نائب وزیراعظم تے وزیرِ خارجہ دا سیرت انڈوومنٹ فنڈ دے قیام دا اعلان، سیرت النبی ﷺ دی تعلیمات عالمی امن، انصاف تے اقوام وچال پل تعمیر کرݨ کیتے رہنمائی ݙیندن، اسحاق ڈار

اسلام آباد۔12 اکتوبر (اے پی پی) نائب وزیراعظم و وزیرِ خارجہ سینیٹر محمد اسحاق ڈار تریجھی بین الاقوامی سیرت فیسٹیول دے افتتاحی اجلاس نال خطاب کریندے سیرت انڈوومنٹ فنڈ دے قیام دا باضابطہ اعلان کیتے، جیندے کیتے ابتدائی طور تے 10 کروڑ روپے دی رقم ݙتی ویسے۔ انہاں زور ݙے تے آکھیا جو حضرت محمد ﷺ دی سیرتِ طیبہ تے تعلیمات عالمی امن، سانجھے احترام، انصاف تے اقوام وچال تعلقات قائم کرݨ کیتے مشعلِ راہ ہن۔ پاکستان دنیا اچ جھیڑیں دے پرامن حل تے امن دے قیام کیتے اپݨا متحرک کردار ادا کریندا پئے، جینکوں اقوامِ متحدہ سودھے عالمی برادری دی طرفوں دی تعریف کیتی ڳئی اے۔نائب وزیراعظم ݙسایا جو پاکستان اپݨے دفاع کیتے اقوامِ متحدہ دے آرٹیکل 51 دے تحت کارروائی کیتی تے دشمن دی جارحیت دا جواب ݙیندے وی سیرت النبی ﷺ دیاں روشن تعلیمات تے جنگی اخلاقیات تے مکمل عمل کیتا۔ انہاں آکھیا جو پاکستانی افواج صرف عسکری تنصیبات کوں نشانہ بݨایا تے شہریاں و شہری انفراسٹرکچر کوں کہیں قسم دا ضیان نی پڄایا۔اسحاق ڈار ملکی و معاشرتی مسئلیں تے ڳالھ کریندے آکھیے جو مذہب یا سیاست دے ناں تے انتہا پسندی توں بچݨ کیتے اختلافِ رائے دے آداب کوں اپناوݨ ضروری اے، تے سارے سیاسی و مذہبی اختلافات کوں طاقت دی بجائے سانجھے مکالمے تے ڳالھ مہاڑ نال حل کیتا ونڄݨا چاہیدے۔ انہاں عزم ظاہر کیتا جو حکومت سیرت انسائیکلوپیڈیا سودھے سارے تحقیقی منصوبیں تے سیرت النبی ﷺ دا پیغام عام کرݨ کیتے ہر ممکن وسائل ݙیسی، تے ایں کارِ خیر کیتے مخیر حضرات توں وی فنڈز اچ ودھ چڑھ تے حصہ گھنݨ دی اپیل کیتی۔