ہارون اختر وزیرِاعظم دے مشیر صنعت تے پیداوار مقرر، وفاقی وزیر دا درجہ ہوسی، کابینہ ڈویژن دا نوٹیفکیشن جاری

اسلام آباد۔ 11 اگست (اے پی پی) حکومت ہارون اختر خان دی وزیرِ اعظم دے مشیرصنعت تے پیداوار دی حیثیت نال تقرری دا باضابطہ نوٹیفکیشن جاری کرݙتے جیں دے تحت انھاں کوں وفاقی وزیر دا درجہ حاصل ہوسی۔وزارتِ صنعت تے پیداوار توں جاری بیان موجب ہارون اختر خان دی تقرری صدرِ پاکستان دی طرفوں کیتی ڳئی اے جݙاں جو کابینہ ڈویژن ایں حوالے نال باضابطہ نوٹیفکیشن جاری کر ݙتے۔ ہارون اختر خان فوری طور تے وزیرِاعظم دے مشیر دی حیثیت نال اپݨی ذمہ واریاں سنبھلیسن تے صنعت تے پیداوار دا قلمدان وی انھاں کنے رہسی۔ہارون اختر خان دا کاروباری کامیابی تے عوامی خدمت دا نمایاں ریکارڈ اے۔ او ݙو واری سینیٹر تے ݙو واری پنجاب اسمبلی دے رکن منتخب تھی چکئن۔ ہارون اختر خان کینیڈا دی یونیورسٹی آف مینی ٹوبا توں ایکچوریل سائنس تے بزنس ایڈمنسٹریشن اچ ماسٹر آف سائنس دی ڈگری حاصل کیتی۔ او سوسائٹی آف ایکچوریز (امریکا) تے کینیڈین انسٹی ٹیوٹ آف ایکچوریز دے فیلو وی ہن۔ پیشہ ورانہ قابلیت حاصل کرݨ ویلھے او ایکچوری دے شعبے دی تاریخ اچ ساریں توں گھٹ عمر ایکچوری بݨیے۔پاکستان واپسی توں پہلے انھاں امریکا تے کینیڈا اچ کارپوریٹ گورننس، معاشیات، منصوبہ بندی تے پیش گوئی، ماڈلنگ تے سرمایہ کاری دے شعبیں اچ وسیع تجربہ حاصل کیتا۔ 2015ء توں 2018ء تئیں انھاں معاونِ خصوصی محصولات دی حیثیت نال خدمات انجام ݙتیاں جتھاں انھاں کوں وفاقی وزیر دا درجہ حاصل ہئی۔ 2006ء توں 2012ء تئیں سینیٹر دی حیثیت نال انھاں قائمہ کمیٹیاں اچ بطورِ سینئر رکن خدمات انجام ݙتیاں جنھاں اچ خزانہ، اقتصادی امور، محصولات، شماریات، منصوبہ بندی تے ترقی، تجارت، صنعت تے پیداوار، پٹرولیم، قدرتی وسائل تے معدنیات تے کھِیݙاں، ثقافت تے سیاحت شامل ہن۔ترائے ݙہاکیں توں ودھ عرصے تے محیط کاروباری برادری تے صنعتی راہنماواں نال مسلسل رابطیاں ہارون اختر خان کوں معاشیات، کاروبار، صنعت تے عوامی شعبے دے مختلف میداناں اچ وسیع تے ہمہ جہت تجربہ ݙتے۔ اپݨے شاندار کیریئر دے دوران انھاں بزنس ٹو بزنس تے بزنس ٹو گورنمنٹ دے وچال رابطیں کوں تکڑا بݨاوݨ اچ اہم کردار ادا کیتا، سرمایہ کاراں، صنعت کاراں تے ریگولیٹرز کوں ہک مشترکہ پلیٹ فارم تے گھن آوݨ کیتے موثر اقدامات کیتے۔ انھاں کوششاں دے ذریعے انھاں سرمایہ کاراں دے اعتماد اچ ودھارے، صنعتی شراکت داری دے ودھارے تے پاکستان اچ صنعتی ترقی دے دائرہ کار تے امکانات کوں وسعت ݙیوݨ اچ نمایاں کردار ادا کیتے