پاکستان دی ترقی سارے مذہب نال تعلق رکھݨ آلے شہریاں دیاں خدمات نال مزید مستحکم تھیندی اے، آصفہ بھٹو زرداری

اسلام آباد۔ 11 اگست (اے پی پی) خاتونِ اول تے رکنِ قومی اسمبلی بی بی آصفہ بھٹو زرداری اقلیتاں دے قومی ݙینھ دے موقع تے پاکستان دی ساری اقلیتی برادریاں کوں دلی مبارخ ݙیندے آکھیےجو پاکستان دی ترقی تے خوشحالی اچ سارے مذہب نال تعلق رکھݨ آلے شہریاں دیاں خدمات تے کردار قابلِ قدر ہن۔اقلیتاں دے قومی ݙینھ دے موقع تے اپݨے پیغام اچ انھاں آکھیا جو اے ݙینھ ملک کیتے اقلیتی برادری دیاں ودھ ساری خدمات تے کردار کوں تسلیم کرݨ تے ایں عزم دی تجدید دا موقع اے جیڑھا ہر شہری قومی برادری دا مساوی رکن اے۔خاتونِ اول آکھیا جو اقلیتی برادریاں نال تعلق رکھݨ آلے لوکاں تعلیم، صحت، قانون، عوامی خدمت، کاروبار، مسلح افواج، فنون، کھِیݙاں تے ٻئے شعبیں اچ ملک دی خدمت کیتی اے، انھاں دیاں کامیابیاں پاکستان دی ترقی تے خوشحالی دی داستان دا اہم حصہ ہن۔انھاں آکھیا جو مساوات دا عملی اظہار ہر شہری کوں حاصل حقوق تے موقع اچ ہووݨا چاہیدے، قانون کوں سارے شہریاں کوں ھکو سواں تحفظ ݙیوݨا چاہیدے تے ہر پاکستانی کوں مذہب دی بنیاد تے کہیں امتیاز دے بغیر ملک دی سماجی، معاشی تے شہری زندگی اچ بھرپور حصہ گھنݨ دے ھکو سویں موقع ملݨے چاہیدن ۔آصفہ بھٹو زرداری آکھیا جو نوجواناں تے تریمتاں دا زیادہ جامع تے خوشحال پاکستان دی تعمیر اچ خصوصی کردار اے۔ اساکوں یقینی بݨاوݨا چاہیدے جو اقلیتی برادریاں نال تعلق رکھݨ آلے نوجواناں کوں تعلیم دے حصول، اپݨی صلاحیتاں نکھارݨ تے ملک دے مستقبل اچ مؤثر کردار ادا کرݨ دے مساوی موقع میسر ہوون۔ انھاں آکھیا جو اقلیتی تریمتاں کوں وی تعلیم، روزگار تے عوامی زندگی اچ بھرپور شرکت تے اپݨی صلاحیتاں کوں بروئے کار گھن آوݨ دے ھکو سویں موقع ݙتے ونڄݨے چاہیدن۔خاتونِ اول آکھیا جو سارے اداریں تے معاشرے دے سارے طبقیں دی ذمہ واری اے جو مساوات تے انصاف دے اصولاں کوں برقرار رکھیا ونڄے، ہر شہری دے نال منصفانہ سلوک یقینی بݨایا ونڄے تے ایں کوں ملک دی ترقی اچ اپݨا کردار ادا کرݨ دا موقع ݙتا ونڄے۔انھاں خانداناں، تعلیمی اداریں، برادریاں تے عوامی اداریں تے زور ݙتا جو او شہریاں وچال احترام، باہمی سمجھ ٻُجھ تے مساوی سلوک کوں ودھارا ݙیون۔ انھاں دا آکھݨ ہئی جو اڄ نوجواناں کوں جو اقدار سکھائیاں ویسن،اوہے مستقبل اچ انھاں دے تعمیر کیتے ڳئے پاکستان دی صورت آسن۔آصفہ بھٹو زرداری اقلیتی برادریاں دیاں خدمات تے کردار کوں خراجِ تحسین پیش کریندیں انھاں دی مسلسل ترقی، خوشحالی تے فلاح و بہبود کیتے نیک خواہشات دا اظہار کیتا۔ انھاں دعا کیتی جو پاکستان اپݨے سارے شہریاں کیتے مساوات، احترام تے ھکو سویں موقع نال مسلسل ترقی دے پاسے ٹردا رہے۔