بینک تے مالیاتی ادارے کساناں، ایس ایم ایز تے ہاؤسنگ سیکٹر کوں قرضیاں دی فراہمی اچ آپݨا کردار ادا کریسن، محمد شہباز شریف

اسلام آباد۔ 09 ستمبر (اے پی پی) وزیرِ اعظم محمد شہباز شریف کساناں کوں بلا رکاوٹ تے سوکھی شرطاں تے مالی وسائل تئیں رسائی یقینی بݨاوݨ دی ہدایت کریندیں ہوئیں آکھیا جو بینک تے مالیاتی ادارے کساناں، ایس ایم ایز تے ہاؤسنگ سیکٹر کوں قرضیاں دی فراہمی اچ آپݨا کردار ادا کریسن۔ بدھ کوں پی ایم آفس دے میڈیا ونگ توں جاری بیان دے مطابق وزیرِ اعظم محمد شہباز شریف دی صدارت مالیات تئیں رسائی منصوبہ 2026-28 دے حوالے نال اجلاس تھیا ڄیندے اچ وزیرِ اعظم اپنا گھر سکیم، زراعت تے ایس ایم ایز دے شعبیاں دی ترقی کیتے فنانسنگ تے پیشرفت دے حوالے نال جاری اقدامات دا جائزہ گھدا۔ وزیرِ اعظم محمد شہباز شریف آکھیا جو بینک تے مالیاتی ادارے کساناں، ایس ایم ایز تے ہاؤسنگ سیکٹر کوں قرضیاں دی فراہمی اچ آپݨا کردار ادا کریسن، ڄہڑے بینک قرضیاں دی فراہمی اچ بھرپور کردار ادا کریسن حکومت انہاں دی حوصلہ افزائی کریسی۔ انہاں آکھیا جو زرعی شعبہ ملک دی معیشت اچ ریڑھ دی ہڈی دی حیثیت رکھیندے ڄیندے فروغ کیتے کم کرݨ قومی ذمہ داری اے۔ وزیرِ اعظم کساناں کوں بلا رکاوٹ تے آسان شراط تے مالی وسائل تئیں رسائی یقینی بݨاوݨ دی ہدایت کیتی۔ انہاں آکھیا جو ڳھٹ آمدن تے متوسط طبقیاں کیتے سستی ہاؤسنگ دی فراہمی اساݙی ترجیح اے، صوبائی چیف سیکرٹریز ایہوجھی املاک دا جامع سروے کرواون ڄنہاں کیتے بینک آپݨے گھر دے خواہشمند افراد کوں ’’وزیراعظم اپنا گھر سکیم‘‘ دے تحت قرضہ ݙے سڳن۔ اجلاس کوں ہاؤسنگ، زراعت تے ایس ایم ایز دے شعبیاں دی فنانسنگ دے حوالے نال اقدامات تے بریفنگ ݙتی ڳئی۔ بریفنگ اچ ݙسایا ڳیا جو وزیراعظم اپنا گھر سکیم دے حوالے نال ہݨ تئیں 147,504 درخواستاں موصول تھئیاں ڄنہاں اچوں 53,127 منظور تھی ڳئن، ایں سکیم دے تحت منظور شدہ درخواستاں دی کل مالیت 313.42 بلین روپے اے ڄݙاں جو 8,739 درخواست گزاراں کوں 45.43 بلین روپے دے قرضے فراہم کیتے ڳئن۔ ملک بھر اچ مورگیج دی شرائط پوریاں کرݨ آلے پلاٹاں دی نشاندہی کیتے نظام تیار کیتا ویندا پئے ڄیندا پائلٹ اسلام آباد توں تھیسی۔ اپنا گھر سکیم کوں ٻیا مربوط بݨاوݨ کیتے معروف ہاؤس ڈویلپرز کوں ایں عمل اچ شامل کرݨ کیتے مؤثر طریقہ کار وضع کیتا ویسی۔ زرعی شعبے کیتے بینکاں ولوں قرضے دا حجم اگست 2026 اچ 1.268 ٹریلین روپے رہیا ڄݙاں جو ایکسیس ٹو فنانس پلان 2026-2028 دے تحت جون 2028 تائیں 2 ٹریلین روپے دا ہدف مقرر کیتا ڳئے۔ زرخیز ای (Zarkhez-e) ایپ دے ذریعے آسان قرضے کیتے 35,838 درخواستاں موصول تھئیاں ڄیندے کیتے 7.35 بلین روپے منظور تھئے ڄنہاں اچوں 1.96 بلین روپے دے قرضے جاری کیتے ڳئن۔ اگست 2026 تئیں بینکاں دی جانب توں ایس ایم ای دے شعبے کوں قرضیاں دا حجم 1.067 ٹریلین روپے رہیا ڄݙاں جو ایکسیس ٹو فنانس پلان 2026-2028 دے تحت جون 2028 تائیں انہاں قرضیاں دا ہدف 2 ٹریلین روپے رکھا ڳئے۔ بریفنگ اچ اے وی ݙسایا ڳیا جو سمیڈا گزشتہ ترائے مہینیاں اچ 1096 ایس ایم ایز کوں فائنانشل لٹریسی دی تربیت ݙتی۔ اجلاس اچ نائب وزیرِ اعظم تے وزیرِ خارجہ محمد اسحاق ڈار، وفاقی وزراء احد خان چیمہ، رانا تنویر حسین، محمد اورنگزیب، ریاض حسین پیر زادہ، وزیرِ مملکت بلال اظہر کیانی، مشیرِ وزیرِ اعظم ہارون اختر خان، گورنر سٹیٹ بینک جمیل احمد، چاروں صوبیاں تے آزاد جموں تے کشمیر تے گلگت بلتستان دے چیف سیکرٹریز، IBRD دی کنٹری ڈائریکٹر بولورما امگآبزر، پاکستانی بینکاں دے صدور و سی ای اوز تے متعلقہ اعلیٰ سرکاری افسراں شرکت کیتی۔