قائدِاعظم دی بصیرت افروز قیادت، وݙ وݙیریں دیاں قربانیاں تے تحریکِ آزادی دے رہنماواں دے غیرمتزلزل عزم تے اللہ دے فضل نال آزاد مملکت دا خواب شرمندہِ تعبیر تھیا، وزیرِاعظم شہباز شریف

اسلام آباد۔ 14 اگست (اے پی پی) وزیرِاعظم محمد شہباز شریف ملک تے ٻاہرلے ملک رہݨ آلے سارے اہل وطن کوں دلوں یومِ آزادی دی مبارخ ݙیندیں آکھیے جو قائدِ اعظم محمد علی جناح دی مدبرانہ تے بصیرت افروز قیادت، ساݙے وݙ وݙیریں دی عظیم قربانیاں تے تحریکِ آزادی دے رہنماواں دے غیر متزلزل عزم تے اللہ تعالیٰ دے فضل و کرم نال آزاد مملکت دا خواب شرمندہِ تعبیر تھیا، پاکستان آزمائشاں دے باوجود تابناک مستقبل دے پاسے گامزن اے، ساݙے باصلاحیت نوجوان، ہنر مند افرادی قوت، بہترین پیشہ ورماہرین، جفا کش کسان تے محنت کش مزدور ملک و قوم دے تابندہ مستقبل دے ضامن ہن، حکومت گزریل ڈھائی سالاں اچ اوکھے مرحلے پار کرتے مستحکم معیشت دا ہدف حاصل کیتا، ساݙی بہادر افواج ہر اوکھ اچ دشمن دے ہر وار دے جواب اچ مادرِ وطن دے دفاع کوں ناقابلِ تسخیر ثابت کیتے، پاکستان، سعودی عرب تے ترکیہ وچال مکہ مکرمہ اچ طے پاوݨ آلا دفاعی معاہدہ خطے اچ پاکستان دے ودھدے تزویراتی کردار تے ابھردی ہوئی قوت دا مظہر اے، آؤ اپݨے قومی عزم دی تجدید کروں جو اساں یک جان تھی تے سرزمینِ پاکستان دی ترقی و خوشحالی، امن و استحکام تے سانجھی ہم آہنگی تے یگانگت کیتے بھرپور انداز اچ کم کریسوں تے متحد تھی تے ملکی سالمیت، قومی مفادات دے تحفظ تے ودھارے کیتے تعمیری کم کروں۔ وزیرِاعظم دفتر دے میڈیا ونگ توں یومِ آزادی 14 اگست 2026ء تے جاری پیغام اچ وزیرِاعظم آکھیا جو ملک دی آزادی دے 79 سال مکمل تھیوݨ دے ایں پرمسرت موقع تے سارے اہل وطن کوں دلوں مبارخ ݙینداں ، صد شکر جو اللہ تعالیٰ اساکوں مملکتِ خداداد دی صورت اچ آزادی ایجھی گرانقدر نعمت نال نوازیا، اے امر ساݙے کیتے باعثِ عزت و افتخار اے جو جدوجہدِ آزادی اچ بابائے قوم قائدِ اعظم محمد علی جناح، مفکرِ پاکستان و شاعرِ مشرق علامہ محمد اقبال تے ٻہوں سارے عظیم و بے مثل رہنما شامل ہن، اڄ اساں من حیث القوم تحریکِ آزادی دے قائدین، کارکنان تے اسلافِ ملت کوں سلام پیش کریندوں۔وزیرِاعظم آکھیا جو قائدِ اعظم محمد علی جناح دی مدبرانہ تے بصیرت افروز قیادت، ساݙے وݙ وݙیریں دیاں عظیم قربانیاں، تحریکِ آزادی دے رہنماواں دے غیر متزلزل عزم تے اللہ تعالیٰ دے بے پایاں فضل و کرم پاروں آزاد مملکت دا خواب شرمندہِ تعبیر تھیا، تحریکِ آزادی دے سارے رہنماواں دی ولولہ انگیز سیاسی جدوجہد مسلمانانِ ہند کوں آزاد وطن دے نصب العین تے متحد کیتا، ساݙے وݙیں لازوال قربانیاں، صعوبتاں تے تکلیفاں دی داستان رقم کیتی تے جدوجہدِ آزادی کامیابی نال ہمکنار تھئی۔وزیرِ اعظم آکھیا جو 14 اگست 1947ء کوں اساکوں ایجھی سرزمین میسر آئی جتھاں اساں آزاد قوم دی حیثیت نال عزت و وقار تے دین و تہذیبی اقدار موجب زندگی استوار کرسڳوں، سرزمینِ پاکستان اسلامی تعلیمات تے بابائے قوم دے نظریات دے تابع سارے شہریاں کیتے بلا تفریق رنگ و نسل مکمل آزادی دی ضمانت اے۔ آئین و قوانینِ پاکستان سارے شہریاں دے حقوق دے ضامن ہن، آزاد مملکت دی ترقی و خوشحالی دا اے سفر اللہ تعالیٰ دے فضل و کرم نال آزمائشاں دے باوجود تابناک مستقبل دے پاسے گامزن اے۔وزیرِاعظم آکھیا جو اہل وطن گزریل ساری اوکھ دے باوجود ہر شعبہِ زندگی اچ اپݨی خداداد صلاحیتاں پاروں کامیابیاں سانبھیاں، دفاعِ وطن، معیشت، صنعت و حرفت، عدلیہ، میڈیا، کھیݙ، تعلیم وہنر،علماء،دانشور، اساتذہ، سائنسدان، زراعت و کاشتکاری تے بشمول عصرِ حاضر دے جدید شعبہ جات اچ پاکستانی مرداں تے تریمتاں اپݨی کوششاں نال عزم و ہمت دے باب رقم کیتے، ساݙے باصلاحیت نوجوان، ہنر مند افرادی قوت، بہترین پیشہ ور ماہرین، جفا کش کسان تے محنت کش مزدور ملک و قوم دے تابندہ مستقبل دے ضامن ہن۔وزیراعظم آکھیا جو حکومتِ پاکستان گزریل ڈھائی سالاں اچ ٻہوں اوکھے مرحلے پار کرتے مستحکم معیشت دا ہدف حاصل کیتا تے ہݨ ترقی یافتہ معیشت دی منزل دے پاسے کامیابی نال گامزن اے، گزریل ݙو سالاں دے دوران ٻاہرلے ملک پاکستانیاں دی ترسیلاتِ زر اچ 11.3 ارب ڈالر دا ودھارا تھیا جیڑھا حکومتی پالیسیاں تے اوورسیز پاکستانیاں دے مسلسل اعتماد دا مظہر اے۔وزیرِاعظم آکھیا جو جدید انفارمیشن ٹیکنالوجی نال لیس، جدت نال آراستہ دیرپا صنعتی و زرعی ترقی، عوامی فلاح و بہبود دے منصوبے، روزگار دے موقع، عالمی معیار دا تعلیم و ہنر دا نظام ساݙی اولین ترجیحات اچ شامل ہن۔وزیرِ اعظم آکھیا جو ساݙی بہادر افواج ہر اوکھ اچ دشمن دے ہر وار دے جواب اچ مادرِ وطن دے دفاع کوں ناقابلِ تسخیر ثابت کیتا، پاکستان اپݨی جری افواج تے ماݨ کریندے، معرکہِ حق اچ مسلح افواج فیلڈ مارشل سید عاصم منیر دی قیادت اچ اتحاد، عزم تے بے مثال بہادری دا مظاہرہ کریندیں وطنِ عزیز دے دفاع تے سربلندی دی نویں تاریخ رقم کیتی۔وزیرِاعظم آکھیا جو پاکستان اپݨے دفاع تے آبی وسائل سودھے قومی مفادات دے تحفظ کیتے کہیں قربانی توں پچھوں نہ ہٹسی ، اڄ پاکستان اقوامِ عالم اچ ہک مضبوط، پرعزم، باوقار تے امن دی توانا آواز دے طور تے سنڄاتا ویندے۔ انھاں آکھیا جو خطے دی اوکھ تے چیلنجنگ علاقائی صورتحال اچ پاکستان ہک ذمہ وار تے خطے اچ استحکام دا ضامن ملک بݨ تے ابھرئے جیڑھا امن، استحکام تے علاقائی تعاون دے ودھارے اچ تعمیری کردار ادا کریندا پئے، پاکستان، سعودی عرب تے ترکیہ وچال مکہ مکرمہ اچ طے پاوݨ آلا مشترکہ دفاعی معاہدہ خطے اچ پاکستان دے ودھدے تزویراتی کردار تے ابھردی ہوئی قوت دا اہم مظہر اے۔انھاں آکھیا جو پاکستان مظلوم فلسطینی عوام تے جموں و کشمیر دے اپݨے بھیݨ تے بھراواں نال مکمل اظہارِ یکجہتی کریندے تے انھاں کیتے اپݨی غیر متزلزل اصولی حمایت دا اعادہ کریندے، جنوبی ایشیا اچ پائیدار امن دی ضمانت جموں و کشمیر دے اقوامِ متحدہ دیاں قرارداداں موجب عالمی قوانین تے کشمیریاں دی امنگاں موجب سفارتی حل اچ مضمر اے۔وزیرِاعظم آکھیا جو یومِ آزادی تے قوم اپݨے سارے شہداء کوں وی دلی خراجِ تحسین پیش کریندی اے جنھاں وطنِ عزیز کیتے اپݨی قیمتی جاناں دا نذرانہ پیش کیتا، پوری قوم بہادر افواج، قانون نافذ کرݨ آلے اداریں دے دلیر جواناں، غازیاں تے سارے شہداء دی مقروض اے جنھاں قوم دے مستقبل دی خاطر اپݨی جاناں قربان کیتیاں، آؤ اڄ دے ݙینھ اپݨے قومی عزم دی تجدید کروں جو اساں یک جان تھی تے سرزمینِ پاکستان دی ترقی و خوشحالی، امن و استحکام تے سانجھی ہم آہنگی تے یگانگت کیتے بھرپور انداز اچ کم کروں، اڄ میں پوری قوم بشمول سارے طبقات تے سیاسی جماعتاں کوں پرخلوص پیشکش کریندا ں جو آؤ متحد تھی تے ملکی سالمیت، قومی مفادات دے تحفظ تے ودھارے کیتے تعمیری کم کروں، اللہ تعالیٰ پاکستان کوں دنیا اچ عزت و وقار دی علامت بݨائے تے کامیابیاں نال مزین درخشندہ مستقبل نصیب فرماوے، آمین