وفاقی وزیرِ تجارت نال جرمن سفیر دی ملاقات

اسلام آباد۔7 اکتوبر (اے پی پی) وفاقی وزیرِ تجارت جام کمال خان نال جرمن سفیر اینا لیپل ملاقات کیتی، جیندے اچ تجارت، سرمایہ کاری تے کاروباری رابطے ودھاوݨ تے اتفاق کیتا ڳئے۔ ترجمان وزارتِ تجارت موجب ملاقات اچ وفاقی وزیرِتجارت جام کمال خان جرمن کمپنیاں کوں پاکستان اچ سرمایہ کاری دی دعوت ݙتی۔ جرمن سفیر جی ایس پی پلس نال تعلق رکھݨ آلی پاکستان دی اصلاحاتی پیش رفت دی تعریف کیتی۔ وفاقی وزیرآکھیا جو پاکستان جی ایس پی پلس نال تعلق رکھݨ آلے بین الاقوامی ذمہ واریاں دی تکمیل کیتے پرعزم اے۔ جام کمال خان جرمن کمپنیاں کوں نومبر اچ کراچی اچ فوڈ ایگ 2026 اچ شرکت دی دعوت ݙتی۔ انہاں آکھیا جو فوڈ ایگ پاکستان تے جرمنی وچال کاروباری شراکت داری کیتے اہم پلیٹ فارم ہوسی۔ ملاقات اچ وزیراعظم دے معاونِ خصوصی تجارت رانا احسان افضل جرمن سفیر دے سامݨے پاکستانی باسمتی چاول دے جی آئی دا معاملہ چاتا۔ انہاں آکھیا جو باسمتی دے کاشتکاراں، پروڈیوسراں تے برآمد کنندگان دے مفادات دا تحفظ ضروری اے، پاکستانی باسمتی دے جی آئی کیس دیاں مضبوط قانونی، تاریخی تے تجارتی بنیاداں ہن۔ جرمن سفیر جغرافیائی شناخت دے موثر تحفظ کوں زرعی برآمدات کیتے اہم قرار ݙتا۔ انہاں آکھیا جو پاکستان اچ زراعت، فوڈ پروسیسنگ، ٹیکنالوجی تے مینوفیکچرنگ اچ سرمایہ کاری دے وسیع موقع ہن۔ جرمن سفیر فوڈ ایگ اچ جرمن کمپنیاں دی شرکت دی دعوت دا خیرمقدم کیتا۔ انہاں آکھیا جو جرمنی اچ لائیو سٹاک تجارتی نمائش کیتے پاکستانی کاروباری وفد دیاں تیاریاں جاری ہن۔ جرمن سفیر جام کمال خان کوں 29 توں 31 اکتوبر تئیں سیئول اچ ایشیا پیسیفک کانفرنس آف جرمن بزنس اچ شرکت دی دعوت وی ݙتی۔