نینگر پاکستان دا ساریں توں قیمتی اثاثہ تے ساݙی معیشت دی اصل طاقت ہن، وفاقی وزیر آئی ٹی و ٹیلی کمیونیکیشن دا نینگراں دے عالمی ݙینھ تے پیغام

اسلام آباد۔ 12 اگست (اے پی پی) وفاقی وزیرآئی ٹی و ٹیلی کمیونیکیشن شزا فاطمہ خواجہ آکھیے جو نوجوان پاکستان دا ساریں توں قیمتی اثاثہ تے ساݙی معیشت دی اصل طاقت ہن، حکومت وزیرِاعظم محمد شہباز شریف دے وژن موجب نوجواناں کوں ڈیجیٹل دور دے تقاضیں نال ہم آہنگ کرݨ تے انھاں کوں بااختیار بݨاوݨ کیتے اقدامات کریندی پئی اے۔نوجواناں دے عالمی ݙینھ دے موقع تے اپݨے پیغام اچ انھاں آکھیا جو آئی ٹی دے شعبے اچ نوجواناں کیتے روزگار، کاروبار تے ترقی دے بے شمار نویں موقع پیدا کیتے ویندے پئن جݙاں جو حکومت ملک بھر نوجواناں کوں جدید ڈیجیٹل ہنر تے فری لانسنگ دی تربیت ݙیندی پئی اے۔وفاقی وزیر آکھیا جو سمارٹ فونز، انٹرنیٹ تئیں رسائی تے ڈیجیٹل مہارتاں ݙیوݨ ذریعے نوجواناں دے روشن مستقبل دی بنیاد رکھی ویندی پئی اے۔ مصنوعی ذہانت، سائبر سکیورٹی تے سافٹ ویئر ڈیولپمنٹ جہیں جدید شعبیں اچ نوجواناں دی شمولیت حکومت دی اولین ترجیحات اچ شامل اے۔شزا فاطمہ خواجہ آکھیا جو آئی ٹی پارکس تے ڈیجیٹل ہبز دا قیام نوجواناں کوں روزگار، کاروبار تے جدت دے شاندار موقع ݙیسی، حکومت نوجواناں کوں جدید ٹیکنالوجی نال روشناس کراوݨ تے انھاں کوں عالمی ڈیجیٹل معیشت دا موثر حصہ بݨاوݨ کیتے پرعزم اے۔ انھاں آکھیا جو پاکستان دا نوجوان صرف مستقبل دا معمار نی بلکہ ملک اچ جاری ڈیجیٹل انقلاب دا فعال شراکت دار وی اے، حکومت نوجواناں دی صلاحیتیاں کوں بروئے کار گھن آتے پاکستان کوں ڈیجیٹل معیشت دا تکڑا مرکز بݨاوݨ کیتے سارے ممکنہ اقدامات کریندی پئی اے