اسلام آباد۔ 12 اگست (اے پی پی) نائب وزیرِ اعظم اتے وزیرِ خارجہ سینیٹر محمد اسحاق ڈار بحیرہِ احمر اچ تجارتی جہاز تے حملے تے تشویش دا اظہار کیتے۔ سماجی رابطہ دے پلیٹ فارم ایکس تے بدھ دے ݙینھ جاری بیان دے مطابق نائب وزیرِ اعظم آکھیا جو میکوں بحیرہِ احمر اچ ہک تجارتی جہاز تے حملے دے افسوسناک واقعے دی اطلاع تے تشویش اے۔ انھاں آکھیا جو ہݨ تئیں …
نائب وزیرِ اعظم اسحاق ڈار دا بحیرہِ احمر اچ تجارتی جہاز تے حملے تے تشویش
اسلام آباد۔ 12 اگست (اے پی پی) نائب وزیرِ اعظم اتے وزیرِ خارجہ سینیٹر محمد اسحاق ڈار بحیرہِ احمر اچ تجارتی جہاز تے حملے تے تشویش دا اظہار کیتے۔ سماجی رابطہ دے پلیٹ فارم ایکس تے بدھ دے ݙینھ جاری بیان دے مطابق نائب وزیرِ اعظم آکھیا جو میکوں بحیرہِ احمر اچ ہک تجارتی جہاز تے حملے دے افسوسناک واقعے دی اطلاع تے تشویش اے۔ انھاں آکھیا جو ہݨ تئیں دستیاب معلومات دے مطابق ایں واقعے اچ ترائے پاکستانی شہری جاں بحق تے ہک زخمی تھیے۔ انھاں آکھیا جو اساں سوگوار خانداناں نال دلی تعزیت دا اظہار کریندوں۔ نائب وزیرِ اعظم آکھیا جو پاکستان ہک غیر جنگی تجارتی جہاز تے حوثیاں دے حملے دی سخت مذمت کریندے، ایں طرح دے حملے بے گناہ انسانی جاناں کوں خطرے اچ سٹیندن، بین الاقوامی قانون دی خلاف ورزی تے بحیرہِ احمر اچ جہاز رانی دی آزادی، بحری سلامتی تے تجارتی جہاز رانی دے تحفظ کیتے سنگین خطرہ ہن۔نائب وزیرِ اعظم تے وزیرِ خارجہ سینیٹر محمد اسحاق ڈار آکھیا جو اساں واقعے دی مزید تفصیلات تے ایں دے پسِ پردہ حالات معلوم کرݨ کیتے متعلقہ سعودی حکام تے یمن دی بین الاقوامی سطح تے تسلیم شدہ حکومت نال رابطے اچ ہیسے۔ نائب وزیرِ اعظم آکھیا جو میں ریاض اچ پاکستانی سفارت خانے کوں ہدایت کیتی اے جو او فوری طور تے متعلقہ حکام دے نال رابطہ کرے اتے جاں بحق پاکستانی شہریاں دی میتاں دی واپسی تے وطن منتقلی کیتے تمام ضروری اقدامات موثر انداز اچ اڳوں ودھاوے جڈانجو زخمی پاکستانی شہری کوں ہر ممکن مدد فراہم کرݨ کیتے وی اقدامات کیتے ونڄݨ۔
