بلوچستان اچ دہشت گردی دے ڈو واقعات،پاک فوج دے 6 جوان، سویلین ڈرائیور شہید، آئی ایس پی آر

راولپنڈی ۔ 19 مئی (اے پی پی) بلوچستان اچ دہشت گردی دے ڈو واقعات اچ پاک فوج دے 6 جوان اتے سویلین ڈرائیور شہید تھی گین۔ پاک فوج دے شعبہ تعلقات عامہ (آئی ایس پی آر) دے مطابق وچلی رات ایف سی جواناں دی گاڈی مچھ بلوچستان دے علاقہ گھیب اچ پٹرولنگ توں ولدی پئی ہئی جڈاں اوہک بارودی سرنگ نال ٹھاک گئی،ایں سانگے جونیئر کمیشنڈ آفیسر، چار جوان اتے سویلین ڈرائیور شہید تھی گین۔ شہیداں اچ نائب صوبیدار احسان اللہ خان، نائیک زبیر خان، نائیک اعجاز احمد، نائیک مولا بخش، نائیک نور محمد اتے سویلین ڈرائیور عبدالجبار شامل ہین۔ ہک بئے واقعہ اچ مچھ بلوچستان دے علاقہ منڈ اچ دہشت گرداں نال فائرنگ دے تبادلے اچ پاک فوج د ا سپاہی امداد علی شہید تھی گئے۔