مکہ معاہدے دے کوئی جارحانہ مقاصد نئیں، اے صرف دفاعی مقاصد اتے خطے اچ امن، ترقی اتے خوشحالی ودھاوݨ کیتے اے، وزیرِ اعظم

اسلام آباد۔ 10 اگست (اے پی پی): وزیرِ اعظم محمد شہباز شریف آکھیے جو مکہ معاہدے دے کوئی جارحانہ مقاصد نئیں، اے صرف اتے صرف دفاعی مقاصد اتے خطے اچ امن، ترقی و خوشحالی ودھاوݨ کیتے اے، مسلم لیگ (ن) آزاد جموں و کشمیر اچ اکثریتی جماعت ٻݨ تے ابھری اے۔ اسلام آباد اچ وفاقی کابینہ دے اجلاس دی اڳواݨی کریندے وزیرِ اعظم آکھیا جو مکہ مکرمہ اچ پاکستان، سعودی عرب اتے ترکیہ دے دفاعی معاہدہ تے سعودی عرب دے ولی عہد شہزادہ محمد بن سلمان، ترکیہ دے صدر رجب طیب اردوان اتے میں دستخط کیتن، کئی ݙھاکیاں توں پاکستان سعودی عرب نال مل تے حرمین شریفین دی حفاظت دا فریضہ نبھیندا پئے، پچھلے سانڳے ایں سانڳے باقاعدہ معاہدہ طے پایا ہئی، ایں معاہدے دی توسیع تھئی اے، تریے ملکاں وچال اے معاہدہ خطے اچ امن، سلامتی اتے خوشحالی کیتے اے۔ پاکستان اتے ترکیہ وچال وی کئی ݙھاکیاں دا تعاون اے، پاکستان، سعودی عرب اتے ترکیہ دفاعی معاہدہ پہلے توں موجود تعاون دا تسلسل اے۔ وزیرِ اعظم آکھیا جو حرمین شریفین دے تحفظ دی ذمہ داری پاکستان دے عوام اتے افواج کیتے اہم فریضہ اے۔ انھاں واضح کیا جو سہ فریقی دفاعی معاہدہ کہیں دے خلاف قطعاً جارحیت نئیں، اے صرف و صرف دفاعی مقاصد اتے خطے دے امن، ترقی اتے خوشحالی کیتے اے۔ وزیرِ اعظم آکھیا جو معاہدہ امتِ مسلمہ کیتے ماݨ دی ڳالھ اے۔ وزیرِ اعظم سہ فریقی معاہدے کیتے نائب وزیرِ اعظم اتے وزیرِ خارجہ سینیٹر محمد اسحاق ڈار اتے فیلڈ مارشل سید عاصم منیر دیاں کوششاں کوں سراہیا جو اے کئی سالاں دیاں کوششاں دا پھل اے۔ وزیرِ اعظم وطنِ عزیز توں دہشت گردی دے مکمل خاتمے دے قومی عزم دا اعادہ کریندے آکھیا جو دہشت گرداں کڄھ علاقیاں اچ دہشت گردی کھنݙائی، مختلف واقعیاں اچ ساݙے پولیس اتے افواجِ پاکستان دے آفیسرز اتے جوان شہید تھئے۔ ہنگو، سوات اتے ٻیاں علاقیاں اچ سکیورٹی فورسز دے جواناں اپݨیاں جاناں دے نذرانے پیش کیتے۔ انھاں میجر حافظ احسان الٰہی، کیپٹن حمزہ اکرم، ڈی ایس پی دیار خان سودھا سارے شہداء کوں خراجِ عقیدت پیش کریندے آکھیا جو دہشتگردی دے خلاف جنگ اچ ساݙے بہادر سپوتاں عظیم قربانیاں ݙتین۔ دہشت گردی دے خلاف قربانیاں رائیگاں نہ ویسن۔ انشاء اللہ وطنِ عزیز توں ہک واری ول دہشت گردی دے ناسور دا خاتمہ تھیسی۔ وزیرِ اعظم محمد شہباز شریف مسلم لیگ (ن) دے رہنما تے سابق وزیرِ اعظم محمد نواز شریف دے دیرینہ ساتھی اقبال چنڑ دے انتقال تے افسوس کریندے مرحوم دیاں سیاسی خدمات کوں خراجِ عقیدت پیش کیتا۔ وزیرِ اعظم کابینہ کوں ݙسایا جو آزاد جموں و کشمیر دے انتخابات اچ عوام مسلم لیگ (ن) تے اعتماد کیتے، پہلے ݙوھائیں مرحلیاں اچ مسلم لیگ (ن) کوں واضح کامیابی ملی اے، انتخابی نتائج قائد محمد نواز شریف دی قیادت اتے اعتماد دا اظہار ہن۔ انھاں آکھیا جو مسلم لیگ (ن) آزاد کشمیر ہک واری ول ترقی اتے خوشحالی دا سفر شروع کریسی۔ انھاں آزاد کشمیر دے عوام دا شکریہ ادا کیتا۔ وزیرِ اعظم آکھیا جو کہیں وی مہذب معاشرے اچ لاقانونیت دی اجازت نئیں ݙتی ونڄ سڳدی، مسائل دا حل ڳالھ مہار نال کݙھیا ویندے۔ انھاں آکھیا جو کچھ عناصر آزاد کشمیر دے حالات ڄاݨ ٻجھ تے خراب کرݨ دی کوشش کیتی، واضح ثبوت موجود ہن جو او غیراں دے اشاریاں تے کم کریندے پئن۔ الیکشن توں پہلے مظفر آباد اچ آل پارٹیز کانفرنس جیںدے اچ ہک توں علاوہ ساریاں جماعتاں موجود ہن، اچ معاملیاں تے ہر پہلو توں الائے، تجویز ݙتی ڳئی جو مہاجرین دیاں نشستاں دے حوالے نال انتخابات دے بعد نویں منتخب اسمبلی اچ اپݨا مقدمہ گھن تے آوو، جیہڑا وی اکثریت نال آئین اتے قانون دے مطابق فیصلہ تھیسی اوکوں قبول کیتا ویسی، ساریاں ڳالھیں طے تھی ڳیاں ٻھل او اڑیے رہین اتے ضد نال معاملہ خراب تھی ڳئے۔ وزیرِ اعظم آکھیا جو مذاکرات دا سلسلہ نویں حکومت ٻݨݨ دے بعد اڳو تے ودھسی، خرابی کھنݙاوݨ دی اجازت نا ݙتی ویسی، ڄیڑھے لوک امن، تحمل اتے برداشت نال ڳالھ مہاڑ کرݨ چاہندن نویں حکومت انھاں کیتے موقع ݙیسی۔ وزیرِ اعظم آکھیا جو جشنِ آزادی دی آمد آمد اے، قوم روایتی اتے شایانِ شان طریقے نال جشنِ آزادی مناوݨ کیتے ودھ تیاریاں کریندی پئی اے، صوبیاں نال مل تے 14 اگست وݙی شان و شوکت نال منیسوں۔ انھاں آکھیا جو پاکستان کوں ترقی، امن تے خوشحالی دی راہ تے سٹݨ کیتے پرعزم ہین اتے پاکستان کوں صحیح معنیاں اچ قائد دا پاکستان ٻݨیسوں، امانت اتے دیانت نال پاکستان کوں دنیا اچ ایںدا باوقار مقام ݙویسوں۔ وزیرِ اعظم دی ہدایت تے وفاقی وزیرِ مذہبی امور سردار محمد یوسف کابینہ اجلاس اچ جامِ شہادت نوش کرݨ والے بہادر سپوتاں اتے اقبال چنڑ دے درجات دی بلندی کیتے دعا کرائی۔