یومِ آزادی دے موقعے تے اساں بانیانِ ملت دی بصیرت تے قربانیاں کوں خراجِ تحسین پیش کریندوں: شزہ فاطمہ خواجہ

اسلام آباد (اے پی پی) وفاقی وزیر برائے انفارمیشن ٹیکنالوجی تے ٹیلی کمیونیکیشن شزہ فاطمہ خواجہ اکھیا جو یومِ آزادی دے موقعے تے، میں آپݨے وطن تے دنیا بھر وچ مقیم تمام پاکستانیاں کوں مبارکباد پیش کریندی ہاں، اڄ اساں آپݨے وطن دی آزادی دی 79ویں سالگرہ منیندے پئیوں۔ وزارتِ انفارمیشن ٹیکنالوجی ولوں جاری بیان اچ وفاقی وزیر اکھیا جو اڄ دے ݙینہہ، اساں آپݨے بانیانِ ملت دی بصیرت تے قربانیاں کوں خراجِ تحسین پیش کریندوں اتے ہر اس نسل کوں سلام پیش کریندوں جو پاکستان کوں اڳوں گھن ڳئی۔ اساں وزیرِ اعظم محمد شہباز شریف تے فیلڈ مارشل سید عاصم منیر دی قیادت کوں سراہندوں جنہاں عزم، اعتماد تے اتحاد دے نال پاکستان دی رہنمائی کیتی اے۔ اساݙا عزم واضح ہے: مضبوط انفراسٹرکچر، محفوظ ڈیٹا، عالمی سطح تے مسابقتی ٹیلنٹ تے ہک جامع انوویشن ایکو سسٹم دے نال ہک ایجھا ڈیجیٹل پاکستان بݨاوݨ جو ہر شہری کیتے مواقع پیدا کرے۔ شزہ فاطمہ خواجہ آکھیا جو آؤ اساں ایں یومِ آزادی تے آپݨے ماضی دا احترام کروں، آپݨی پیشرفت کوں اڳوں ودھاؤں اتے ہک ایجھے پاکستان کیتے کم کروں جو نہ صرف مستقبل کوں اپناوے، بلکہ ایں کوں تخلیق کرے تے ایں دی قیادت کرے۔ پاکستان زندہ باد۔