پاکستان تے چین وچال سیاسی، اقتصادی تے انفراسٹرکچر دے شعبیاں اچ مضبوط تعلقات ہن، اورنگزیب خان کھچی

اسلام آباد۔ 10 اگست (اے پی پی) وفاقی وزیر برائے قومی ورثہ تے ثقافت اورنگزیب خان کھچی آکھیا جو پاکستان تے چین وچال دوستی پہاڑاں توں بلند، سمندراں توں گہری تے شہد توں زیادہ مٹھی اے جڈانجو ݙونھائیں ملکاں دے درمیان عوامی رابطے تے ثقافتی تبادلے ایں دیرینہ دوستی دی حقیقی بنیاد ہن۔ او سنوار دے ݙینھ محکمہ آثارِ قدیمہ تے عجائب گھر اسلام آباد اچ “دی لینگویج آف دی ایسٹرن سلک روڈ — برجنگ چائنا اینڈ پاکستان، سیلیبریٹنگ شیئرڈ کلچرل اسپلنڈر” دے تحت چینی زبان تے چینی ثقافت دے تجرباتی کورس دی افتتاحی تقریب نال خطاب کریندے پئے ہن۔ وفاقی وزیر آکھیا جو پاکستان تے چین وچال سیاسی، اقتصادی تے انفراسٹرکچر دے شعبیاں اچ مضبوط تعلقات موجود ہن، جڈانجو چین پاکستان اقتصادی راہداری دے تحت تعاون وی جاری اے۔ انھاں آکھیا جو ݙونھائیں ملکاں دے عوام دے درمیان براہِ راست رابطے تے ثقافتی تبادلے آپسی تعلقات کوں ٻیا مضبوط بݨاوݨ اچ اہم کردار ادا کریندن۔اورنگزیب خان کھچی آکھیا جو اے پروگرام صرف زبان سکھݨ تائیں محدود نئی بلکہ چینی خطاطی، روایتی تہواراں تے کھاݨیاں سمیت چینی ثقافت دے مختلف پہلواں توں روشناس کراوݨ دا وی موقع فراہم کریسی۔ انھاں آکھیا جو ثقافت دلاں کوں جوڑیندی اے تے ایہو جہے اقدامات آپسی احترام، سمجھ بوجھ تے دیرپا دوستیاں دے فروغ اچ معاون ثابت تھیندن۔ تقریب نال خطاب کریندیں ہوئیں چین دے سفارتخانے دے کلچرل کونسلر مسٹر چن پینگ آکھیا جو پاکستان تے چین پہاڑاں تے دریاواں نال جڑے قریبی ہمسائے ملک ہن تے ݙونھائیں ملکاں دی دوستی وقت دے نال ٻئی مضبوط تھئی اے۔ انھاں آکھیا جو اقتصادی تے تجارتی تعاون دے نال نال ثقافتی سکھݨ دا عمل وی پاک چین دوستی کوں پائیدار بݨاوݨ اچ اہم کردار ادا کریندے۔