بی آئی ایس پی ہیڈکوارٹرز اچ پاکستان دے 79ویں یومِ آزادی دے موقع تے پروقار تقریب

اسلام آباد۔ 13 اگست (اے پی پی) بینظیرانکم سپورٹ پروگرام ہیڈکوارٹرز اچ پاکستان دے 79ویں یومِ آزادی دے موقع تے پروقار تقریب دا انعقاد کیتا ڳیا۔ تقریب اچ چیئرپرسن بی آئی ایس پی سینیٹر روبینہ خالد، بی آئی ایس پی دے افسراں، ملازماں، بی آئی ایس پی نال منسلک خانداناں تے بینظیر تعلیمی وظائف پروگرام توں مستفید تھیوݨ آلے ٻالاں وݙی تعداد اچ شرکت کیتی۔تقریب دا آغاز چیئرپرسن بی آئی ایس پی سینیٹر روبینہ خالد بی آئی ایس پی ہیڈکوارٹرز دے احاطے اچ ٻوٹا لا تے ’’سرسبز پاکستان، بینظیر پاکستان‘‘ شجرکاری مہم دے آغاز نال کیتا۔ چیئرپرسن بی آئی ایس پی سینیٹر روبینہ خالد بینظیر تعلیمی وظائف پروگرام توں مستفید تھیوݨ آلے ٻالاں دے رلے یومِ آزادی دا کیک کٹیا تے ایں موقع تے ٻالاں اچ تحفے وی ونڈیے ڳئن۔تقریب دے دوران سوات اچ گزریل سال چھل دے دوران خدمات انجام ݙیوݨ آلے ڈاکٹراں، پیرامیڈیکل عملے تے رضاکاراں کوں انھاں دی بے لوث خدمات دے اعتراف اچ تعریفی سنداں نال نوازیا ڳیا۔ سینیٹر روبینہ خالد آکھیا جواوکھے ویلھے انسانیت دی خدمت کرݨ آلے اے لوک پوری قوم دے ہیرو ہن۔ انھاں آکھیا جو پاکستان اچ کہیں شئے دی کمی کائںی، اللہ تعالیٰ ایں ملک کوں بے شمار وسائل نال نوازیے، ضرورت ایں ڳالھ دی اے جو اساں اجتماعی سوچ، خوداحتسابی تے قومی خدمت دے جذبے نال اڳوں ودھوں۔اپݨے خطاب اچ سینیٹر روبینہ خالد افواجِ پاکستان کوں خراجِ تحسین پیش کریندیں آکھیا جو وطن دے دفاع تے امن و استحکام کیتے انھاں دیاں خدمات پوری قوم کیتے باعثِ فخر ہن۔ تقریب دے اختتام تے پاکستان دی سلامتی، استحکام، ترقی تے خوشحالی کیتے خصوصی دعا وی کیتی ڳئی