پاکستان تے نیوزی لینڈ وچال ویلنگٹن اچ سیاسی مشاورت تے مشترکہ تجارتی کمیٹی دے اجلاس

ویلنگٹن۔ 8 اگست (اے پی پی) پاکستان تے نیوزی لینڈ وچال سیاسی مشاورت دے پنجویں دور تے پاکستان-نیوزی لینڈ مشترکہ تجارتی کمیٹی (جے ٹی سی) دے تریجھے اجلاس دا انعقاد ویلنگٹن اچ تھیا جو ݙونھاں ملکاں وچال ݙوپاسہ رابطیاں کوں ٻیا مستحکم کرݨ آلے پاسے اہم پیش رفت اے۔ ہفتے دے ݙینھ دفترِ خارجہ توں جاری بیان دے مطابق سیاسی مشاورت دے اجلاس دی مشترکہ صدارت ایڈیشنل سیکرٹری خارجہ (ایشیا پیسیفک) ڈاکٹر سید علی اسد گیلانی تے نیوزی لینڈ دی وزارتِ خارجہ تے تجارت دے ڈپٹی سیکرٹری امریکاز اینڈ ایشیا گروپ گراہم مورٹن کیتی۔ اجلاس دے دوران ݙونھاں فریقاں ݙو پاسہ تعلقات دا جامع جائزہ گھدا اتے آپسی دلچسپی دے وسیع تر شعبیاں اچ تعاون کوں مزید مضبوط بݨاوݨ دے طریقہ کار تے غور کیتا۔ انھاں شعبیاں اچ اعلیٰ سطح دے رابطے، اقتصادی ترقی، سائنس تے ٹیکنالوجی، تعلیم، انسدادِ دہشت گردی، بین الاقوامی جرائم دے تدارک تے عوامی سطح تے رابطے شامل ہن۔ وفود علاقائی تے بین الاقوامی صورتحال تے وی ڳالھ کیتی۔ ڈاکٹر سید علی اسد گیلانی نیوزی لینڈ دے ہم منصب کوں مشرقِ وسطیٰ اچ کشیدگی گھٹ کرݨ کیتے پاکستان دی کوششاں تے جنوبی ایشیا دی علاقائی صورتحال بشمول بھارت دے غیر قانونی زیرِ قبضہ جموں تے کشمیر دی صورتحال تے بھارت ولوں سندھ طاس معاہدے دی مسلسل خلاف ورزیاں دا ݙسہا۔ ڈپٹی سیکرٹری مورٹن مشرقِ وسطیٰ اچ قیامِ امن دے عمل اچ پاکستان دے تعمیری کردار کوں سراہیا۔ اجلاس دا ہک اہم نتیجہ پاکستان تے نیوزی لینڈ وچال تعلیمی تعاون دے انتظام تے دستخط ہن جئیں نال تعلیم دے شعبے اچ ݙونھاں ملکاں وچال تعاون کوں نمایاں طور تے مزید وسعت ملݨ دی توقع اے۔ مجموعی طور تے تھیوݨ آلی ڳالھ مہاڑ ݙوپاسہ تعلقات اچ پیش رفت دا جائزہ گھنݨ، شراکت داری دے نویں شعبیاں دی نشاندہی کرݨ تے مستقبل تے مبنی، آپسی مفاد تے مبنی تعلقات کیتے مشترکہ عزم دا اعادہ کرݨ دا موقع فراہم کیتا۔