پاکستان، سعودی عرب تے ترکیہ دا دفاعی ساتھ خطے کوں مزید محفوظ بݨیسی، رانا تنویر حسین

اسلام آباد۔ 10 اگست (اے پی پی) وفاقی وزیرقومی غذائی تحفظ تے تحقیق رانا تنویر حسین مکہ مشترکہ دفاعی معاہدے دا خیرمقدم کریندیں آکھیے جو پاکستان، سعودی عرب تے ترکیہ دا دفاعی ساتھ خطے کوں مزید محفوظ بݨیسی۔وزارتِ قومی غذائی تحفظ تے تحقیق دی طرفوں جاری بیان اچ رانا تنویر حسین آکھیا جو ترائی بھرا ملکاں دا ھک ٻئے نال کھڑے تھیوݨ قابلِ تحسین اے، پاکستان، سعودی عرب تے ترکیہ رل تے امن کیتے مؤثر کردار ادا کر سڳدن۔ انھاں آکھیا جو مشترکہ دفاعی تعاون نال ترائی ملکاں دی تیاری تے صلاحیت مزید بہترتھیسی۔رانا تنویر حسین آکھیا جو مکہ معاہدہ سانجھے اعتماد کوں عملی تعاون اچ بدلݨ دا اہم موقع اے۔ انھاں آکھیا جو پاکستان اپݨے بھرا ملکاں دے نال امن تے سلامتی کیتے ہمیشہ کھڑا رہسی۔رانا تنویر حسین آکھیا جو مکہ مشترکہ دفاعی معاہدے نال سعودی عرب تے ترکیہ دے نال پاکستان دے تعلقات مزید تکڑے تھیسن۔ وفاقی وزیر آکھیا جو مسلم ملکاں وچال تکڑے رشتے ہی مشترکہ مسئلیں دا بہتر جواب ہن، مکہ توں امن تے بھرپی دا سنھیا پوری دنیا تئیں پُڄے۔وفاقی وزیر رانا تنویر حسین آکھیا جو پاکستان ترائی ملکاں وچال مزید نیڑے رابطے چاہندے۔