نائب وزیرِ اعظم سینیٹر محمد اسحاق ڈار دی صدارت 14ویں ساؤتھ ایشین گیمز دیاں تیاریاں دا جائزہ اجلاس

اسلام آباد۔ 11 اگست (اے پی پی) نائب وزیرِ اعظم تے وزیرِ خارجہ سینیٹر محمد اسحاق ڈار 14ویں ساؤتھ ایشین گیمز دیاں تیاریاں دا جائزہ گھنݨ کیتے منگل دے ݙینھ اتھاں ہک اجلاس دی صدارت کیتی۔ دفترِ خارجہ دے مطابق پاکستان مارچ 2027 اچ انھاں کھِیݙاں دی میزبانی کریسی۔ نائب وزیرِ اعظم کھِیݙاں دے اہم امور دی نگرانی کیتے ذیلی کمیٹیاں تشکیل ݙیوݨ دی ہدایت کیتی جنھاں اچ مالیاتی امور، انفراسٹرکچر دی تعمیر تے اپ گریڈیشن، کھِݙاریاں دی تربیت تے تیاری تے لاجسٹک انتظامات شامل ہن۔ انھاں بروقت منصوبہ بندی تے تمام متعلقہ فریقاں وچال قریبی رابطے دی اہمیت تے زور ݙتا تانجو پاکستان انھاں کھِیݙاں دی بہترین معیار دے مطابق میزبانی کوں یقینی بݨا سڳے۔ انھاں آکھیا جو 14ویں ساؤتھ ایشین گیمز پاکستان کوں آپݨی کھِیݙاں دی صلاحیت، مہمان نوازی تے انتظامی استعداد کوں دنیا دے سامݨے اجاگر کرݨ دا اہم موقع فراہم کریندن۔ ایں موقعے دے ذریعے دنیا کوں امن، دوستی، خیر سگالی تے ہم آہنگی دا سنیھا وی ݙتا ونڄ سڳدے۔ اجلاس اچ وزیرِ اعظم دے معاونِ خصوصی طارق باجوہ، پاکستان اولمپک ایسوسی ایشن دے صدر عارف سعید، سیکرٹری بین الصوبائی رابطہ، ڈائریکٹر جنرل پاکستان سپورٹس بورڈ، وزارتِ خزانہ دے حکام تے پنجاب تے خیبر پختونخوا دی حکومتاں دے نمائندیاں شرکت کیتی۔