پندراں کروڑ نوجواناں کوں ہنرمند بݨا تے ملک دا اثاثہ بݨیسوں، خالد مقبول صدیقی

اسلام آباد۔ 08 ستمبر (اے پی پی) وفاقی وزیرِتعلیم و پیشہ وارانہ تربیت خالد مقبول صدیقی آکھیے جو اساں رل تے 15 کروڑ نوجواناں کوں رسمی، غیر رسمی تے فنی تعلیم دے ذریعے قیمتی اثاثہ بݨیسوں تاں جو اے نہ صرف ملکی بلکہ عالمی سطح تے ہنرمند افرادی قوت دیاں ضرورتاں پوریاں کرسڳن۔ پاکستان اچ شرحِ خواندگی دا گھٹ ہووݨ ہک ٻہوں وݙا چیلنج اے جیندے نال نبڑݨ کیتے روایتی طریقیں توں ہٹ تے نویں تے مؤثر رستے اختیار کرݨے ہوسن۔ اے ڳالھ انہاں عالمی یومِ خواندگی دے موقع تے منعقدہ تقریب نال خطاب کریندے آکھی۔ وفاقی وزیر تجویز ݙتی جو ملک اچ مسیتاں دے وسیع نیٹ ورک کوں تعلیم کیتے استعمال کریندے اشراق توں ظہر تئیں دے ویلھے اچ مختصر دورانیے دے تعلیمی مرکز قائم کیتے ونڄ سڳدن۔ انہاں آکھیا جو 18 ویں ترمیم دے بعد تعلیم صوبیں تے مقامی الحکومتاں دی ذمہ واری اے ڄݙاں جو وفاق پالیسی سازی دا کلیدی کردار ادا کریندا رہسی۔ خالد مقبول صدیقی جائیکا، این سی ایچ ڈی، یونیسکو تے یونیسف جیھے اداریں دیاں کوشاں دی تعریف کریندے آکھیے دیہاتی علاقیں توں شہراں دی طرف آوݨ آلی آبادی کوں ٻوجھ بݨاوݨ دے بجائے غیر رسمی تعلیم نال باصلاحیت بݨایا ویسی۔ وفاقی وزیرِ تعلیم ایں ڳالھ تے زور ݙتا جو گزریل 80 سالاں توں دیہاتی تے پسماندہ علاقیں اچ خواندگی دے ودھارے کیتے کوشاں جاری ہن پر مطلوبہ نتیجے حاصل نی تھی سڳئے۔ ایں کیتے اساکوں تعلیمی اداریں، سول سوسائٹی تے سارے طبقیں کوں نال رلا تے ہک قومی جدوجہد دی لوڑھ اے۔ انہاں مزید آکھیا جو غیر رسمی تعلیمی نظام دے ذریعے اساں انہاں ٻالاں تے نوجواناں کوں وی ول تعلیمی دھارے اچ گھن آسڳدوں ڄہڑے معاشی یا جغرافیائی دلیلاں دی وجہ توں سکولاں تئیں نی پڄ سڳدے۔ تقریب نال جائیکا پاکستان دے نائب کنٹری ریپریزنٹیٹو تاکایوکی سُوگا وارا خطاب کریندے آکھیا جو جائیکا اپݨے ‘آقال’ (AQAL) پروجیکٹ، ”ایچ ون، ٹیچ ون“ تے پہلے توں موجود ہنر دی سند ݙیوݨ (آر پی ایل) جہڑے جدید طریقیں دے ذریعے سکول توں ٻاہر ٻالاں تے بالغان کوں معیاری تعلیم تے روزگار نال جوڑیندا پئے۔ ایں توں علاوہ یونیسف دی نمائندہ پرنیل آئرن سائیڈ، یونیسکو دے فؤاد پاشائیوف، چیئرمین این سی ایچ ڈی صادق افتخار تے وائس چانسلر علامہ اقبال اوپن یونیورسٹی پروفیسر ڈاکٹر ناصر محمود وی ہر فرد تئیں متبادل تے معیاری تعلیم پڄاوݨ دے عزم دا اظہار کیتا۔