اقلیتاں سارے زندگی دے شعبیں اچ قابلِ قدر خدمات انجام ݙیندیاں پئن، سپیکر قومی اسمبلی سردار ایاز صادق

اسلام آباد۔ 10 اگست (اے پی پی) سپیکر قومی اسمبلی سردار ایاز صادق ملک دی تعمیر تے ترقی اچ اقلیتی برادری دے کردار کوں خراجِ تحسین پیش کریندیں آکھیے جو پاکستان اچ وسݨ آلیاں اقلیتاں تعلیم، صحت، دفاع، تجارت سودھے سارے زندگی دے شعبیں اچ قابلِ قدر خدمات انجام ݙیندیاں پئن، آئینِ پاکستان دے آرٹیکل 25 دے تحت سارے شہری قانون دی نظر اچ بلا امتیاز رنگ، نسل، جنس تے مذہب برابر ہن تے قانونی تحفظ دے مساوی طور تے حقدار ہن۔انھاں اے ڳالھ اقلیتاں دے قومی ݙینھ دے موقع تے اپݨے پیغام اچ آکھی۔ اے ݙینھ ہر سال 11 اگست کوں ملک اچ ملی جوش تے جذبے نال منایا ویندے۔سپیکر سردار ایاز صادق آکھیا جو اقلیتاں دا قومی ݙینھ اساکوں سانجھے احترام، رواداری، مذہبی ہم آہنگی تے قومی یکجہتی دے ودھارے دے عزم دی تجدید دا موقع ݙیندے۔ انھاں آکھیا جو 11 اگست 1947ء کوں دستور ساز اسمبلی توں اپݨے تاریخی خطاب اچ بانیِ پاکستان قائدِ اعظم محمد علی جناحؒ فرمایا جو ہر شہری اپݨے مذہب تے عمل کرن، اپݨی عبادت گاہواں اچ ونڄݨ تے اپݨے عقیدے موجب زندگی گزارݨ کیتے آزاد اے۔ انھاں آکھیا جو قائدِ اعظمؒ دا اے تاریخی خطاب پاکستان اچ مذہبی آزادی، مساوات، برداشت تے قانون دی حکمرانی تے مبنی ہک ایجھے معاشرے دی بنیاد ݙیندے جتھاں سارے شہریاں کوں بلا امتیاز رنگ و نسل تے مذہب مساوی حقوق حاصل ہوون۔ انھاں آکھیا جو ریاستِ پاکستان قائدِ اعظمؒ دے ایں وژن تے عمل پیرا اے تے پاکستان اچ وسݨ آلے سارے شہریاں کوں مکمل مذہبی آزادی سودھے مساوی حقوق حاصل ہن۔سپیکر سردار ایاز صادق آکھیا جو پاکستان دی پارلیمان ہمیشہ اقلیتی برادری دے حقوق دے تحفظ، بین المذاہب ہم آہنگی تے مساوی موقع ݙیوݨ کیتے مؤثر قانون سازی کیتی اے۔ انھاں آکھیا جو قومی اسمبلی اچ اقلیتی ارکانِ پارلیمان قانون سازی تے قومی امور اچ فعال کردار ادا کریندے پئن جو پاکستان دے جمہوری تے شمولیتی نظام دی مضبوطی دا مظہر اے۔ایں موقع تے سپیکر قومی اسمبلی سردار ایاز صادق پاکستانی غیر مسلم شخصیتاں دے کارہائے نمایاں دا ذکر کریندیں آکھیا جو سابق ڈپٹی سپیکر قومی اسمبلی سی ای گبن، سابق سپیکر پنجاب اسمبلی ایس پی سنگھا، جسٹس اے آر کارنیلیئس، جسٹس دراب پٹیل، جسٹس رانا بھگوان داس، ڈاکٹر رتھ فائو، سکواڈرن لیڈر پاک فضائیہ سیسل چوہدری، گروپ کیپٹن پاک فضائیہ کامران بشیر تے معروف سفارتکار جمشید مارکر سودھے ٻئے ممتاز غیرمسلم شخصیات مختلف شعبہ ہائے زندگی اچ خدمات سرانجام ݙتیاں جو ساݙی قومی تاریخ دا قابلِ فخر حصہ ہن۔سپیکر قومی اسمبلی آکھیا جو ہک مضبوط، ترقی یافتہ تے خوشحال پاکستان دی بنیاد مساوات، انصاف، مذہبی آزادی تے سارے شہریاں دی یکساں شمولیت اچ مضمر اے۔ انھاں ایں عزم دا اعادہ کیتا جو پارلیمان اقلیتاں دے آئینی حقوق دے تحفظ، مذہبی رواداری دے ودھارے تے قومی یکجہتی کوں مزید مستحکم بݨانوݨ کیتے اپݨی آئینی ذمہ واریاں ادا کریندی رہسی۔