پاکستان دی ترقی اچ اقلیتی برادریاں دا کردار ناقابلِ فراموش اے، سید یوسف رضا گیلانی

اسلام آباد۔ 10 اگست (اے پی پی) چیئرمین سینیٹ سید یوسف رضا گیلانی آکھیے جو پاکستان دی ترقی اچ اقلیتی برادریاں دا کردار ناقابلِ فراموش اے، ہر شہری دے حقوق، تحفظ تے مساوی موقع ݙیوݨ ریاست دی ذمہ واری اے۔انھاں اے ڳالھ سنوار دے ݙینھ پارلیمنٹ ہاؤس اچ قومی اقلیتی ݙینھ دے حوالے نال منعقدہ تقریب نال خطاب کریندیں آکھی ۔ تقریب اچ پارلیمنٹرینز، اقلیتی کاکس دے ارکان تے سینیٹ سیکرٹریٹ دے اعلیٰ حکام شریک تھئے۔چیئرمین سینیٹ آکھیا جو انھاں 2009ء اچ بطور وزیرِاعظم 11 اگست کوں قومی اقلیتی ݙینھ قرار ݙتا ہئی جیں دا مقصد اقلیتاں دے مساوی مقام، حقوق تے ملکی خدمات کوں تسلیم کرݨ ہئی۔ انھاں آکھیا جو ایں دور اچ اقلیتی امور کیتے وفاقی وزارت دے قیام، وفاقی نوکریاں اچ اقلیتاں کیتے کوٹے تے سینیٹ اچ اقلیتی نمائندگی دے ودھارے کیتے عملی اقدامات کیتے ڳئن۔انھاں آکھیا جو بطور چیئرمین سینیٹ انھاں کوں اقلیتاں دے حقوق متعلق ایں قومی عزم تے وعدے کوں اڳوں ودھاوݨ تے فخر اے، تریمتاں تے اقلیتاں انھاں دی بنیادی ترجیحات اچ شامل رہیاں ہن۔ سید یوسف رضا گیلانی آکھیا جو پاکستان دی تاریخ اقلیتی برادریاں دی لازوال خدمات نال عبارت اے، اقلیتی رہنماواں قیامِ پاکستان دی جدوجہد اچ اہم کردار ادا کیتا جݙاں جو تحریکِ پاکستان اچ دیوان بہادر ایس پی سنگھا سودھے مسیحی رہنماواں دا کردار وی قابلِ ذکر اے۔انھاں آکھیا جو قائدِ اعظم محمد علی جناح پہلی دستور ساز اسمبلی دے تاریخی اجلاس دی صدارت کیتے ہندو رہنما جوگندر ناتھ منڈل کوں منتخب کیتا۔ عدلیہ، مسلح افواج، تعلیم، صحت، ادب، سائنس تے کھیڈاں دے شعبیں اچ اقلیتی شخصیات دیاں نمایاں خدمات قابلِ تحسین ہن۔چیئرمین سینیٹ جسٹس اے آر کارنیلیس، جسٹس دوراب پٹیل تے جسٹس رانا بھگوان داس دیاں خدمات کوں قابلِ فخر قرار ݙیندیں آکھیا جو گروپ کیپٹن سہیل چوہدری، ایئر وائس مارشل ایرک گورڈن، میجر جنرل جولین پیٹر، ڈاکٹر رتھ فاؤ تے فارمین کرسچن کالج سودھے اقلیتی برادری نال تعلق رکھݨ آلی شخصیات دیاں خدمات وی قابلِ فخر ہن۔انھاں آکھیا جو میثاقِ مدینہ مختلف مذہب تے برادریاں دے لوکاں دے متحد معاشرے اچ رہݨ دی روشن مثال اے، شہید محترمہ بے نظیر بھٹو وی مذہبی امتیاز مکاوݨ تے سارے شہریاں دے مساوی حقوق دی حمایت کیتی۔چیئرمین سینیٹ قومی اقلیتی ݙینھ دی تقریب دے انعقاد تے سینیٹر دنیش کمار تے پارلیمنٹرینز مینارٹیز کاکس دا شکریہ ادا کیتا۔