عدالتی احکامات دی پابندی ہر صورت لازم، رعایت کوں رسمی کارروائی سمجھݨ افسوسناک اے، سپریم کورٹ

اسلام آباد۔ 09 ستمبر (اے پی پی) سپریم کورٹ قرار ݙتے جو عدالتی نظام دی بنیاد یقین، نظم و ضبط تے عدالتی احکامات دی حرمت تے اے، عدالتی احکامات دی پابندی ہر صورت لازم اے، عدالت ولوں ݙتی ڳئی رعایت کوں محض رسمی کارروائی سمجھݨ افسوسناک اے۔ جسٹس منیب اختر، جسٹس ملک شہزاد تے جسٹس صلاح الدین پنہور تے مشتمل ترائے رکنی بنچ ڈیرہ اسماعیل خان دی زیتون بی بی کوں تقریباً ادھی صدی بعد وراثتی جائیداد دے مقدمے اچ حتمی ریلیف ݙیندے ہوئیں مخالف فریق دی نظرثانی خارج کرݨ دا حکم واپس گھنݨ دی درخواست مسترد کر ݙتی۔ سپریم کورٹ زیتون بی بی دے حق اچ 2022 دے فیصلے تے عملدرآمد دا حکم ݙیندے ہوئیں عدالتی احکامات تے عملدرآمد نہ تھیوݨ تے برہمی دا اظہار کیتا۔ فیصلہ جسٹس صلاح الدین پنہور تحریر کیتا، ڄیندے اچ قرار ݙتا ڳیا جو فریقین تے وکلاء اکثر عدالت دی مہربانی کوں محض ضابطے دی رسمی کارروائی سمجھدن تاہم عدالتی احکامات دی سنجیدگی تے تقدس کوں نظر انداز نئی کیتا ونڄ سڳدا۔ فیصلے دے مطابق نظرثانی کیس اچ 4 مارچ 2024 کوں مشروط التوا ݙتا ڳیا ہئی، 12 ستمبر کوں تھیوݨ آلی اگلی سماعت تے ولا التوا منگیا ڳیا، ڄیندے تے عدم پیروی دی بنیاد تے نظرثانی درخواست خارج کر ݙتی ڳئی۔ عدالت قرار ݙتا جو ہݨ نظرثانی خارج کرݨ دا فیصلہ واپس گھنݨ 4 مارچ 2024 دا آرڈر واپس گھنݨ دے برابر ہوسی، ایں کیتے مخالف فریق دی درخواست منظور نئی کیتی ونڄ سڳدی۔ فیصلے دے مطابق زیتون بی بی دے والد دا 1976 اچ انتقال تھیا ہئی تے انہاں کوں اوں ویلھے توں وراثتی جائیداد توں محروم رکھا ڳیا ہئی۔ سپریم کورٹ 2022 اچ زیتون بی بی دے حق اچ فیصلہ ݙتا ہئی ڄݙاں جو مخالف فریق دی نظرثانی درخواست وی 2024 اچ خارج کر ݙتی ڳئی ہئی۔ سپریم کورٹ زیتون بی بی دے حق اچ 2022 دے فیصلے تے عملدرآمد یقینی بݨاوݨ دا حکم ݙیندے ہوئیں مخالف فریق دی درخواست مسترد کر ݙتی۔