وفاقی وزیرِ قانون تے انصاف اعظم نذیر تارڑ گورننس انڈیکیٹرز اچ بہتری کیتے ماہرین تے مشتمل ذیلی کمیٹی قائم کر ݙتی

اسلام آباد۔ 08 ستمبر (اے پی پی) وفاقی وزیرِ قانون تے انصاف سینیٹر اعظم نذیر تارڑ گورننس انڈیکیٹرز اچ پاکستان دی کارکردگی بہتر بݨاوݨ کیتے ماہرین تے مشتمل ذیلی کمیٹی قائم کریندیں ہوئیں ہک ہفتے اچ سفارشات تے جامع روڈ میپ پیش کرݨ دی ہدایت کر ݙتی۔ ترجمان وزارتِ قانون تے انصاف دے مطابق گورننس انڈیکیٹرز کمیٹی دا اجلاس وفاقی وزیرِ قانون سینیٹر اعظم نذیر تارڑ دی زیرِ صدارت اسلام آباد اچ تھیا ڄیندے اچ وزیرِ مملکت برائے قانون تے انصاف بیرسٹر عقیل ملک، سیکرٹری خزانہ، سیکرٹری کابینہ ڈویژن سمیت ٻئے متعلقہ وفاقی تے صوبائی حکام شرکت کیتی۔ اجلاس اچ پاکستان دی گورننس انڈیکیٹرز اچ کارکردگی بہتر بݨاوݨ کیتے جامع روڈ میپ تے غور کیتا ڳیا۔ اجلاس کوں معاشی استحکام، کریڈٹ ریٹنگز تے گورننس انڈیکیٹرز دے آپسی تعلق تے بریفنگ ݙتی ڳئی۔ بریفنگ اچ ݙسایا ڳیا جو میکرو اکنامک استحکام پاروں ݙو توں ڈھائی سالاں دے عرصے اچ پاکستان دی کریڈٹ ریٹنگ اچ بہتری آئی اے جڈانجو کریڈٹ ریٹنگز دے جائزہ اچ استعمال تھیوݨ آلا ڈیٹا عموماً ݙو سال پراݨا ہوندے جئیں پاروں موجودہ اصلاحات تے بہتری دے مکمل اثرات عالمی ریٹنگز اچ تاخیر نال ظاہر تھیندن۔ اجلاس کوں ݙسایا ڳیا جو معاشی استحکام، بہتر کریڈٹ ریٹنگ، گھٹ قرض لاگت تے مضبوط گورننس ہک ٻئے نال مربوط ہن۔ وفاقی وزیرِ قانون ہدایت کیتی جو ذیلی کمیٹی گورننس انڈیکیٹرز دے ذیلی اجزاء تے جائزہ گھنݨ دے طریقہ کار دا تفصیلی جائزہ گھنے اتے فوری، درمیانی تے طویل المدتی اقدامات دی نشاندہی کرے۔