راولپنڈی اچ فورسز تے حملہ پی ٹی آئی دے اشتعال انگیز بیانیے تے مسلسل منفی تربیت دا نتیجہ اے، طلال چوہدری

اسلام آباد۔ 12 اگست (اے پی پی) وزیرِمملکت داخلہ طلال چوہدری آکھیے جو راولپنڈی دے مال روڈ تے سکیورٹی فورسز تے حملہ کوئی یکدم یا انفرادی عمل کائنی بلکہ پاکستان تحریکِ انصاف (پی ٹی آئی) دے پاسوں سالہا سال توں کھنڈائی ونڄݨ آلی نفرت، اشتعال انگیزی تے اداریں دے خلاف تربیت دا شاخسانہ اے۔ میڈیا نال ڳالھ کریندے وزیرِ مملکت آکھیا جو گزریل ݙینھ مال روڈ راولپنڈی تے ہک سیاسی کارکن سکیورٹی فورسز تے فائرنگ کرتے انھاں دی جان گھنݨ دی کوشش کیتی جیندے تے سکیورٹی فورسز اپݨے دفاع (سیلف ڈیفنس) اچ جوابی فائرنگ کیتی تے او حملہ آور جاں بحق تھی ڳیا۔طلال چوہدری پی ٹی آئی دے ایں موقف کوں سختی نال رد کرݙتا جو کارکن دا ذہنی توازن ٹھیک کائناں ہئی یا ایں عمل نال پارٹی دا کوئی تعلق کائںی۔ انھاں سوال چاتا جے اوندا ذہنی توازن خراب ہئی تاں او اپݨے گھرآلیں، دوستاں یا اپݨی پارٹی دے لیڈراں تے حملہ کیوں نی کیتا؟ او صرف اوہی سکیورٹی فورس کوں نشانہ بݨایا جیندے خلاف پی ٹی آئی دی قیادت تے انھاں دے سوشل میڈیا دی پاسوں مسلسل زہر گھولیا ویندے۔انھاں آکھیا جو مذکورہ کارکن دے اپݨے سوشل میڈیا اکاؤنٹس تے ایجھیاں ٻہوں نقلی ویڈیو تے پوسٹاں موجود ہن جنھاں اچ او ماسک پا تے پولیس تے پتھراؤ، غلولیاں چلیندیں تے حملے کریندیں ݙکھائی ݙیندے۔ جݙݨ اے کارکن پی ٹی آئی دی ہر تحریک، جلسے تے کے پی ہاؤس اسلام آباد اچ رہنماواں دے نال پیش پیش ریہا تے اوں کنے پارٹی دا جھنڈا وی موجود ہئی، تاں ہݨ پارٹی قیادت اوں توں بری الذمہ نی تھی سڳدی۔وزیرِ مملکت دا آکھݨ ہئی جو 9 مئی، 26 نومبر تے ہݨ راولپنڈی دا واقعہ، اے سارے پی ٹی آئی دے بانی، اوندی قیادت دیاں تقریراں تے ٻاہرلے ملک ٻیٹھے یوٹیوبرز تے سوشل میڈیا انفلوئنسرز دے پاسوں نوجواناں دے ذہناں اچ بھری ونڄݨ آلی نفرت دا نتیجہ ہن۔ انھاں واضح کیتا جو سکیورٹی فورسز دے جوان کہیں سیاسی جماعت دے نی بلکہ پورے پاکستان دے سپاہی ہن جیڑھے ملک اچ امن و امان کیتے اپݨی ڈیوٹی ݙیندے پئن۔طلال چوہدری واضح کیتا جو ایں واقعے دی شفاف تے غیر جانبدارانہ تحقیقات جاری ہن تے سارے شواہد وقتی سامݨے گھن آئے ویسن۔ ریاست تے ریاستی ادارے ملک کوں غیر مستحکم کرݨ یا اداریں تے حملیں دی اصلوں اجازت نہ ݙیسن تے دنگا گردی تے جلاؤ گھیراؤ کرݨ آلیں نال سختی نال نبڑیا ویسے۔