نائب وزیرِ اعظم تے وزیرِ خارجہ سینیٹر محمد اسحاق ڈار دا اقلیتاں دے قومی ݙینھ دے موقع تے سنیھا

اسلام آباد۔ 11 اگست (اے پی پی) نائب وزیرِ اعظم تے وزیرِ خارجہ سینیٹر محمد اسحاق ڈار آکھیا جو پاکستان اپنی اقلیتی برادریاں دی قومی زندگی تے ملک دی سماجی، معاشی، ثقافتی تے سیاسی ترقی اچ انھاں دی گراں قدر خدمات کوں انتہائی قدر دی نگاہ نال ݙیکھدے۔ دفترِ خارجہ دے مطابق اے ڳالھیں انہاں منگل دے ݙینھ اقلیتاں دے قومی ݙینھ دے موقع تے آپݨے سنیھے اچ آکھی۔ انھاں آکھیا جو اقلیتاں دے قومی ݙینھ دے موقع تے اساں بابائے قوم قائدِ اعظم محمد علی جناح دے ایں وژن نال آپݨی غیر متزلزل وابستگی دا اعادہ کریندوں جو پاکستان ایجھا ملک ہووے جتھاں سارے شہریاں دے حقوق، وقار تے آزادیاں دا مکمل تحفظ کیتا ونڄے۔ سینیٹر محمد اسحاق ڈار آکھیا جو اقلیتاں دا تحفظ اسلام دیاں تعلیماں اچ مضبوطی نال راسخ اے جو اساکوں تمام برادریاں کیتے انصاف، وقار، مساوات تے احترام کوں یقینی بݨاوݨ دا درس ݙیندن۔ انھاں آکھیا جو ایں طرحاں پاکستان دا آئین وی اقلیتاں دے سیاسی، معاشی تے سماجی حقوق دی ضمانت ݙیندے تے انھاں کوں مساوی شہریت فراہم کریندے۔ انھاں آکھیا جو بنیادی انسانی حقوق نال متعلق اہم بین الاقوامی معاہدیاں دے فریق دی حیثیت نال پاکستان آپݨے تمام شہریاں دے بنیادی حقوق تے آزادیاں دے تحفظ کیتے پرعزم اے اتے مذہب، نسل یا عقیدے دی بنیاد تے کہیں قسم دے امتیاز دے بغیر انھاں حقوق کوں یقینی بݨاوݨ دے عزم تے قائم اے۔ نائب وزیرِ اعظم آکھیا جو پاکستان آپݨی اقلیتی برادریاں دی قومی زندگی تے ملک دی سماجی، معاشی، ثقافتی تے سیاسی ترقی اچ انھاں دی گراں قدر خدمات کوں انتہائی قدر دی نگاہ نال ݙیکھدے، انھاں دی خدمات اساݙی مشترکہ وراثت کوں مالا مال کیتے اتے اساݙے معاشرے دے آپسی رشتیاں تے سماجی ڈھانچے کوں ٻیا مضبوط بݨائے۔ نائب وزیرِ اعظم حکومتِ پاکستان دے ایں غیر متزلزل عزم دا اعادہ کیتا جو ہر شہری کوں قانون دے تحت مساوی حقوق، مساوی موقعے تے مساوی تحفظ فراہم کیتا ویسے۔ انھاں آکھیا جو اساں ایجھے پاکستان دی تشکیل کیتے آپݨی کوششاں جاری رکھیسوں جتھ ہر شہری وقار، تحفظ تے احساسِ وابستگی دے نال زندگی گزار سڳے اتے اساݙے ملک دی ترقی تے خوشحالی اچ بھرپور کردار ادا کر سڳے۔