنعتی شعبے دی تشکیل اچ اپݨا موثر کردار ادا کرسڳن۔