اسلام آباد۔18مارچ (اے پی پی):وزیر خارجہ مخدوم شاہ محمود قریشی آکھیے جو سندھ ہائوس اچ جیڑھا کجھ تھیندا پئے او میثاق جمہوریت دی روح دے منافی اے،اڄ نوے دے عشرے دی سیاست کوں دہرایا ویندا پئے ، پارلیمنٹ دے محافظاں دے ہتھوں جے پارلیمنٹ کوں ضیان تھیسی تاں ایہو آکھیا ویسی جو ایں گھر کوں بھاہ لڳ ڳئی گھر دے چراغ توں۔ جمعے کوں ملکی سیاسی صورتحال دے حوالے نال آپݨے ھک بیان اچ وزیر خارجہ آکھیے جو ہر ممبر باوقار لوکاں دا چݨیا ہویا اے تے او آپݨے ضمیر دے مطابق اپݨے فیصلے کرݨ دا پابند اے۔ کوئی فیصلہ کرݨ توں پہلے انہاں توقعات کوں ذہن اچ رکھݨا ہوسی جیڑھا جو حلقے دے عوام منتخب کریندے ہوئیں تساں توں وابستہ کیتن۔انہاں آکھیے جو اڄ نوے دے عشرے دی سیاست کوں دہرایا ویندا پئے ایں طرز سیاست دے خلاف میثاق جمہوریت لایا ڳیا ہئی لیکن سندھ ہائوس اچ جیڑھا تھیندا پئے او میثاق جمہوریت دی روح دے منافی اے۔شاہ محمود قریشی آکھیے جو سندھ اچ گورنر راج دی تجویز دے حق اچ کائنی ۔انہاں آکھیے اڄ وزیر اعظم عمران خان دی زیر صدارت پولیٹیکل کمیٹی دا اجلاس اے میں ماضی دے تجربیں دی روشنی اچ اتھاں وی آپݨا نقطہ نظر پیش کریساں ،وزیر خارجہ آکھیے جو بھارت حالی تئیں ایں مبینہ “حادثاتی میزائل فائر” دا تسلی بخش جواب نی ݙتا ۔افغانستان دی صورتحال ساریں دے سامݨے اے ۔یوکرین اچ ودھدی کشیدگی پاروں ، تیل دیاں قیمتاں ودھدیاں پئن جیں توں معیشت تے ٻوجھ پوسی ، انہاں حالات اچ غیر یقینی صورتحال پیدا کرݨ، جمہوریت دے مفاد اچ ہے نہ معیشت دے مفاد اچ تے نہ ہی پاکستان دے عوام دے مفاد اچ ہے۔
