نائب وزیرِاعظم/وزیرِ خارجہ اسحاق ڈار دی قوم کوں پاکستان، سعودی عرب تے ترکیہ وچال”مکہ مشترکہ دفاعی معاہدے“ تے دستخط تھیوݨ تے مبارخ

اسلام آباد۔ 10 اگست (اے پی پی) نائب وزیرِاعظم تے وزیرِ خارجہ سینیٹر محمد اسحاق ڈار قوم کوں 7 اگست 2026ء کوں بابرکت شہر مکہ مکرمہ اچ پاکستان، سعودی عرب تے ترکیہ وچال ”مکہ مشترکہ دفاعی معاہدے“ (مکہ معاہدہ) تے دستخط تھیوݨ تے مبارخ ݙیندے آکھیے جو اے تاریخی معاہدہ ساݙے بھرپی دے تعلقات، مشترکہ اقدار تے امن، سلامتی و استحکام کیتے سانجھے عزم دی گہرائی کوں ظاہر کریندے۔ وزارتِ خارجہ توں جاری بیان موجب نائب وزیرِاعظم مکہ مشترکہ دفاعی معاہدے تے دستخط دے حوالے نال قوم دے ناں آپݨے سنھیے اچ آکھیے جو مکہ معاہدے تے دستخط پاکستان دے سعودی عرب تے ترکیہ دے نال پراݨے تزویراتی تعلقات اچ ہک اہم سنگِ میل ہن۔ اے معاہدہ ساݙے خطے کوں درپیش امن تے سلامتی دے بدلدے چیلنجز نال نبڑݨ کیتے تعاون کوں تکڑا بݨاوݨ دے ساݙے مشترکہ عزم دا مظہر اے۔انھاں آکھیا جو میں ایں ڳالھ دا اعادہ کرݨ چاہنداں جو مکہ معاہدہ دفاعی نوعیت دا حامل اے۔ اے کہیں وی ملک دے خلاف کائنی ۔ ایں دا مقصد ٻاہرلی جارحیت دے خلاف اجتماعی بازدار قوت کوں تکڑا بݨاوݨ تے اپݨی خودمختاری، علاقائی سالمیت تے عوام دے دفاع دی صلاحیت کوں مزید مستحکم کرݨ اے۔مکہ معاہدے دے تحت ترائی ملکاں اچوں کہیں ہک تے وی مسلح حملے کوں سارے ترائی ملکاں تے حملہ تصور کیتا ویسے جیڑھا اقوامِ متحدہ دے چارٹر دے آرٹیکل 51 دے تحت انفرادی تے اجتماعی دفاع دے فطری حق نال ہم آہنگ اے۔محمد اسحاق ڈار آکھیا جو پاکستان جھیڑیں دے پرامن حل، خودمختاری تے بین الاقوامی قانون دے احترام تے خطے اچ امن، استحکام تے خوشحالی دے ودھارے کیتے بدستور پرعزم اے۔ انھاں آکھیا جو مکہ معاہدہ تصادم دا ذریعہ نی بلکہ طاقت، یکجہتی تے سانجھے احترام دے ذریعے امن کیتے ساݙے اجتماعی عزم دا اظہار اے۔وزیرِ اعظم محمد شہباز شریف تے چیف آف ڈیفنس فورسز فیلڈ مارشل سید عاصم منیر دی قیادت اچ پاکستان دے دفترِخارجہ ایں تاریخی مکہ معاہدے کوں عملی جامہ پواوݨ اچ کلیدی کردار ادا کیتے۔ پاکستان دے قومی مفاداں دے تحفظ تے سعودی عرب و ترکیہ دے نال تزویراتی شراکت داری کوں مزید تکڑا بݨاوݨ کیتے قیادت تے وژن قابلِ تحسین ہن۔