قائم مقام صدر سید یوسف رضا گیلانی سینیٹ موبائل ایپلی کیشن دا افتتاح کر ݙتے

اسلام آباد۔ 08 ستمبر (اے پی پی) قائم مقام صدر تے چیئرمین سینیٹ سید یوسف رضا گیلانی سینیٹ موبائل ایپلی کیشن دا افتتاح کریندے اینکوں ڈیجیٹل بااختیاری، ادارہ جاتی کارکردگی اچ بہتری تے زیادہ شفاف، موثر تے عوام دوست پارلیمانی نظام دے پاسے ہک اہم قدم قرار ݙتے۔ پارلیمنٹ ہائوس اچ ایپلی کیشن دی افتتاحی تقریب نال خطاب کریندے قائم مقام صدر آکھیا جو سینیٹ موبائل ایپلی کیشن دا اجراء 1973ء اچ قیام دے بعد سینیٹ دے سفراچ ڈیجیٹل تبدیلی دے ہک نویں دور دا آغاز اے۔ انہاں آکھیا جو اے اقدام محض ہک موبائل ایپلی کیشن دے اجراء تئیں محدود کائنی بلکہ کم کرݨ دے نویں انداز، سوچ دے نویں طریقہ کار تے عوام دی خذمت دے نویں اسلوب دا آغاز اے۔ سید یوسف رضا گیلانی آکھیا جو اے ڈیجیٹل اقدام سینیٹ تے ایں دے ارکان دی کارکردگی تے امورِ کار تے ݙو رس اثرات پیسی تے ہک ایہوجیھے جدید پارلیمانی ادارے دی تشکیل اچ معاون ثابت تھیسی جیڑھا عصرِ حاضر دے تقاضیں نال ہم آہنگ ہووے۔ اپݨے طویل عوامی و سیاسی سفر دا حوالہ ݙیندے انہاں آکھیا جو ماضی اچ پارلیمانی تے حکومتی امور ٻہوں حد تئیں روایتی تے دستی نظام دے تحت انجام ݙتے ویندے ہن جئیں پاروں عوامی خدمت دے بنیادی مقصد دے بجائے مختلف طریقہ کار اچ ٻہوں ویلھا لڳدا ہئی۔ انہاں آکھیا جو او ویلھا گزر ڳئے، ہݨ حالات بدل ڳئن تے ٹیکنالوجی و جدت کوں اپناوݨ ویلھے دی اہم لوڑھ اے ۔ قائم مقام صدر آکھیا جو سینیٹ موبائل ایپلی کیشن ہک تزویراتی تبدیلی تے ایں عزم دا اظہار اے جو سینیٹ جدید ٹیکنالوجی دے تقاضیں دے نال قدم نال قدم رلا تے چلسی۔ انہاں آکھیا جو سینیٹ سیکرٹریٹ پہلے ہی ای آفس نظام کوں کامیابی نال اپنا چکیے تے ایں دے حوصلہ افزاء نتیجے سامݨے آئن۔ موبائل ایپلی کیشن وی سینیٹ دی وسیع ترڈیجیٹل تبدیلی دا حصہ اے جیندا مقصد ویلھے دی بچت، کارکردگی اچ ودھارا تے غیر ضروری مرحلیں و دوہراوݨ دا خاتمہ اے۔ انہاں زور ݙتا جو ڈیجیٹلائزیشن محض سہولت ݙیوݨ دا ناں نی بلکہ ادارہ جاتی استعداد تے موثریت اچ ودھارے دا ذریعہ اے۔ انہاں آکھیا جو ڄݙاں ساݙے نظام مربوط تے موثر انداز اچ کم کریسن تاں اساں اپݨی آئینی ذمہ واریاں تے فرائض دی انجام دہی تے زیادہ توجہ مرکوز کر سڳسوں۔ قائم مقام صدر پارلیمان تے عوام وچال رابطے کوں تکرا بݨاوݨ اچ ٹیکنالوجی دے کردار کوں وی اجاگر کریندے آکھیا جو سینیٹ دی سرکاری ویب سائٹ تے سوشل میڈیا پلیٹ فارمز دے ذریعے پارلیمانی سرگرمیاں بارے اچ وقتی معلومات ݙتیاں ویندیاں پئن، عوامی رائے تے صلاح کیتے مدد ملدی پئی اے تے غلط معلومات دے تدارک اچ وی معاونت حاصل تھیندی پئی اے۔ انہاں آکھیا جو ڈیجیٹل آرکائیوز دے دائرہ کار اچ توسیع پاروں مستند پارلیمانی معلومات ارکانِ پارلیمنٹ، محققین تے عوام کیتے زیادہ سوکھ نال دستیاب تھیندیاں پئن جیندے نال شفافیت اچ ودھارا تے جمہوری اداریں تے عوامی اعتماد تکڑا تھیندا پئے۔ سید یوسف رضا گیلانی آکھیا جو ڈیجیٹل تبدیلی کہیں ہک اقدام تئیں محدود کائنی بلکہ ہک مسلسل سفر اے۔ انہاں نیل آرمسٹرانگ دے تاریخی الفاظ دا حوالہ ݙیندے آکھیا جو اے سینیٹ دی ڈیجیٹلائزیشن دی پاسے ہک چھوٹا قدم اے لیکن جدید دور دے تقاضیں نال ہم آہنگ پارلیمانی جمہوریت کیتے ہک ٻہوں وݙی ٻلہانگ اے۔ قائم مقام صدرآکھیا جو جدت کوں محض جدت کیتے نی اپناوݨا چاہیدا بلکہ ایں دا مقصد جمہوریت کوں زیادہ شفاف، موثر تے عوام دے نیڑے بݨاوݨ ہووݨا چاہیدے۔ انہاں آکھیا جو سینیٹ موبائل ایپلی کیشن دا اجراء ہک ایہوجیھے جدید، موثر تے عوام دوست سینیٹ دے پاسے قدم اے جیڑھا پاکستان دے عوام دی خدمت زیادہ وقار تے موثریت دے نال انجام ݙے سڳے۔ قائم مقام چیئرمین سینیٹ سیدال خان ناصر آکھیا جو سینیٹ موبائل ایپلی کیشن دا اجراء ادارے دے پارلیمانی سفر اچ ہک اہم سنگِ میل اے تے ایں توں سینیٹ دے طریقہ کار اچ ہک وݙی تبدیلی دی عکاسی تھیندی اے۔ انہاں آکھیا جو اے ایپلی کیشن محض ہک نویں تکنیکی سہولت نی بلکہ سینیٹ دے داخلی نظام کوں جدید خطوط تے استوار کرݨ دی وسیع تر کوشساں دا حصہ اے۔ قائم مقام چیئرمین آکھیا جو دنیا اچ ٹیکنالوجی قانون ساز اداریں دے کم کرݨ دے انداز کوں تبدیل کریندی پئی اے تے پاکستان ایں سفر اچ پچھوں نی رہ سڳدا۔ انہاں آکھیا جو شفافیت، احتساب، وقتی کارروائی تے درست معلومات تئیں رسائی ہک مضبوط پارلیمانی نظام دیاں بنیادی ضرورتاں ہن۔ وفاقی وزیر پارلیمانی امور ڈاکٹر طارق فضل چوہدری آکھیا جو سینیٹ موبائل ایپلی کیشن دا اجراء پارلیمان دے طریقہ کار تے ارکان و عوام دے نال رابطیں کوں جدید بݨاوݨ دی پاسے ہک اہم قدم اے۔ انہاں آکھیا جو اے اقدام محض ہک نویں ڈیجیٹل سہولت دا اجراء نی بلکہ پارلیمان کوں زیادہ قابلِ رسائی، موثر تے عوام دوست بݨاوݨ دے وسیع تر ادارہ جاتی عزم دی عکاسی کریندے۔ وفاقی وزیر آکھیا جو جدید پارلیمان کیتے صرف چنڳی قانون سازی کافی نی بلکہ ایہوجیھے جدید نظام وی ضروری ہن جنہاں دے ذریعے پارلیمانی امور کوں موثر انداز اچ انجام ݙتا، منظم، ریکارڈ تے عوام تئیں پڄایا ونڄ سڳے۔  ایں موقع تے وفاقی وزیر انفارمیشن ٹیکنالوجی و ٹیلی کمیونیکیشن شزا فاطمہ خواجہ پارلیمان دی ڈیجیٹلائزیشن دیاں کوشساں دا خیرمقدم کریندے آکھیا جو ڈیجیٹل تبدیلی نال ادارے دی کارکردگی، شفافیت تے عوامی ردِعمل اچ بہتری آسی۔ انہاں آکھیا جو حکومت دے ڈیجیٹل تبدیلی دے ایجنڈے دے ترائے بنیادی پہلو ڈیجیٹل معیشت، ڈیجیٹل معاشرہ تے ڈیجیٹل طرزِ حکمرانی ہن۔ انہاں آکھیا جو ڈیجیٹل گورننس دے تحت سارے سرکاری تے عوامی اداریں دی ڈیجیٹل تبدیلی حکومت دے بنیادی ایجنڈے دا حصہ اے۔ شزا فاطمہ خواجہ آکھیا جو گزریل سال سینیٹ تے قومی اسمبلی توں ڈیجیٹل نیشن پاکستان ایکٹ منظور کیتا ڳیا جیندے تحت پاکستان ڈیجیٹل اتھارٹی دا قیام عمل اچ گھن آیا ڳیا۔ سیکرٹری سینیٹ سید حسنین حیدر شرکاء کوں سینیٹ آف پاکستان ایپ دے مقصد تے خصوصیات بارے اچ بریفنگ ݙیندے ݙسایا جو اے ایپلی کیشن سینیٹ دے آئی ٹی ڈیپارٹمنٹ تیار کیتی اے۔ انہاں آکھیا جو اے ایپلی کیشن سینیٹ دے طریقہ کار کوں جدید بݨاوݨ تے پارلیمانی معلومات دی زیادہ موثر تے وقتی فراہمی کیتے ڈیجیٹل ٹیکنالوجی دے استعمال کوں ودھارا ݙیوݨ اچ وی معاون ثابت تھیسی۔