پورے ملک اچ بدھ کوں یوم استحصال منایا ویسی،وزیراعظم پاکستان عمران خان مظفرآباد اچ قانون ساز اسمبلی دے اجلاس نال خطاب کریسن اتے ریلی دی قیادت کریسن، صدر مملکت ڈاکٹر عارف علوی اسلام آباداچ کشمیریاں دی حمایت اچ ریلی دی اگوانڑی کریسن،حریت رہنما سیّد علی گیلانی کوں نشان پاکستان ڈیونڑ دا اعلان تھیسی

اسلام آباد ۔ 4 اگست (اے پی پی) بھارت ولوں 5 اگست 2019ءدے غیر قانونی زیر قبضہ کشمیر دی خصوصی حیثیت مکاونڑ دے غیر قانونی اتے غیر آئینی اقدام دے خلاف پورے ملک اچ  بدھ کوں یوم استحصال منایا ویسی۔وزیراعظم پاکستان عمران خان مظفرآباد اچ قانون ساز اسمبلی دے اجلاس نال خطاب کریسن اتے ریلی دی قیادت کریسن۔ صدر مملکت ڈاکٹر عارف علوی اسلام آباداچ کشمیریاں دی حمایت اچ ریلی دی اگوانڑی کریسن،حریت رہنما سیّد علی گیلانی کوں نشان پاکستان ڈیونڑ دا اعلان تھیسی۔جڈاں جو ہر شہر چھوٹے وڈے قصبیاں اچ ریلیاں کڈھیاں ویسن۔ پرنٹ اتے الیکٹرانک میڈیا تے صدر، وزیراعظم، چارے صوبیاں دے وزراءاعلیٰ، گلگت بلتستان دے نگران وزیراعلیٰ، صدر و وزیراعظم آزاد کشمیر دے خصوصی سنیہے چلیسن۔ وزیراعظم عمران خان دے آزاد کشمیر قانون ساز اسمبلی دے اجلاس نال خطاب ویلھے ہک منٹ دی خاموشی کیتی ویسی اتے ہر قسم دی ٹریفک روک ڈتی ویسی۔ چارے صوبیاں، گلگت بلتستان اچ گورنر اتے وزیراعلیٰ دی اگوانڑی اچ یکجہتی ریلیاں کڈھیسن۔سویلے 10وجے سائرن وجائے ویسن۔اقوام متحدہ دے مبصر مشن کوں سیکرٹری جنرل دے ناں یادداشت وی پیش کیتی ویسی۔پورے جگ اچ پاکستانی سفارتخانیاں اچ ایں ڈینھ سانگے خصوصی تقریبات تھیسن کیوں جو اے ڈینھ کشمیر دی تاریخ دابہوں سیاہ ڈینھ اے جڈاں کشمیریاں کوں انہاں دے بنیادی حق اتے سلامتی کونسل دی قرارداداں اچ ملی ہوئی خصوصی حیثیت مکاونڑ دا غیر قانونی اتے یک طرفہ اقدام چاتا گیا ہا۔