عدلیہ اچ ٹیکنالوجی دا موثر استعمال عدالتی عمل کوں سائلین تے وکلاء کیتے ٻیا قابلِ رسائی، موثر تے سوکھا بݨاوݨ کیتے ناگزیر اے، چیف جسٹس یحییٰ آفریدی

اسلام آباد۔ 08 ستمبر (اے پی پی) چیف جسٹس پاکستان جسٹس یحییٰ آفریدی آکھیے جو عدلیہ اچ ٹیکنالوجی دا موثر استعمال عدالتی عمل کوں سائلین تے وکلاء کیتے ٻیا قابلِ رسائی، موثر تے سوکھا بݨاوݨ کیتے ناگزیر اے ڄݙاں جو عدالتی ڈیٹا تے ڈیجیٹل نظام دے تحفظ کیتے تکڑے سائبر سکیورٹی اقدامات ضروری ہن۔ سپریم کورٹ دے شعبہ تعلقات عامہ دے جاری اعلامیہ موجب سپریم کورٹ آف پاکستان تے نیشنل انفارمیشن ٹیکنالوجی بورڈ (این آئی ٹی بی) وچال سائبر سکیورٹی، سافٹ ویئر ڈویلپمنٹ، ڈیجیٹل سروسز، انفارمیشن ٹیکنالوجی دے بنیادی ڈھانچے تے تکنیکی استعداد کار ودھاوݨ کیتے مفاہمتی یادداشت تے دستخط کر ݙتے ڳئن۔ سپریم کورٹ اسلام آباد اچ تھیوݨ آلی تقریب اچ مفاہمتی یادداشت تے سپریم کورٹ دے رجسٹرار سہیل محمد لغاری تے این آئی ٹی بی دے ڈائریکٹر جنرل فقیر اللہ دستخط کیتے۔ چیف جسٹس پاکستان جسٹس یحییٰ آفریدی تے سپریم کورٹ دے جج جسٹس میاں گل حسن اورنگزیب تقریب اچ شرکت کیتی۔ تقریب اچ سیکرٹری وزارتِ انفارمیشن ٹیکنالوجی و ٹیلی کمیونیکیشن ضرار ہاشم خان، این آئی ٹی بی دے چیف ایگزیکٹو افسر فیصل اقبال رتیال، نیشنل سائبر ایمرجنسی رسپانس ٹیم دے ڈائریکٹر جنرل حیدر عباس، این آئی ٹی بی دے ڈائریکٹر سیف الرحمن، اسسٹنٹ ڈائریکٹر ای آفس اظہر محمود جنجوعہ، سپریم کورٹ دی آئی ٹی ٹیم دے ارکان تے ٻئے اعلیٰ افسر وی موجود ہن۔ مفاہمتی یادداشت دے تحت محفوظ، قابلِ اعتماد تے موثر ڈیجیٹل نظام تیار کرݨ، سائبر سکیورٹی دے حفاظتی انتظامات تکڑے بݨاوݨ، سافٹ ویئر تے آئی ٹی انفراسٹرکچر بہتر کرݨ تے عدلیہ دی ڈیجیٹل تبدیلی کیتے مطلوبہ تکنیکی استعداد کار ودھاوݨ کیتے تعاون دا فریم ورک وضع کیتا ڳئے۔ چیف جسٹس پاکستان آکھیا جو ٹیکنالوجی کوں انصاف تئیں رسائی سوکھی بݨاوݨ، خذمتاں ݙیوݨ کوں بہتر کرݨ تے وکلاء و سائلین کوں عدالتی اداریں نال زیادہ سہولت تے سوکھ دے نال منسلک کرݨ اچ معاون ہووݨا چاہیدے۔ جسٹس یحییٰ آفریدی عدالتی ڈیٹا، ڈیجیٹل پلیٹ فارمز تے ادارہ جاتی نظام دے تحفظ کیتے سائبر سکیورٹی دی اہمیت تے وی زورݙتا۔ انہاں آکھیا جو وزارتِ آئی ٹی و ٹیلی کمیونیکیشن، این آئی ٹی بی تے ٻئے متعلقہ اداریں نال نیڑے تعاون دے ذریعے تکڑے سائبر سکیورٹی اقدامات یقینی بݨائے ویسن تاں جو عدلیہ دی ڈیجیٹل تبدیلی محفوظ، مضبوط تے پائیدار رہسی۔ سیکرٹری آئی ٹی و ٹیلی کمیونیکیشن ضرار ہاشم خان سپریم کورٹ کوں سائبر سکیورٹی، سافٹ ویئر ڈویلپمنٹ، ڈیجیٹل سروسز تے آئی ٹی انفراسٹرکچر دے شعبیں اچ مکمل تکنیکی تعاون دا یقین ݙیوائے۔ این آئی ٹی بی وی محفوظ، جدید تے موثر ڈیجیٹل نظام کیتے مطلوبہ تکنیکی مہارت تے معاونت ݙیوݨ دے عزم دا اعادہ کیتا۔ مفاہمتی یادداشت کوں عدالتی خذمتاں کوں جدید بݨاوݨ، معلوماتی نظام کوں محفوظ بݨاوݨ تے سائلین و قانونی برادری کوں بہتر سہولتاں ݙیوݨ دے پاسے اہم قدم قرار ݙتا ڳیا۔