اسلام آباد۔25 ستمبر(اے پی پی) صدر مملکت آصف علی زرداری نوجواناں کوں اخباراں دے مطالعے دی عادت اپناوݨ تے زور ݙیندے آکھیے جو جمہوریت دے استحکام اچ اخباراں دا غیر جانبدارانہ تے متوازن کردار قابلِ قدر اے۔ توقع اے جو اخباراں دے ایڈیٹوریل بورڈز ریاست تے معاشرے دے وسیع تر مفاد اچ سماجی و اقتصادی، مذہبی تے سیاسی مسئلیں دے نال نال خارجہ پالیسی تے مناسب توجہ مرکوز رکھیسن۔ انہاں …
جمہوریت دے استحکام اچ اخباراں دا غیر جانبدارانہ تے متوازن کردار قابلِ قدر اے، نوجوان اخبار بینی دی عادت اپناون۔ صدر آصف زرداری دا قومی یومِ اخباربینی تے پیغام
اسلام آباد۔25 ستمبر(اے پی پی) صدر مملکت آصف علی زرداری نوجواناں کوں اخباراں دے مطالعے دی عادت اپناوݨ تے زور ݙیندے آکھیے جو جمہوریت دے استحکام اچ اخباراں دا غیر جانبدارانہ تے متوازن کردار قابلِ قدر اے۔ توقع اے جو اخباراں دے ایڈیٹوریل بورڈز ریاست تے معاشرے دے وسیع تر مفاد اچ سماجی و اقتصادی، مذہبی تے سیاسی مسئلیں دے نال نال خارجہ پالیسی تے مناسب توجہ مرکوز رکھیسن۔ انہاں اے ڳالھ قومی یومِ اخباربینی دے موقع تے اپݨے پیغام اچ آکھی جیڑھا 25 ستمبر کوں منایا ویندا پئے۔صدر آصف علی زرداری ایں ݙینھ دے موقع تے آزاد صحافت تے شہریاں دے حقوق دے تحفظ اچ چوتھے ستون دی حیثیت نال ایں دے کردار تے اپݨے پختہ یقین دا اعادہ کریندے ریاست و معاشرے متعلق تے فیصلہ سازاں کوں جوابدہ بݨاوݨ دے حوالے نال ایں دیاں ذمہ واریاں دی یاد دہانی کرائی۔ انہاں آکھیا جو جݙاں جو اساں متنوع ذرائع ابلاغ دی تکھی رفتار ترقی دا مشاہدہ کریندے پیوں، اخباراں اڄ وی رائے عامہ دی تشکیل تے باخبر شہری معاشرے دے ودھارے اچ اہم کردار ادا کریندے پئن۔ انہاں آکھیا جو اڄ بدلدے ذرائع ابلاغ دے ماحول اچ اخباراں دا مطالعہ ہݨ صرف مطبوعہ صفحیں تئیں محدود نی رہ ڳیا بلکہ اخباراں تکھے ڈیجیٹل پلیٹ فارمز تے آن لائن رسائی دیاں ٻئی شکلاں دے ذریعے وی قارئین تئیں پڄدیاں پئن۔صدرمملکت آکھیا جو مصنوعی ذہانت دی تکھی رفتار ترقی، نقلی خبـراں کوں ہدف بݨا تے کھنڈاوݨ تے ڈس انفارمیشن تے مبنی مہمات وی اساݙی سماجی اقدار، ثقافتی نقطہ نظر تے طرزِ عمل کوں متاثر کریندیاں پئن۔ ایہو جیھے ماحول اچ ذمہ دارانہ ادارتی نگرانی دے تحت قابلِ اعتماد تے متوازن صحافت پہلے توں کتھائیں زیادہ اہمیت اختیار کرڳئی اے۔ صدر مملکت پاکستان دے نوجواناں تے زور ݙتا جو او اخباراں دے مطالعے دی عادت اپناون، بھاویں مطالعہ مطبوعہ شکل اچ ہووے یا ڈیجیٹل پلیٹ فارمز دے ذریعے، تے ایں دے نال نال خود کوں جدید تکنیکی مہارتاں نال وی آراستہ کرن۔انہاں آکھیا جو میں جمہوریت دے استحکام اچ اخباراں دے غیر جانبدارانہ تے متوازن کردار کوں قدر دی نگاہ نال ݙیہداں۔ میں اے وی توقع رکھینداں جو ادارتی بورڈز ریاست تے معاشرے دے وسیع تر مفاد اچ سماجی و اقتصادی، مذہبی تے سیاسی مسئلیں دے نال نال خارجہ پالیسی کوں وی مناسب توجہ ݙیندے رہسن۔ صدر آصف علی زرداری امید ظاہر کیتی جو آل پاکستان نیوز پیپرز سوسائٹی (اے پی این ایس) تے کونسل آف پاکستان نیوز پیپر ایڈیٹرز (سی پی این ای) علاقائی و عالمی پیش رفت دے بارے باخبر قومی مباحثے تے وسیع ترعوامی فہم و آگاہی دے ودھارے اچ اپݨا کردار جاری رکھیسن۔ صدر مملکت ایں موقع تے صحافت دے اعلیٰ ترین معیار کوں برقرار رکھݨ تے آزاد صحافت کیتے سازگار ماحول دے ودھارے دے سلسلے اچ پریس کوں اپݨی مسلسل حمایت دا بھرپور یقین ݙوایا
