علاقائی کشیدگی دے تسلسل اچ اسلام آباد سارے متعلقہ فریقاں نال مسلسل رابطے اچ اے، ترجمان دفترِ خارجہ طاہر حسین اندرابی دی پریس بریفنگ

اسلام آباد۔ 12 اگست (اے پی پی)پاکستان خلیج اتے مشرقِ وسطیٰ اچ امن و استحکام دے ودھارے کیتے مذاکرات اتے سفارت کاری دا عزم دوہریندے آکھیے جو علاقائی کشیدگی دے تسلسل اچ اسلام آباد سارے متعلقہ فریقاں نال مسلسل رابطے اچ اے۔ دفترِ خارجہ دے ترجمان طاہر حسین اندرابی پریس بریفنگ اچ آکھیے جو پاکستان متعلقہ فریقاں کوں ولا مذاکرات دی میز تے گھن آوݨ کیتے ودھ کوششاں کریندا پئے، اسلام آباد مفاہمتی یادداشت امن اتے استحکام دی راہ ہموار کیتی اے، ڄیکر اسلام آباد مفاہمتی یادداشت تے مکمل طور تے عمل درآمد نہ وی تھیا ٻھل جݙݨ وی ’’مذاکرات دی معقولیت‘‘ کشیدگی ودھاوݨ دی منطق تے غالب آسی، فریقین ولا مذاکرات کیتے ول آسن، پاکستان براہِ راست اتے بالواسطہ ذریعے استعمال کریندے امن خراب کرݨ والے عناصر دے اثرات کوں گھٹ کرݨ اتے زیرِ التواء معاملیاں تے تعمیری مذاکرات سوکھے ٻݨاوݨ دا سلسلہ جاری رکھسی۔ انہاں مکہ المکرمہ سربراہی اجلاس اچ طے پاوݨ والے مکہ مشترکہ دفاعی معاہدے کوں ترائے ممالک وچال دیرینہ برادرانہ تعلقات اتے تزویراتی رابطیاں دا ہک فطری قدم قرار ݙیندے آکھیا جو اے معاہدہ اجتماعی سلامتی مضبوط ٻݨاوݨ دے نال خطے اتے ایں توں ٻاہرو امن، سلامتی اتے استحکام ودھاوݨ کیتے ترائے ملکاں دے مشترکہ عزم دی عکاسی کریندے۔ ترجمان دے مطابق اے معاہدہ مکمل طور تے دفاعی نوعیت دا اے اتے ایںدے ذریعے ترائے ممالک کوں خطرات تے سلامتی دے چیلنجز دا مقابلہ کرݨ کیتے متحدہ کوششاں کرݨ اچ مدد ملسی۔ مکہ معاہدے تے دستخط توں پہلے پارلیمنٹ اتے ٻئے متعلقہ فریقاں کوں اعتماد اچ گھدا ڳیا ہئی۔ ترجمان ایں تاثر کوں واضح طور تے مسترد کر ݙتا جو اے معاہدہ داخلی طریقہ کار دی پیروی کیتے بغیر طے تھیا۔ انھاں نشاندہی کیتی جو وزیرِ اعظم محمد شہباز شریف قومی اسمبلی اچ قائدِ ایوان تے خود معاہدے دے ہک دستخط کنندہ ہن ڄݙاں جو نائب وزیرِ اعظم و وزیرِ خارجہ سینیٹر اسحاق ڈار جیڑھے ایوانِ بالا دے معزز رکن ہین، وی ایں موقع تے موجود ہن، معاہدے تے عوام دیاں خواہشاں دے مطابق دستخط کیتے ڳئن اتے وزیرِ اعظم، نائب وزیرِ اعظم اتے چیف آف ڈیفنس فورسز فیلڈ مارشل سید عاصم منیر ایں معاملے تے مکمل طور تے متفق ہین، کہیں وی متعلقہ فریق کوں اعتماد اچ نہ گھنݨ دا سوال ہی پیدا نئیں تھیندا۔ ترجمان آکھیا جو پاکستان علاقائی تے بین الاقوامی شراکت داراں دے نال سفارتی رابطیاں اچ مزید تیزی پیدا کیتی اے، محمد اسحاق ڈار سعودی عرب، ایران تے کویت دے وزرائے خارجہ سلامتی معاملیاں تے نال انڄھ انڄھ الائے، وزیرِ داخلہ محسن نقوی وی اعلیٰ ایرانی حکام نال ملاقاتاں کیتن، او ہݨ وی ایران اچ ہین جتھاں ݙو طرفہ تعلقات، سکیورٹی امور تے علاقائی صورتحال تے ڳالھ مہاڑ متوقع اے۔ ترجمان بحیرہِ احمر اچ ہک تجارتی بحری جہاز تے حملے دی شدید مذمت کریندے آکھیا جو حکومت کوں دستیاب معلومات دے مطابق ترائے پاکستانی شہری جاں بحق اتے ہک زخمی تھئے، پاکستان مزید تفصیلات کیتے سعودی حکام اتے بین الاقوامی سطح تے تسلیم شدہ یمنی حکومت نال رابطے اچ اے، جاں بحق پاکستانیاں دیاں میتاں واپس گھن آوݨ اتے وطن منتقل کرݨ سودھا زخمی کوں طبی امداد کیتے وی کوششاں جاری ہن۔ انھاں آکھیا جو پاکستان بین الاقوامی قانون دے تحت بین الاقوامی آبی گزرگاہواں اچ جہاز رانی دی آزادی تے بحری سلامتی دی حمایت کریندے تے سعودی عرب ولوں اعلان کردہ بحری اتحاد دا دستخط کنندہ اے۔ پاکستان عالمی سپلائی چینز تے بحری آمد و رفت دے تحفظ کیتے اتحاد دے اعلامیے تے عمل درآمد اچ سعودی عرب تے ٻئے اتحادی شراکت داراں دی مدد کیتے تیار اے۔