نیشنل ہاؤسنگ پالیسی 2026 ہاؤسنگ بحران تے شہری ترقی دے چیلنجز نال نبڑݨ اچ اہم پیش رفت اے، میاں ریاض حسین پیرزادہ

اسلام آباد۔ 11 اگست (اے پی پی) وفاقی وزیر ہاؤسنگ تے تعمیرات میاں ریاض حسین پیرزادہ آکھیے جو نیشنل ہاؤسنگ پالیسی 2026 دی منظوری وزارت کیتے اہم کامیابی تے تاریخی سنگِ میل اے، پاکستان تقریباً ہک چوتھائی صدی توں تازہ تے جامع قومی ہاؤسنگ پالیسی توں محروم ہئی۔ترجمان وزارتِ ہاؤسنگ تے تعمیرات موجب ریاض حسین پیرزادہ آکھیا جو نویں پالیسی ملک اچ ہاؤسنگ دی کمی تے شہری ترقی کوں درپیش ابھردے چیلنجز نال نبڑݨ کیتے واضح سمت ݙیسی تے پورے پاکستان اچ جامع، سستی تے پائیدار رہائشی ترقی دے ودھارے اچ معاون ثابت تھیسی۔ وفاقی وزیر نیشنل ہاؤسنگ پالیسی 2026 دی منظوری تے وزارتِ ہاؤسنگ تے تعمیرات دے پالیسی اینڈ پلاننگ ونگ دی ٹیم کوں مبارخ ݙیندیں آکھیا جو پالیسی دی تیاری اچ سارے اہم سٹیک ہولڈرز کوں اعتماد اچ گھنݨ دی بھرپور کوشش کیتی ڳئی۔انھاں آکھیا جو وفاقی کابینہ دی طرفوں نیشنل ہاؤسنگ پالیسی 2026 دی منظوری تقریباً 25 سال بعد عمل اچ آئی، سابقہ قومی ہاؤسنگ پالیسی 2001ء اچ منظور کیتی ڳئی ہئی، نویں پالیسی ہاؤسنگ تے شہری منصوبہ بندی دے شعبیں کیتے جامع قومی فریم ورک ݙیسی۔ میاں ریاض حسین پیرزادہ آکھیا جو پالیسی دا بنیادی مقصد ساریں کیتے مناسب، سستی تے پائیدار رہائش دے موقعیں کوں ودھاراݙیوݨ اے، بنیادی سہولتاں تے معاون انفراسٹرکچر تئیں بہتر رسائی وی ایں دے اہم اہداف اچ شامل اے۔انھاں آکھیا جو نیشنل ہاؤسنگ پالیسی 2026 اچ ہاؤسنگ تے شہری ترقی دے اہم شعبیں کوں نو موضوعات دے تحت شامل کیتا ڳئے جنھاں اچ رہائشی اراضی، ہاؤسنگ فنانس، تعمیراتی خدمات، ٹیکنالوجی تے تعمیراتی مواد، درمیانے تے ثانوی شہراں دی ترقی، کچی آبادیاں، سستی رہائش، گھٹ آمدݨ آلے طبقے تے دیہی آبادی کیتے گھٹ لاڳت رہائش، استعدادِ کار اچ ودھارا تے علم تے تجربیں دا تبادلہ شامل ہن۔وفاقی وزیر آکھیا جو پالیسی اچ زمین دی دستیابی، ہاؤسنگ فنانس، تعمیرات تے ٹیکنالوجی، متوازن شہری ترقی، گھٹ آمدݨ آلے طبقے تے دیہی آبادی کیتے رہائش، ادارہ جاتی تے قانونی اصلاحات تے موسمیاتی تبدیلیاں نال مطابقت رکھݨ آلی ماحول دوست تے پائیدار رہائش کیتے جامع فریم ورک ݙتا ڳئے۔ انھاں آکھیا جو نیشنل ہاؤسنگ پالیسی 2026 ملک اچ ہاؤسنگ تے شہری ترقی دے شعبے کوں مستقبل دے تقاضیں نال ہم آہنگ کرݨ اچ اہم کردار ادا کریسی۔ وفاقی وزیر پالیسی دی تیاری اچ وزارت دے پالیسی اینڈ پلاننگ ونگ دیاں کوششاں دی تعریف کریندے ٹیم دی محنت تے پیشہ ورانہ خدمات دی تعریف کیتی