قومی خبر رساں ادارے اچ مسیحی ورکراں دے اعزاز اچ کرسمس تقریب

اسلام آباد۔24دسمبر  (اے پی پی):قومی خبر رساں ادارے اے پی پی ہیڈ کوارٹرز اچ ادارے دے مسیحی ورکرز دے اعزاز اچ انہاں دے مذہبی تہوار کرسمس دے حوالے نال تقریب دا اہتمام کیتا ڳیا، ایگزیکٹو ڈائریکٹر سیّدہ عدیلہ رباب کاظمی ایں موقع تے مہمان خصوصی ہن جنہاں مختلف شعبیں اچ انہاں دی خدمات دا اعتراف کیتا تے کرسمس دا کیک وی کٹیا۔ ایں موقع تے ادارہ دے سینئر افسران قمر اﷲ چوہدری، شفیق قریشی، عبدالجبار زکریا، محمد عظیم اتے ٻئے موجود ہن ۔ ادارے دے ٻئے جرنلسٹ اتے نان جرنلسٹ ورکراں دی کثیر تعداد شرکت کرتے مذہبی ہم آہنگی دا عملی مظاہرہ پیش کیتا۔ اے پی پی دے زیر اہتمام ہر سال اپݨے مسیحی ورکرز دے اعزاز اچ ایں تقریب دا انعقاد کیتا ویندے ۔ اے پی پی دی ایگزیکٹو ڈائریکٹر سیّدہ عدیلہ رباب کاظمی مسیحی برادری کوں کرسمس دی مبارخ ݙتی تے مسیحی ورکراں دے رلے کرسمس دا کیک کٹیا۔ مسیحی ملازمین ولوں وی ایگزیکٹو ڈائریکٹر کوں شال پوائی ڳی ۔