اسلام آباد ۔ 12 مئی (اے پی پی) وزیر خارجہ شاہ محمود قریشی آکھیا جو وفاقی حکومت کوروناوائرس دے اجوکی صورتحال بارے سارے صوبیاں دے مشورے نال حکمت عملی بنڑائی،ایں بارے ارکان پارلیمنٹ دی تجویزاں دا خیر مقدم کریسوں اتے قومی معاملیاں تے انہاں نال رل تے کم کرنڑ سانگے تیار ہیسے۔قومی رابطہ کمیٹی اچ سارے فیصلے مشور ے نال کیتے ویندن،کورونادی وباءپاروں مقبوضہ کشمیر اچ صورتحال وگڑ گئی اے،عالمی برادری او آئی سی کوں ایں بارے اپنڑاں کردار نبھاونڑاں چاہیدے۔سنوار کوں ایوان بالا اچ کوروناد ی صورتحال تے پالیسی بیان ڈیندیں ہوئیں شاہ محمود قریشی آکھیا جو اے ہک غیر متوقع صورتحال اے۔ڈوجھی جنگ دے بعد کورونادا بحران ساریاں توں وڈا اے۔مستحکم معیشتاں دے ہتھ پیر وی پھل گئن۔امریکہ،اٹلی،فرانس سمیت بئے ملکاں دی صورتحال سامنڑے اے۔پاکستان جیہا ترقی پذیر ملک وی ایں آفت نال نبڑداپئے ۔قوم دی حیثیت نال ایں وباءکوں ضرور ہریسوں۔نہاں آکھیا جو حکومت ایں معاملے تے کنفیوزیشن اچ کائنی۔نشابر پالیسی اے۔۔قومی حکمت عملی بنڑائی گئی اے۔سندھ حکومت وی ایں پالیسی دا حصہ اے۔پیپلز پارٹی دا مشورہ شامل اے۔قومی رابطہ کمیٹی اچ سندھ اسمبلی دے رکن وی شمال ہن۔وزیراعلیٰ سندھ دی گالھ کوں وزیراعظم اہمیت ڈیندن۔کشمیر اتے گلگت بلتستان اچ مسلم لیگ ن دی حکومت اے۔انہاں دی رائے کوں وی اہمیت ڈتی ویندی اے۔اے آکھیا ویندے جو این وباءدا حل لاک ڈاﺅن اے،ہرگز اے ہک جزو کائنی۔ایندا حل ویکسین اے جئیں کوں بنڑنڑ اچ 18مہینے توں ودھ دا عرصہ لگ سگدے۔اساکوں ایں کوں کھنڈنڑ توں روکنڑاں اے۔وزیرخارجہ آکھیا جو وزیراعظم عمران خان اسلام آباد اچ سویلے توں شام تئیں ایں وباءبارے اجلاس کریندن۔ایں ویلھے اے ساریاں دااہم مسئلہ اے۔قومی رابطہ کمیٹی دے 11اجلاس تھی گئن۔این سی او سی دا روز سویلے ڈو گھنٹیاں دا اجلاس تھیندے جئیں دی صدارت وزیرمنصوبہ بندی اسد عمر کریندن۔سارے صوبیاں دی نمائندگی ہوندی اے۔سارے صوبے اپنڑی سفارشاں پیش کریندن۔ہر صورتحال دا جائزہ گھدا ویندے اتے قومی رابطہ کمیٹی کوں سفارشاں بھیجی ویندین جتھاں چھیکڑی فیصلہ کیتاو یندے۔انہاں آکھیا جو وفاقی حکومت کوروناوائرس دے اجوکی صورتحال بارے سارے صوبیاں دے مشورے نال حکمت عملی بنڑائی،ایں بارے ارکان پارلیمنٹ دی تجویزاں دا خیر مقدم کریسوں اتے قومی معاملیاں تے انہاں نال رل تے کم کرنڑ سانگے تیار ہیسے۔انہاں آکھیا جو وزیراعظم رونا ریلیف فنڈ نال بے روزگار تھیونڑ آلیاں کوں امداد ڈتی ویسی۔اپوزیشن کنے کوئی تجویزاں ہن تاں سامنڑے گھن آوے۔سیاست دا جواب سیاست نال ڈیسوں۔رل تے کم کرنڑ سانگے تیار ہیسے۔
