حکومت اسلام آباد پولیس کوں جدید پولیسنگ دے تقاضیاں نال ہم آہنگ کرݨ کیتے ہر ممکن وسائل فراہم کریندی پئی اے، وزیرِ اعظم محمد شہباز شریف

اسلام آباد۔ 08 ستمبر (اے پی پی) وزیرِ اعظم محمد شہباز شریف آکھیا جو شہریاں دی جان تے مال دا تحفظ حکومت دی اولین ترجیح اے، حکومت اسلام آباد پولیس کوں جدید پولیسنگ دے تقاضیاں نال ہم آہنگ کرݨ کیتے ہر ممکن وسائل فراہم کریندی پئی اے۔ وزیرِ اعظم آفس دے میڈیا ونگ توں جاری بیان دے مطابق وزیرِ اعظم اے ڳالھیں منگل کوں اتھاں اسلام آباد پولیس کوں الیکٹرک گاݙیاں دی حوالگی دی تقریب دے موقع تے ڳالھ مہاڑ کریندے ہوئیں آکھی۔ اسلام آباد پولیس کوں جدید، محفوظ تے ماحول دوست پولیسنگ دے فروغ کیتے 50 الیکٹرک گاݙیاں فراہم کر ݙتیاں ڳئن۔ وفاقی دارالحکومت اچ تھیوݨ آلی تقریب اچ وزیرِ اعظم محمد شہباز شریف الیکٹرک گاݙیاں دیاں چابیاں وفاقی وزیرِ داخلہ محسن نقوی تے انسپکٹر جنرل اسلام آباد پولیس سید علی ناصر رضوی دے حوالے کیتیاں۔ وفاقی وزیرِ اطلاعات و نشریات عطاء اللہ تارڑ، وفاقی وزیر ڈاکٹر طارق فضل چوہدری تے وزیرِ مملکت طلال چوہدری سمیت متعلقہ حکام تقریب اچ شرکت کیتی۔ وزیرِ اعظم اسلام آباد پولیس کوں جدید خطوط تے استوار کرݨ دے حوالے نال وفاقی وزیرِ داخلہ محسن نقوی دی کارکردگی کوں سراہیا۔ وزیرِ اعظم آکھیا جو اسلام آباد پولیس کوں ملک دے ٻئے شہراں کیتے رول ماڈل ہووݨا چاہیدے۔ وفاقی دارالحکومت اچ شہریاں کوں محفوظ ماحول دی فراہمی کیتے پولیس کوں جدید ٹیکنالوجی، سامان تے ٻئے ضروری وسائل نال لیس کیتا ویندا پئے۔ وزیرِ اعظم آکھیا جو اسلام آباد پولیس کوں ݙتی ڳئی نویاں الیکٹرک گاݙیاں دا مقصد پولیسنگ دے نظام اچ ماحول دوست تے گرین پولیسنگ کوں فروغ ݙیوݨ اے۔ جدید ٹیکنالوجی دے استعمال نال پولیس دی کارکردگی تے شہریاں کوں فراہم کیتیاں ونڄݨ آلیاں خذمتاں اچ ٻئی بہتری امسی۔ ایں موقع تے انسپکٹر جنرل اسلام آباد پولیس وزیرِ اعظم کوں اسلام آباد پولیس ولوں وفاقی دارالحکومت دی سکیورٹی کیتے قائم کیتی ڳئی نویں فورس ’’کیپٹل پٹرول‘‘ دے حوالے نال تفصیلی بریفنگ ݙتی۔ وزیرِ اعظم کوں ݙسایا ڳیا جو نویں فورس وزیرِ اعظم دے محفوظ، سمارٹ تے گرین کیپٹل دے وژن دے تحت تشکیل ݙتی ڳئی اے۔ کیپٹل پٹرول فورس اچ مجموعی طور تے 200 پولیس اہلکار شامل ہوسن۔ کیپٹل پٹرول فورس دے ہر پٹرول یونٹ اچ ہک مرد تے ہک تریمت پولیس اہلکار تعینات ہوسن۔ فورس اچ موٹر سائیکل سوار پولیس اہلکار وی شامل ہوسن تانجو مختلف علاقیاں اچ فوری رسپانس تے موثر گشت کوں یقینی بݨایا ونڄ سڳے۔