تشدد دی سیاست پی ٹی آئی دا وطیرہ بݨ چکی اے، راولپنڈی فائرنگ دے واقعے پی ٹی آئی دا مذموم ایجنڈا تے عزائم بے نقاب کرݙتن، وفاقی وزیر عطاء اللہ تارڑ

اسلام آباد۔ 11 اگست (اے پی پی) وفاقی وزیرِ اطلاعات تے نشریات عطاء اللہ تارڑ آکھیے جو تشدد دی سیاست پی ٹی آئی دا وطیرہ بݨ چکی اے، پی ٹی آئی پرامن احتجاج تے یقین نی رکھیندی، ایں دا مقصد ملک اچ امن تے امان دی صورتحال کوں تباہ کرݨ تے ملکی ترقی دا رستہ روکݨ اے، راولپنڈی فائرنگ دے واقعے پی ٹی آئی دے مذموم ایجنڈے تے عزائم ساریں دے سامݨے بے نقاب کر ݙتن۔راولپنڈی مال روڈ تے پی ٹی آئی کارکن دی فائرنگ دے حوالے نال خصوصی ڳالھ مہاڑ کریندے وفاقی وزیرِ اطلاعات آکھیا جو راولپنڈی مال روڈ تے پیش آوݨ آلا واقعہ قابلِ مذمت اے۔ انھاں آکھیا جو تشدد دی سیاست کرݨ تے اسلحے نال لیس تھی تے آوݨ پی ٹی آئی دا وطیرہ بݨ چکیے، راولپنڈی اچ پی ٹی آئی کارکن دی طرفوں سکیورٹی اہلکار تے فائرنگ دا کوئی جواز کائناں ہئی۔انھاں آکھیا جو پی ٹی آئی دی طرفوں لانگ مارچ دی کال وی ݙتی ڳئی اے جݙاں جو ایں دے ماضی دے سارے احتجاج ریکارڈ تے ہن جنھاں اچ کارکن اسلحے نال لیس تھی تے آئے تے پولیس تے رینجرز دے اہلکاراں کوں شہید کیتا۔ انھاں آکھیا جو پی ٹی آئی پرامن احتجاج تے یقین نی رکھیندی، اڄ دے واقعے توں ایں دے مقصد تے عزائم پوری قوم دے سامݨے آ ڳئن۔وفاقی وزیر آکھیا جو راولپنڈی مال روڈ تے ݙینھ کوں مسلح تھی تے فائرنگ دا واقعہ تشدد دی سیاست دی واضح مثال اے۔ تشدد پی ٹی آئی دا نظریہ اے جو سیاست تے یقین رکھیندی اے، انھاں دا کوئی ہک احتجاج وی پرامن نہیں ریہا۔ وفاقی وزیر آکھیا جو اڄ دے واقعے توں کئی اہم حقائق دنیا دے سامݨے آئن، پی ٹی آئی دے کارکن توں پارٹی دا جھنڈا تے ٻئی دستاویزات وی برآمد تھئن۔وفاقی وزیر آکھیا جو اے ڳالھ ݙینھ دے ݙیوے وانڳوں عیاں اے جو پی ٹی آئی دے کہیں وی احتجاج دے پچھوں ملک اچ انارکی کھنڈاوݨ تے امن تے امان کوں تباہ کرݨ اے۔ انھاں آکھیا جو ہݨے ہی مکہ مشترکہ دفاعی معاہدہ عمل اچ آیا، جݙاں وی پاکستان کوں عالمی سطح تے عزت ملدی اے یا ملک کیتے کوئی اہم پیشرفت تھیندی اے، یا کہیں ٻئے ملک دا سربراہ پاکستان دا دورہ کریندے تاں پی ٹی آئی دی طرفوں احتجاج دا اعلان کر ݙتا ویندے۔ ہݨ وی انھاں لانگ مارچ دی کال ݙتی اے۔انھاں آکھیا جو پاکستان دی ترقی تے عالمی سطح تے عزت اچ ودھارا پی ٹی آئی کوں ہضم نی تھیندا پیا، اے ہراہم موقعے تے احتجاج دا اعلان کر ݙیندن۔ عطاء اللہ تارڑ آکھیا جو اے ثابت تھی چکیے جو پی ٹی آئی دے احتجاجاں دے پچھوں مذموم مقاصد ہن جنھاں دا مقصد اسلحے نال لیس تھی تے آوݨ، فائرنگ کرݨ، امن تے امان کوں تباہ کرݨ تے ملک کوں ضیان پڄاوݨ اے جیں دا اڄ پوری دنیا مشاہدہ کیتے۔ انھاں آکھیا جو انشاء اللہ پاکستان ترقی دا سفر جاری رکھیسی، ملکی قیادت ترقی تے خوشحالی کیتے ݙینھ رات کوشاں اے۔ پاکستان تے پاکستانی عوام کوں ہر محاذ تے کامیابی حاصل تھیسی تے پاکستان دے دشمناں کوں ناکامی دا سامنا کرݨا پوسی