وزیر اعظم پہلی نیشنل یوتھ ایمپلائمنٹ پالیسی، سکل ایمبیسڈر پروگرام اتے نیشنل پاور سیکٹر انوویشن پروگرام دا اجراء کر ݙتے

اسلام آباد۔ 12 اگست (اے پی پی)وزیرِ اعظم محمد شہباز شریف پہلی نیشنل یوتھ ایمپلائمنٹ پالیسی، نوجواناں کوں ہنر سکھݨ دے نویں موقعے ݙیوݨ اتے انھاں کوں مستقبل دی جاب مارکیٹ کیتے تیار کرݨ لو سکل ایمبیسڈر پروگرام اتے نیشنل پاور سیکٹر انوویشن پروگرام دا اجراء کریندے آکھیے جو نوجوان نسل قوم دی امید ہین، نوجواناں کوں ترقی دے سفر اچ پچھو تے نا رہݨ ݙیسوں۔ انہاں اے ڳالھ اسلام آباد اچ نوجواناں دے عالمی ݙینھ سانڳے تھیوݨ آلی تقریب نال خطاب اچ آکھی۔ وزیرِ اعظم آکھیا جو ساݙی پوری کوشش اے جو تعلیم دے میدان اچ اساں ݙوجھے ممالک دے مقابلے اچ پچھو نا رہووں، میں بطور خادمِ پنجاب تعلیم کیتے ودھ اقدامات کیتن، پنجاب اتے باقی صوبیاں اچ لکھاں کروڑاں ٻال اتے ٻالڑیاں ݙاݙھے ذہین اتے قابل ہین، ڄیکوں ودھ مواقع ملین تاں اور ٻہوں اڳو نکل ویسن اتے ملک دا ناں وی اچا کریسن، ودھ وسائل آلا طبقے کوں ہر قسم دی تعلیم دے موقعے ملدن ٻھل انھاں دے مقابلے اچ ملک اچ لکھاں والدین کوں ٻالاں کیتے عام تعلیم دے موقعے نئیں ملدے پئے، اے او تضاد اے جیندے نال پاکستان اچ تعلیم دے میدان اچ اساں ٻہوں پچھو رہ ڳئے ہیں، ول اساں دانش سکولاں دا منݙھ ٻدھیے جتھاں غریباں دے ٻال وی بہترین تعلیم حاصل کریندے پئن۔ پاکستان بابائے قوم قائدِ اعظم محمد علی جناح دی عظیم تحریک نال ٻݨیا ہا جیندے کیتے لکھاں مسلماناں اپݨے خون دا نذرانہ پیش کیتا، انھاں اپݨا سارا ترکہ اتے ہر شے اتھائیں چھوڑ تے ایں خواب کوں اکھیں اچ وسایا جیڑھا پاکستان اچ تعلیم، صحت اتے محنت دی تݙ تے ترقی دے موقعیاں توں معاشرے اچ ڄاہ ٻݨاوݨ ہا۔ وزیرِ اعظم آکھیا جو قیامِ پاکستان دا بنیادی مقصد ہک فلاحی ریاست دا قیام ہئی جتھاں سبھ کوں مساوی حقوق اتے ترقی دے موقعے حاصل ہوون، ٻھل میں سمجھداں جو اے منزل حالی وی پریں اے۔ وزیرِ اعظم آکھیا جو دانش سکول پورے ملک اچ ٻݨدے پئن جیندا معیار ایچی سن کالج توں کݙاھو ڳھٹ نئیں، دانش سکول اچ تعلیم حاصل کرݨ والے ہک محنت کش دے ہونہار ٻال محنت کر تے اپݨے والدین تے استاداں دا ناں اچا کیتے، ڄیکر اساں اڳو تے ونڄݨے تاں تعلیم دے میدان اچ ہکو سویں موقع ݙیوݨے ہوسن، اڄ دا دور فنی تعلیم، آئی ٹی اتے اے آئی دا اے، ڄیکر اساں ایں جدید علوم کوں اپݨے سفر اچ نا رلایا تاں ول اساں ترقی دی دروک اچ ٻہوں پچھوں رہ ویسوں۔ وزیرِ اعظم آکھیا جو قوم کوں نوجوان نسل توں ݙاݙھیاں امیداں ہین، انھاں کوں مختلف ہنرمندی دے موقعے ݙیوݨ دی لوڑھ اے، اساں نینگراں دی تعلیم و ترقی کیتے بجٹ اچ وݙی رقم رکھی اے، پچھلے سال چارے صوبیاں توں میرٹ اتے سرکاری خرچ تے ہک ہزار زرعی گریجویٹس کوں تربیت کیتے چین بھجوایا ڳیا ہئی، ہک ہزار ٻال تے ٻالڑیاں ایں سال ٻئے بھجیسوں، میٹرک اتے ایف اے، ایف ایس سی دے امتحانات اچ چنڳی کارکردگی والے طلبہ و طالبات کوں ایں سال آئی ٹی اتے اے آئی دی تعلیم کیتے چین بھجیسوں، سلیکشن صرف میرٹ تے ہوسی، سارے اخراجات حکومت برداشت کریسی۔ وزیرِ اعظم آکھیا جو اسلام آباد اچ پاکستان دی بہترین دانش یونیورسٹی ٻݨدی پئی اے اتے اڳلے سال کلاسز شروع تھی ویسن، اے مکمل طور تے ٹیک فوکسڈ یونیورسٹی ہوسی جتھاں فنی و پیشہ ورانہ تعلیم ݙتی ویسی۔ وزیرِ اعظم آکھیا جو محنتی، ہونہار تے لائق طلبہ و طالبات اچ 7 لکھ توں زائد لیپ ٹاپ ونݙین، ایں سال ݙھائی لکھ ٻعے کروم بکس ملک دے ہونہار طلبہ و طالبات کوں ݙتے ویسن، نینگراں کوں اعلیٰ تعلیم، بہترین مواقع اتے باعزت و باوقار روزگار ݙیواوݨ میݙا مشن اے۔ ایں موقع تے وزیرِ اعظم پہلی نیشنل یوتھ ایمپلائمنٹ پالیسی دا باضابطہ اعلان کیتے، پالیسی دے تحت ساری لیبر فورس اچ خواتین کیتے 35 فیصد کوٹہ لازمی ہوسی، نوجواناں کوں ملازمتاں دے بجائے اپݨا کاروبار شروع کرݨ کیتے سہولتاں ݙتیاں ویسن، ہر سال سٹارٹ اپس کیتے 10 فیصد کوٹہ مختص ہوسی۔ وزیرِ اعظم آکھیا جو ساݙیاں مُکھیں دشمناں کیتے ہین، اے غربت اتے بے روزگاری مکاوݨ کیتے ہین۔ تقریب نال وفاقی وزیر پاور ڈویژن سردار اویس لغاری اتے وزیرِ اعظم یوتھ پروگرام دے چیئرمین رانا مشہود احمد خاں وی خطاب کیتے۔ تقریب اچ 2047ء دے پاکستان دے وژن بارے ہک ویڈیو وی ݙکھائی ڳئی، وزارتِ اطلاعات و نشریات دا نوجواناں کیتے ٻݨایا ڳیا خصوصی ملی نغمہ پیش کیتا ڳیا۔ وزیرِ اعظم نیشنل ایمپلائمنٹ پالیسی دی کور ٹاسک فورس دے ارکان اچ اسناد اتے دانش سکول دے پوزیشن ہولڈرز اتے مختلف شعبیاں اچ نمایاں خدمات انجام ݙیوݨ والے نوجواناں کوں ایوارڈز ݙتے۔ وزیرِ اعظم دانش سکول فاضل پور اچ زیرِ تعلیم ہونہار طالب علم محمد قاسم دی بورڈ آف انٹرمیڈیٹ اینڈ سیکنڈری ایجوکیشن لاہور دے تحت ایس ایس سی پارٹ ٹو دے امتحان اچ سائنس گروپ اچ پہلی، اتے مجموعی طور تے ݙوجھی پوزیشن حاصل کرݨ تے حوصلہ افزائی کیتی اتے شاباش ݙتی۔