بلوچستان دے ضلع سوراب اچ بارودی مواد دی تیاری ویلھے دھماکا اتے سکیورٹی فورسز دی کارروائی اچ 18 دہشتگرد ہلاک، ترائے شہری شہید

راولپنڈی۔ 12 اگست (اے پی پی): بلوچستان دے ضلع سوراب اچ دہشت گرداں دی ڳاݙی اچ دیسی ساختہ بم لاوݨ ویلھے دھماکے پاروں فتنۃ الہندوستان دے 8 دہشت گرد ہلاک ڄݙاں جو کئی زخمی تھی ڳئن، دھماکے اتے اتھاں ذخیرہ کیتے ڳئے ٻئے بارودی مواد دے پھٹݨ نال قریبی علاقے دے ترائے شہری وی جاں بحق تھئن۔ پاک فوج دے شعبہ تعلقات عامہ (آئی ایس پی آر) دے مطابق واقعے دے فوری بعد سکیورٹی فورسز اتے بلوچستان پولیس موقع تے پڄ تے مشترکہ کلیئرنس آپریشن شروع کیتے تاں جو واقعے اچ ملوث دہشت گرداں اتے انھاں دے سہولت کاراں دا پتا لایا ونڄے۔ آپریشن اچ سکیورٹی فورسز فرار تھیوݨ والے دہشت گرداں کوں ڳول تے موثر کارروائی کیتی اتے ٻئے 10 دہشتگرد ہلاک کر ݙتن۔ آئی ایس پی آر دے مطابق انھاں واقعات اچ ہݨ تئیں فتنۃ الہندوستان دے مجموعی طور تے 18 دہشت گرد ہلاک تھی چکین، فائرنگ دے شدید تبادلے اچ پاک فوج دے ݙو بہادر جوان وی زخمی تھئن۔ علاقے اچ ٻئے بچݨ والے دہشت گرداں دے خاتمے اتے علاقے کوں مکمل طور تے محفوظ ٻݨاوݨ کیتے کلیئرنس اتے سرچ آپریشن جاری اے۔آئی ایس پی آر آکھیا اے جو قومی ایکشن پلان دے تحت وفاقی ایپکس کمیٹی دی منظوری نال عزمِ استحکام دے وژن دے مطابق سکیورٹی فورسز تے قانون نافذ کرݨ والے ادارے ملک توں غیر ملکی سرپرستی تے حمایت یافتہ دہشت گردی دے مکمل خاتمے کیتے کارروائیاں بھرپور انداز اچ جاری رکھسن۔