ملک اچ سمارٹ لاک ڈاﺅن نال کرونا تے قابو پاونڑ اچ مدد ملی اے،ملکی مصنوعات دی ویلیو ایڈیشن نال برآمدات ودھ سگدن،پاکستان جی ڈی پی اچ 36 ارب ڈالرودھارے دی صلاحیت رکھدے،صدر مملکت ڈاکٹر عارف علوی دا انٹرنیشنل راول ایکسپو دے ورچوئل اجلاس نال خطاب

اسلام آباد ۔ 6 اگست (اے پی پی) صدر مملکت ڈاکٹر عارف علوی آکھیے جو ملک اچ سمارٹ لاک ڈاﺅن نال کرونا تے قابو پاونڑ اچ مدد ملی اے،ملکی مصنوعات دی ویلیو ایڈیشن نال برآمدات ودھ سگدن،پاکستان جی ڈی پی اچ 36 ارب ڈالرودھارے دی صلاحیت رکھدے،صدر مملکت ڈاکٹر عارف علوی انٹرنیشنل راول ایکسپو دے ورچوئل اجلاس نال خطاب اچ آکھیے جو وزیراعظم عمران خان نے کورونا دی وبا سانگے ودھ متاثرہ لوکاں دا خیال رکھنڑ تے وڈی توجہ ڈتی اے،مزدور اتے ڈیہاڑی دار طبقہ دی احساس پروگرام نال امداد کیتی گئی اے، اتے پاکستان اچ بئے ملکاں دے مقابلے اچ کرونا گھٹ کھنڈیے اتے ایندے تے چنگے انداز اچ قابو پاتا ویندا پئے جیندی وڈی وجہ سمارٹ لاک ڈاون پالیسی اتے لوکاں اچ احساس ذمہ داری دا ہوونڑ اے۔ انہاں آکھیے جو اینجھی نمائش ملکی مصنوعات دی بیرون ملک مانگ ودھاونڑ، سرمایہ کاری اتے تجارتی سرگرمیاںس ودھا معیشت کوں تکڑا کرنڑ اچ مدد ڈیسی،ایں سانگے تاجراں کوں بیرون ملک سفارتخانیاں اچ کمرشل قونصلرز نال روابط ودھاونڑے چاہیدن جیندے کیتے وزارت خارجہ دا تعاون اہم کردارادا کرسگدے،ساکوں روایتی برآمدات دے نال نال اپنڑی مصنوعات دی ویلیو ایڈیشن تے توجہ ڈیونڑی ہوسی،ایں سانگے زرعی پیداوار دی ترقی وی لازم اے،فصلاں دی پیداوار ودھائی ونجے، فائبر، گارمنٹس، فیشن گارمنٹس دی مصنوعات دی ویلیو ایڈیشن اتے خام کپاہ تے توجہ ضروری اے جیندے کیتے حکومت کاروباراچ سوکھ کیتے ہر ممکن سہولیات ڈیندی پئی اے۔