وزیرِاعظم محمد شہباز شریف نال ملک دے ممتاز صنعتکاراں تے کاروباری شخصیات دے وفد دی ملاقات، برآمد کنندگان کیتے سپر ٹیکس توں استثنیٰ اچ توسیع دے معاملے دا جائزہ گھنݨ دی ہدایت

اسلام آباد۔ 08 ستمبر (اے پی پی) وزیرِاعظم محمد شہباز شریف برآمدات تے مبنی معاشی ترقی دے ودھارے کیتے کاروباری برادری دیاں تجویزاں دا خیرمقدم کریندے برآمد کنندگان کیتے سپر ٹیکس توں استثنیٰ اچ توسیع دے معاملے دا جائزہ گھنݨ دی ہدایت کیتی اے تے آکھیا جو خصوصی سرمایہ کاری سہولت کونسل دے ذریعے سرمایہ کاراں تے کاروباری برادری کوں ہک سوکھا پلیٹ فارم ݙتا ڳئے جتھاں ون ونڈو آپریشن دے تحت سہولتاں ݙتیاں ویندیاں پئن۔ وزیرِاعظم دفتر دے میڈیا ونگ توں جاری بیان موجب وزیرِاعظم محمد شہباز شریف نال ملک دے ممتاز صنعت کاراں تے کاروباری شخصیات دے وفد وزیرِاعظم ہاؤس اچ ملاقات کیتی۔ وفد دے ارکان اچ میاں محمد منشاء، عارف حبیب، ثاقب شیرازی، عاطف باجوہ، محمد علی طبہ، مصدق ذوالقرنین، عمر سعید، صمد داؤد، اشرف موکاتی، شاہد صورتی، شہزاد اصغر، زیاد بشیر، شہزاد سلیم، آصف پیر، عامر ابراہیم، جاوید بلوانی، صدیق بھٹی، فواد انور، خرم مختار تے یوسف حسین شامل ہن۔ وزیراعظم وفد دا خیر مقدم کریندے آکھیا جو اڄ دی ملاقات دا مقصد برآمدات تے مبنی معاشی ترقی دے ودھارے دے حوالے نال مشاورت اے۔ وزیرِاعظم بجٹ سازی دے عمل دے دوران کاروباری برادری دی طرفوں پیش کیتیاں ڳئیاں قیمتی تجویزاں تے انہاں دا شکریہ ادا کریندے آکھیا جو انہاں دیاں ٻہوں تجویزاں کوں بجٹ اچ شامل کیتا ڳئے۔ وزیرِاعظم آکھیا جو حکومت کاروباری سرگرمیاں دے ودھارے تے کاروبار اچ سوکھ کیتے مؤثر اقدامات کریندی پئی اے، توانائی دی لاڳت اچ کمی حکومت دی اہم ترجیحات اچ شامل اے تے ایں حوالے نال وی اقدامات جاری ہن۔ وزیرِاعظم ہݨے بݨائے ڳئے ٹریڈ فیسیلیٹیشن بورڈ کوں تجارت دے ودھارے کیتے ہک مضبوط تے مؤثر ادارہ بݨاوݨ دے عزم دا اظہار کریندے آکھیا جو بورڈ دی کارکردگی تے دائرہ کار کوں ٻیا مؤثر بݨاوݨ کیتے کاروباری برادری دیاں تجویزاں دا خیرمقدم کیتا ویسی۔ وزیرِاعظم آکھیا جو خصوصی سرمایہ کاری سہولت کونسل دے ذریعے سرمایہ کاراں تے کاروباری برادری کوں ہک سوکھا پلیٹ فارم ݙتا ڳئے جتھاں ون ونڈو آپریشن دے تحت سہولتاں ݙتیاں ویندیاں پئن۔ وزیرِاعظم آکھیا جو کاروباری شعبے تے غیر ضروری ریگولیٹری ٻوجھ گھٹ کرݨ کیتے ریگولیٹری گِلوٹین تے کم جاری اے، ایں اقدام دا مقصد قواعد و ضوابط کوں سوکھا بݨاوݨا، کمپلائنس لاڳت گھٹ کرݨ تے کاروباری سرگرمیاں کوں ٻیا سوکھا بݨاوݨا اے۔ انہاں آکھیا جو فیڈرل بورڈ آف ریونیو دی ڈیجیٹائزیشن دے حوالے نال ہک وݙا کم مکمل کر ڳھدا ڳئے۔ وزیرِاعظم آکھیا جو ایف بی آر انفورسمنٹ دے ذریعے گزریل مالی سال اچ 800 ارب روپے کٹھے کیتے۔ وزیرِاعظم آکھیا جو حکومت دی معاشی ٹیم دیاں کوشاں پاروں ملک دے میکرو اکنامک حالات اچ خاطر خواہ بہتری آئی اے تاں جو مائیکرو اکنامک سطح تے بہتری گھن آوݨ کیتے اساکوں ٻئی محنت کرݨی اے تاں جو معاشی بہتری دے ثمرات عوام تئیں پڄ سڳن۔ انہاں آکھیا جو حکومت صنعت دی ضرورتاں موجب افرادی قوت دی تربیت تے خصوصی توجہ ݙیندی پئی اے تاں جو نوجواناں کوں مارکیٹ دیاں ضرورتاں موجب ہنرمند لوک ݙتے ونڄ سڳن۔ وزیرِاعظم کاروباری برادری دے مسئلیں دے وقتی تے دیرپا حل کیتے فوری اقدامات کرݨ دی ہدایت وی کیتی۔ وزیرِاعظم متعلقہ حکام کوں برآمد کنندگان کیتے سپر ٹیکس توں استثنیٰ اچ توسیع دے معاملے دا جائزہ گھنݨ دی وی ہدایت کیتی۔ وفد کوں ملکی معیشت کوں بہتر بݨاوݨ تے کاروبار، تجارت تے صنعت دے ودھارے دے حوالے نال حکومتی اقدامات تے بریفنگ ݙتی ڳئی۔ وفد کوں ݙسایا ڳیا جو ملک دیاں بندرگاہواں تے پورٹ چارجز اچ کمی گھن آئی ڳئی اے تے بندرگاہواں دی آپریشنل استعداد بہتر بݨائی ڳئی اے۔ کراچی دیاں بندرگاہواں توں اندرلے ملک رسائی بہتر بݨاوݨ کیتے موٹر وے ایم- 10 دی اپ گریڈیشن تے پیپری فریٹ کوریڈور تے کم جاری اے۔ موٹر وے ایم 13 (کھاریاں-راولپنڈی) دی تعمیر نال لاہور تے اسلام آباد وچال فاصلہ گھٹ تھی ویسی۔ ایویں پاکستان ریلوے دی اپ گریڈیشن نال ریلوے دا انفراسٹرکچر بہتر ہوسی جیندے نال تجارتی سامان دی ترسیل ٻئی تکھی تھی سڳسی۔ وفد کوں ݙسایا ڳیا جو حکومتی اقدامات نال ملک دی آئی ٹی برآمدات اچ ریکارڈ ودھارا ڈٹھا ڳئے۔ وفد کوں ݙسایا ڳیا جو حکومت دی طرفوں 10 لکھ لوکاں کوں آئی ٹی تے مصنوعی ذہانت دے شعبیں اچ تربیت ݙتی ویندی پئی اے۔ وفد کوں ݙسایا ڳیا جو ملک اچ چھوٹے تے درمیانے درجے دے کاروباراں دے ودھارے تے انہاں کاروباراں دی ملک دے برآمدی شعبے اچ شمولیت کیتے ہر ممکن اقدامات کیتے ویندے پئن تے ایس ایم ایز دی فنانسنگ دے حوالے نال وی ہر ممکن سہولتاں ݙتیاں ویندیاں پئن۔ اجلاس اچ کاروباری شخصیات تے صنعت کاراں ملک اچ میکرو اکنامک استحکام دی تعریف کیتی حکومت دیاں معاشی اصلاحات تے پالیسی اقدامات تے اعتماد دا اظہار کیتا۔ کاروباری رہنماواں وزیرِاعظم محمد شہباز شریف، نائب وزیرِاعظم اسحاق ڈار تے چیف آف آرمی سٹاف و چیف آف ڈیفنس فورسز فیلڈ مارشل سید عاصم منیر دی قیادت اچ خطے اچ امن کیتے پاکستان دے تعمیری کردار دی تعریف کیتی۔ انہاں حکومت دی طرفوں کیتے ڳئے مختلف معاشی اصلاحاتی اقدامات بالخصوص ایکسپورٹ ڈویلپمنٹ فنڈ، ٹیکس ریفنڈ دی وقتی ادائیگی، تے ایف بی آر دی ڈیجیٹائزیشن دی تعریف کیتی ۔ کاروباری برادری پاکستان دی طرفوں 3 ارب ڈالر دے کامیاب بانڈ اجراء کوں وی خوش آئند قرار ݙیندے آکھیا جو اے ملک دے میکرو اکنامک استحکام تے پاکستان تے ودھدے کاروباری اعتماد دا مظہر اے۔ کاروباری شخصیات تے صنعت کاراں برآمدات تے مبنی معاشی ترقی دے ودھارے کیتے حکومت دے نال بھرپور تعاون جاری رکھݨ دے عزم دا اظہار کیتا۔ملاقات اچ نائب وزیرِاعظم و وزیرِ خارجہ محمد اسحاق ڈار، وفاقی وزراء احسن اقبال، رانا تنویر حسین، احد خان چیمہ، اعظم نذیر تارڑ، مصدق ملک، عطاء اللہ تارڑ، شزہ فاطمہ خواجہ، سردار اویس لغاری، علی پرویز ملک، وزیرِاعظم دے مشیران محمد علی، ہارون اختر، وزیرِ مملکت بلال اظہر کیانی تے متعلقہ اعلیٰ سرکاری افسران وی موجود ہن۔