وفاقی وزیرِ صحت مصطفیٰ کمال نال ترکیہ دے اعلیٰ سطحی تکنیکی وفد دی ملاقات

اسلام آباد۔ 11 اگست (اے پی پی) وفاقی وزیرِ صحت مصطفیٰ کمال نال ترکیہ دے اعلیٰ سطحی تکنیکی وفد ملاقات کیتی۔ ملاقات اچ پاکستان تے ترکیہ وچال شعبہِ صحت اچ تکنیکی تعاون کوں مزید ودھاوݨ تے سانجھے تعاون دے نویں موقع ڳولݨ تے اتفاق کیتا ڳیا۔ترکیہ دے تکنیکی وفد دے دورہِ پاکستان دا مقصد ملک اچ صحت دے شعبے اچ تعاون دے نویں امکانات دا جائزہ گھنݨ اے۔ وفد پاکستان اچ ویکسین دی مقامی پیداوار دیاں صلاحیتاں تے امکانات دا وی جائزہ گھنسی جݙاں جو صحت دے شعبے اچ موجود تجربیں، صلاحیتاں تے ٹیکنالوجی کوں مزید بہتر بݨاوݨ کیتے تعاون دے نویں موقع ڳولیے ویسن ۔وفاقی وزیرِ صحت مصطفیٰ کمال ترکیہ دے وفد دا خیرمقدم کریندیں آکھیا جو پاکستان تے ترکیہ وچال برادرانہ تعلقات پراݨی تے مضبوط بنیاداں تے قائم ہن۔ انھاں آکھیا جو پاکستان شعبہِ صحت اچ ترکیہ دے نال تعاون کوں مزید وسعت ݙیوݨ کوں خصوصی اہمیت ݙیندے، پاکستان صحت دے شعبے اچ خود انحصاری تے نظام دی پائیداری دے وسیع ایجنڈے تے عمل پیرا اے۔مصطفیٰ کمال آکھیا جو پاکستان اچ ویکسین دی مقامی سطح تے تیاری دے حوالے نال موثر پیش رفت جاری اے، پاکستان پہلی واری نیشنل ویکسین پالیسی تشکیل ݙتی اے۔ وفاقی وزیرِ صحت ݙسایا جو حکومتِ پاکستان شہریاں کوں 13 قسماں دیاں ویکسینز مفت ݙیندی پئی اے تاں جو انھاں اچوں کوئی وی ویکسین ملک اچ تیار نی تھیندی تے ساری ویکسیناں ٻاہرلے ملک توں درآمد کیتیاں ویندن ۔انھاں آکھیا جو حکومتِ پاکستان عالمی اداریں دے تعاون نال اے ویکسیناں درآمد کریندی اے جیں دی 51 فیصد لاڳت پاکستان خود برداشت کریندے جݙاں جو 49 فیصد لاڳت بین الاقوامی ادارے برداشت کریندن۔ انھاں آکھیا جو 2030ء تئیں ٻاہرلی معاونت مکمل طور تے ختم تھی ویسی جیں دے بعد پاکستان کوں ویکسین دی مکمل لاگت خود برداشت کرݨی پوسی۔ ویکسین دی درآمد تے سالانہ تقریباً 1.2 ارب امریکی ڈالر خرچ تھیوݨ دا تخمینہ اے، ایں کیتے مقامی سطح تے ویکسین دی تیاری دا بندوبست ناگزیر تھی چکیے۔وفاقی وزیر ݙسایا جو انڈونیشیا دی بائیو فارما کمپنی دے نال ویکسین دی مقامی سطح تے تیاری کیتے معاہدے کیتے ڳئن۔ انھاں مزید ݙسایا جو ڈریپ اچ 90 فیصد ڈیجیٹائزیشن دا عمل مکمل کر ڳھدا ڳئے جݙاں جو اپریل 2027ء تئیں ڈریپ دے ڈبلیو ایچ او لیول تھری دے حصول دی توقع اے۔مصطفیٰ کمال آکھیا جو پاکستان اچ ایں ویلھے کہیں وی مریض دا یونیورسل میڈیکل ریکارڈ موجود کائنی ۔ حکومت ایجھا منصوبہ شروع کریندی پئی اے جیں دے تحت ہر شہری دا شناختی کارڈ ہی ایں دا میڈیکل ریکارڈ نمبر ہوسی جیں نال شہریاں دے طبی ریکارڈ کوں ہک مربوط نظام دے تحت محفوظ تے قابلِ رسائی بݨاوݨ اچ مدد ملسی۔انھاں آکھیا جو پاکستان تے ترکیہ وچال شعبہِ صحت اچ تعاون کوں مزید وسعت ݙیوݨ ݙوہیں ملکاں دے عوام کیتے صحت دیاں بہتر سہولتاں ݙیوݨ تے شعبہِ صحت اچ خود انحصاری دے ودھارے اچ ہم کردار ادا کریسی۔